Read tharaka RUKA 5 Bible Online

RUKA 5 - tharaka bible

RUKA 5

¹Îgiita rîmwe Yiesû arûngi rûteere rwa Îria rîa Ngenesareeti, kîrîndî kîamwinyîka kîthikîîrîîtie ntheto ya Ngai.

²Yiesû oona matarû maîrî rûteere rwa îria matarî na antû. Eene mo baarî ategi ba makûyû. Ibaarî bakuuma baathi kûthambia neeti ciao.

³Yiesû aathûngîra îtarûûni rîa muntû eetagwa Simioni amwîra arîtindîke riume rûgombeeni rwa îria rîthiyange ndiani. Aakara nthî îtarûûni rîru, aanjîîria kûrutana antû arî ku.

⁴Akûthiria kwaria, eera Simioni, “Iranga îtarû ndiani, bûgere neeti cienu bûgwate makûyû.”

⁵Simioni amûcookeria amwîra, “Mwathani, tûramategire ûtugû bunthe na gûtirî rîo tûragwata. Îndî n'ûntû ûkuuga, ka ngere neeti rûûyîîni.”

⁶Simioni na bara bangî baarî na bo, baarûtha ûgu Yiesû aabeerire. Bakûrûtha ûgu, baagwata makûyû maingî mûno, mwanka neeti cienda gûtuîkanga.

⁷Baanjîîria kûûnya ategi bara baarî îtarûûni rîra rîngî baaya kûbagwatia kûruûra neeti. Babu bangî baaya. Baagwatania baûyûria matarû marî maîrî mwanka meenda kûriama rûûyîîni n'ûrito.

⁸Simioni Petûrû akwona ûgu, aaturîria Yiesû maru amwîra, “Tigana naani Mwathani n'ûntû ndî mwîyia!”

⁹Simioni na bara bangî baarî na bo baarigara i makûyû mamu baagwete maingî ûgu.

¹⁰Na wana kinya aana ba Cabendi bara beetagwa Njakubu na Njoana, bara baarutanagîria ngûgî na Simioni baarigara n'ûntû bûbu. Yiesû eera Simioni, “Ûtigaakuthûke. Kuuma îîndî ûgaatua gûtegaga antû ûkîbareetaga kîrî niû.”

¹¹Simioni na bara bangî baumîria matarû maao rûgombeeni, baatiganîria into biao bionthe baathingata Yiesû.

¹²Îgiita rîmwe, Yiesû naarî taûni yarî na muntû aayîîtue mûtigiri. Muntû ûyu akwona Yiesû aaya kîrî we. Amûturîria maru ûthiû bwake bûtongithîîtie nthîgûrû, amwereka amwîra, “Mwathani, weegua wenda kûmboria, mboria nthere.”

¹³Yiesû aatambûrûkia njara yake amûringithia. Amwîra, “Inkwenda, thera!” Nthûti îmwe muntû ûyu oora mûtigiri.

¹⁴Yiesû amwîra, “Ûtikeere muntû. Îndî îthi wonwe i mûthînjîri wa Ngai, ûrute kîewa kîra Musa augire kîrutagwe kîrî ûkûûyî kîrî antû.”

¹⁵Amwe na ûgu, nkuma ya Yiesû yatamba nthîgûrû yonthe. Kîrîndî kingî gîa antû gîatua kûûya kûmûthikîîria gîkîorua.

¹⁶Îndî Yiesû eebathûraga akathi bantû gûtarî antû kûrombera noogo.

¹⁷Ntugû îmwe Yiesû akîrutanaga, *Abarisai na aarimû bamwe ba watho ibaarî agu. Baumîîte bwa taûni cia Gariiri, Njundea na Njerusaremu. Yiesû naarî na inya ya kworia aayie.

¹⁸Antû bamwe baaya bakamatîîte kîonje na mamaamîro mara kîamaamagîra, bakîreeteete kîrî Yiesû. Antû babu bagûceria a gûgîkûrûkîîria bakiira ara Yiesû aarî bakîmaamia mbere yake,

¹⁹baaga n'ûntû bwa antû kwingîa. Baatwa rûûgûrû rwa nyomba baaromora, bakîîndamîîria oogo kîrî mamaamîrooni ma kîo mwanka gatîgatî ga antû, ara Yiesû aarî.

²⁰Yiesû akwona bûra antû babu beetîgîîtie bûgana, eera kîonje gîku, “Ûkûrekerwa meeyia maaku, aba.”

²¹Aarîmû ba watho na Abarisai baatua kûthûgaania na nkoro bakeebûûria, “Muntû ûyû nakwîthûkia taka arî Ngai! Anga ti Ngai wenka aûmba kûrekera muntû meeyia?”

²²Yiesû aamenya bûra baathûgaanagia. Abaûria, “I mbi n'ûntû bûkûthûgaania ûgu?

²³I bûrîkû bûûthû? I kuuga, ‘Ûkûrekerwa meeyia maaku,’ kana i kuuga ‘Ûkîîra ûthi’?

²⁴Kaingo bûmenya Mwana wa Muntû arî na watho bwa kûrekera antû meeyia maao gûkû nthîgûrû, inkûbwonia.” Yiesû eera kîonje gîku, “Ûkîîra ûkamate matandîko maaku wînûke.”

²⁵Nthûti weenu kîonje gîku gîaûkîîra bacûûbîîte, gîakamata mamaamîro ma kîo mara gîakamatîîtwe na mo, kîenûka gîgîkumagia Ngai.

²⁶Antû bonthe bakwona ûgu, baarigara mûno. Baakumia Ngai bamakîîte mûno bauga, “Tûkwona mantû makûrigaria îmunthî.”

²⁷Nyuma yoogu Yiesû aumagarûka. Athiîte oona muntû eetagwa Raawî akari nthî ara aakaraga, akîrûngithagia ûgooti. Amwîra, “Nthingata!”

²⁸Raawî aûkîîra aatiganîria into biake bionthe amûthingata.

²⁹Raawî aathuuranîra Yiesû kîatho kîînene mûno mûciî wake. Ageni bamwe bara baarî oogo, baarî arûngithia ûgooti na antû bangî. Yiesû aakaranîîrîîte na bo bonthe meethaani îmwe bakîrîyaga.

³⁰*Abarisai bamwe na aarimû bamwe ba watho bakwona ûgu, baanung'una kîrî arutwa baake, bakîûragia, “I kî gîgûtûma bûrîyanîra na bûnyunyanîra na arûngithia ûgooti na eeyia?”

³¹Yiesû abacookeria abeera, “Tika antû batarî baayie beendaga ndagitaarî. Bara baayie i bo beendaga kûragûrîrwa.

³²Ntaaya gwîta antû bara baagîru. Ndaayire gwîta bara eeyia kaingo beerira.”

³³Baûria Yiesû, “I kî n'ûntû arutwa ba Njoana na ba *Abarisai bo batîîragîra kûrîa irio n'ûntû bwa maromba, îndî baaku barîyaga na bakanyua?”

³⁴Yiesû abaûria, “Bwaûmba kwîrîgîîra antû bara beete wikiini barega kûrîa ntugû îra mûgûrani arî na wiki?

³⁵Îndî rîra kagiita gagaakinya mûgûrani arutwe kîrî bo, rîru i rîo baûmba gûtîîrîra.”

³⁶Yiesû abaa ngerekano auga, “Gûtirî muntû eekagîra nguo înkûrû kîraka na gîtaame gîtarî gîkûrû ataambîîte gûkîbûûra, n'ûntû nguo yabûûrwa, gîtaame gîku igîkaamîkuuyia.

³⁷Na gûtirî muntû eekagîra ûkî bwa kûrugwa warîru nceemaani înkûrû, n'ûntû ibûgaatûûmûra nceema înu bûûre mana na nceema mbene.

³⁸Ûkî bwa kûrugwa warîru bwîkagîrwa nceemani îtarî nkûrû.

³⁹Gûtirî we eendaga kûnyua ûkî bûtarî bwîru bwega anyuîte ûkî bwîru n'ûntû akauga, ‘Ûkî bwîru i bu bûrî mûrîo.’ ”