Read tharaka RUKA 8 Bible Online

RUKA 8 - tharaka bible

RUKA 8

¹Ntugûûni ira ciathingatire, Yiesû aathiûrûûka na mataûni na ntûûra agîtûmagîîria ntheto îmbega ya ûnene bwa Ngai. Aathiyanagia na arutwa baake îkûmi na baîrî,

²na eekûrû bamwe bara Yiesû ooreetie ndwari, na bara eengatîîtie irundu biithûûku biauma kîrî bo. Ûmwe aarî Maria Mûmagindari, ûra irundu biithûûku mûgwanja biengatîîtue biauma kîrî we.

³Ikwarî na mwekûrû ûngî eetagwa Njoani, mwekûrû wa Suca (Suca ûra aarî mûmenyeeri wa into bia Eronde), na kûrî ûngî eetagwa Susana, na bangî baingî bara baateethagia Yiesû na into biao.

⁴Antû baaya kîrî Yiesû baumîîte bwa taûni mwanya mwanya, beethîrana amwe. Yiesû abaarîria agîtûmagîra ngerekano. Abeera,

⁵“Ntugû îmwe mwandi naathiire kwanda mbeû. Wabûra aamincaga mbeû yake mûndaani, kûrî imwe ciagwîre njîraani ciakinyangwa n'antû, nyoni ciaya cioya.

⁶Ingî na cio ciagwa njaraani cia maiga. Ikuuma ciaûma n'ûntû gûtaarî na kîthithina.

⁷Kûrî ingî ciagwîre matîîni ma mîîgua. Ikuuma, matî mamu ma mîîgua maakûrania na cio maciinyîka.

⁸Îndî kûrî ira cio ciagwîre mûthetuuni ûmûnoru. Ciauma, ciakûra bwega na ciaumana mûno. Wakîra îmwe yaciaraga mpîndî îgana rîmwe.” Yiesû aarîîkia na kuuga na inya, “Ûra arî na matû neegue.”

⁹Arutwa baake bamûûria bûra ngerekano înu yaugaga.

¹⁰Yiesû abacookeria abeera, “Biû ibwetwe ûûme bwa kûmenya witho bwa ûnene bwa Ngai. Îndî kîrîndî kîra kîngî kîo nwanga ngakîarîria na ngerekano, kaingo ‘Bagaacûûbaga, îndî bationa, na beegua bataciûre.’ ”

¹¹Yiesû auga, “Ûrutani bwa ngerekano înu bûkari ûûgû. Mbeû i kiugo kîa Ngai.

¹²Mbeû îra yagwîre njîraani i ngerekano ya antû bara beegagua kiugo, îndî Saitaani akaaya akabûria kîra gîkûrî kîande nkorooni ciao batikaaye gwîtîgia boonokua.

¹³Mbeû îra yagwîre njaraani cia maiga i ngerekano ya antû bara beegagua kiugo kîa Ngai bagagîîtîgia bakeneete, îndî ûtiîgagua beerikîîtie bwega wîtîgioni. Beetîgagia kagiita gaakai, baayîîrwa i magerio, bagacooka waara akûrû.

¹⁴Mbeû îra yagwîre matîîni ma mîîgua i ngerekano ya antû bara beegagua kiugo kîa Ngai, îndî n'ûntû bwa kwîthangîkia bagîîciiragîria mantû ma ûtûûro bûbû bwa nthîgûrû îno, kwenda ûtonga, na mîago, bikainyîka kiugo gîkathaata.

¹⁵Na mbeû îra yagwîre mûthetuuni ûmûnoru i ngerekano ya antû bara beegagua kiugo kîa Ngai, bagakîthûkia na wendo na ûmma bakoonania maciara baûmîîrîîtie.”

¹⁶Yiesû auga, “Gûtirî muntû amuntagia taa amîkunîkîra kana amîaiga rungu rwa ûrîrî. Amîtûûgagîîria bantû aûkîîru kaingo îmûrîkîra antû bara bakaathûngîra nyomba înu.

¹⁷Gîntû kîonthe kîra kiithe igîkaumbûrwa. Witho bunthe bûkaamenyekana, bwoneke cwe.

¹⁸“Menyagîîraani mûno bûra bûkeegangagua mantû, n'ûntû ûra arî na gîntû akoongeerwa. Îndî ûra gûtarî kîo we arî na kîo, wana kaniini kara arî na ko nagaatunywa.”

¹⁹Gina na aruagina ba Yiesû baaya bakîendaga kwaria n'we, îndî baaremwa kûmûkinyîîra n'ûntû bwa antû kwingîa.

²⁰Muntû ûmwe eera Yiesû, “Nyûkwe na aruanyûkwe barûngi aara nja na ibakwenda gûkwona.”

²¹Yiesû abeera, “Taata na aruayia n'antû bonthe bara beegagua kiugo kîa Ngai bakarûtha bûra gîkuuga.”

²²Ntugû îmwe Yiesû na arutwa baake baatwa îtarûûni. Yiesû abeera, “Tûringeeni tûthi rûgongo rûra rûngî rwa îria.” Baanjîîria kûthi.

²³Bathiîte na îtarû, Yiesû aagwatwa i toro aamaama. Kwagîa kîbuubani kîînene îriani îtarû rîenda kûriama. Bonthe beegua barî ûgwatiini.

²⁴Arutwa baake baathi bamûûkia bamwîra, “Mwathani, Mwathani! Itûkûthira!” Yiesû aûka, aagondokera kîbuubani na makûmbî ma rûûyî, gwakirîîria.

²⁵Yiesû aûria arutwa baake, “Bûrî kû wîtîgio bwenu?” Arutwa baarigara na baaguaya. Baûrania, “Ka muntû ûyû arî ûû n'ûntû wana ruuo na rûûyî ibikûmwathîkîra?”

²⁶Yiesû na arutwa baake bakûringa rûgongo rûra rûngî rwa îria, baakinya nthîgûrû ya Angeraca îra yeerekanîrîte na Gariiri.

²⁷Bakuuma îtarûûni baakinya nthîgûrû, baakomana na muntû aarî na kîrundu kîîthûûku mûno. Muntû ûyu naarî akuuma taûni îra aatûîre. Ataakaraga mûciî na ateekagîra nguo kwa îgiita rîîraaya. Aakaraga makurunguuni kûra antû baakuû baathikagwa.

²⁸Akwona Yiesû aanjîîria gûkaya mûno, eegwîthia nthî magûrûûni maake. Augîîria na inya auga, “N'ata ûkwenda naani, Yiesû, Mwana wa Ngai ûra atûûraga îgûrû mûno? Itû ngûkwereka menya ûnnyamaaria!”

²⁹Augire ûgu n'ûntû Yiesû naarî akwîra kîrundu gîku kiume kîrî we. Muntû ûyu aakaraga ogeetwe na nyororo njara na magûrû. Îndî amwe noogu, rîra kîrundu gîku kîamûgwataga, aathitimûkaga nyororo igatuîkanga akaûra akathi bwa rwanda.

³⁰Yiesû amûûria, “Wîtagwa ata?” Muntû ûyu amwîra, “Mbîtagwa Mbûûtû.” Aarî na irundu mûkondo.

³¹Irundu bibu biereka Yiesû biamwîra, “Itû ûtigaatwîngatie ûtwîra tûthi bwa ndoromera!”

³²Ikwarî na ngûrwe inyingî ciarîîthîîtue kîrîmaani waagu akubî. Irundu bibu biereka Yiesû biamwîra, “Twîtîgîîrie tûthi ngûrweeni iira.” Yiesû abiîtîgîîria.

³³Irundu bibu biauma kîrî muntû ûyu, biathi biathûngîra ngûrweeni inu. Ngûrwe inu cionthe ciaugia ciîndamîîte na mpara ciemina îriani, ciaûra na rûûyî.

³⁴Antû bara bairîîthîîtie bakwona ûgu, baugia rwîro baathi. Baatambia ntheto taûni na ntûûra ira ciarî akubî.

³⁵Antû bauma taûni baathi kwîbonera bûra mantû mamu maakarakari. Bakûthi kîrî Yiesû, beethîra muntû ûyu aarî na irundu biithûûku akari nthî magûrûûni ma Yiesû. Bakwona eekîrîte nguo na kîongo gîake gîtarî ûntû, baatua kwîgua ûguaya.

³⁶Bara booneete mantû mamu magîkarîka beera antû bûra muntû ûyu aarî na irundu biithûûku oorangiirue.

³⁷Antû bonthe ba gîteere gîku kîa Angeraca, beera Yiesû aume agu athi n'ûntû ibeegiirue ûguaya mûno. Yiesû aatwa îtarûûni aathi.

³⁸Muntû ûyu aarî na irundu bibu eereka Yiesû bathiyania. Yiesû amûregeera amwîra,

³⁹“Înûka ûkeere antû beenu bûra Ngai akûrûthîra.” Muntû ûyu akuuma agu aathiire agîtûmagîîria taûniini înu yonthe akîîraga antû bûra Yiesû amûrûthîra.

⁴⁰Yiesû agûcooka rûgongo rûra rûngî rwa îria, kîrîndî kîra kîamweteerete kîamûthagaana.

⁴¹Mûtongoria ûmwe wa *sinagoogi eetagwa Njairû aaya, eegwîthia nthî magûrûûni ma Yiesû. Amwereka bathi mûciî wake

⁴²n'ûntû kaana gaake ga kaarî ikaarî akubî gûkua. Kaarî gaku kaarî ka mîanka îkûmi na îîrî na Njairû ataarî na kangî. Yiesû athiîte, kîrîndî gîa antû ikîamwinyîkaga.

⁴³Kîrîndîîni gîku ikwarî na mûka aanyamaarîîte mîanka îkûmi na îîrî akîruaga nthakame. Eenyangîîtie into biake bionthe akîragûragîrwa na gûtirî ndagitaarî aûmba kûmworia.

⁴⁴Mûka ûyu aaya bwa nyuma ya Yiesû, amûtongithia mûthia wa nguo yake. Nthûti îmwe nthakame îra mûka ûyu aaruaga yatiga.

⁴⁵Yiesû aûria, “N'ûû aantongithia?” Bonthe baakaana. Petûrû amwîra, “Mwathani, nwa antû wababa bagûcereereete bakwinyîkîîte.”

⁴⁶Yiesû auga, “Kûrî muntû aantongithia n'ûntû inkûmenya kûrî inya yambuma.”

⁴⁷Mûka ûyu akwona akûmenyerwa, aaya akiinainaga n'ûguaya. Aagwa nthî mbere ya Yiesû. Antû bonthe bakîîgagua amwîra gîtûmi gîa kûmûtongithia na bûra oorangua nthûti îmwe.

⁴⁸Yiesû amwîra, “Wîtîgio bwaku bûgûtûma wora. Îthi na ûkiri, mwarî wakwa.”

⁴⁹Yiesû akîaragia woogu, Njairû aareeterwa ntûmwa i mûtûmwa kuuma mûciî wake. Eerwa, “Nootanyamaaria mwarimû kaarî gaaku gagûkua.”

⁵⁰Yiesû eegua ûgu, eera Njairû, “Ûtikaamake, îgua ûrî na wîtîgio, mwana akoora.”

⁵¹Agûkinya mûciî wa Njairû, Yiesû aathûngîra nyomba barî na Petûrû, Njoana, Njakubu na aciari ba kaana gaaku. Gûtirî bangî eetîgîîria bathûngîra ku.

⁵²Antû bonthe bara baarî oogo ibaarîragîra kaana gaku mûno. Yiesû abeera, “Tigaani kûrîra. Kaarî gaka ti gakuû, ikamaami.”

⁵³Antû boona ta gûtarî bu augaga n'ûntû ibaiyî i gaakuû.

⁵⁴Yiesû aagwata kaarî gaku njara. Akeera, “Kaarî, ûkîîra!”

⁵⁵Kaarî gaku kaariûka, gaûkîîra nthûti. Yiesû abeera bakarûmie gîntû gîa kûrîa karîe.

⁵⁶Aciari ba ko baarigara. Yiesû abakaania abeera batikeere muntû mantû mamu.