Read tharaka RUKA 9 Bible Online

RUKA 9 - tharaka bible

RUKA 9

¹Kagiita kamwe Yiesû eeta arutwa bara baake îkûmi na baîrî bantû amwe. Abaa inya na watho bwa kwîngatia irundu bionthe bira bithûûku na kworia antû ndwari.

²Abatûma bathi gûtûmîîria mantû ma ûnene bwa Ngai na kworia bara baayie.

³Mbere ya bathi, Yiesû abeera, “Bûtigaakamate nwa mbi rûgendooni. Bûtigaakamate mîraagi, kana mbooro, kana irio, kana mbia, kana nguo îngî tatiga îra muntû eekîrîte.

⁴Bwathi taûni îra bûkaathi, nyomba îra bûkaathûngîra bûgwatwe ûgeni, bûkare ku mwanka rîra bûkaathi.

⁵Îndî bûkaaya kûthi taûni nna bûkarega kûgwatwa ûgeni, bûkiuma ku bûtige bwabaturaturîra tîîri ya mbayo cienu, rûrî rwano rwa kûboonia bûtirî ngwatanîro na bo.”

⁶Arutwa babu bauma agu baariûnga na ntûûra bagîtûmagîîria ntheto îmbega. Na bantû onthe ara baathiyaga bakeethîra muntû ûmwayie, ibaamworagia.

⁷Eronde ûra aathanaga gîteere kîa Gariiri akwîgua mantû mara maakarîkîîte, aarigicana mûno n'ûntû antû bamwe baugaga i Njoana Mûbaatithania ariûkîîte.

⁸Bangî bakauga n'Eriya aracookire kwoneka kaîrî. Na bangî na bo bakauga i kîroria ta bira bia tene.

⁹Eronde auga, “Indagiitithiirie Njoana nkingo. Aabu ûyû ûngî n'we nkwîgua mantû maake n'ûû?” Neendaga kûmwona mûno.

¹⁰Atûmwa bara Yiesû aatûmîîte baacooka bamwîra mantû monthe mara baarûthîîte. Aathi na bo bonka bwa taûni yeetagwa Bethisainda.

¹¹Kîrîndî gîkûmenya bûra Yiesû aathiîte kîamûthingata noogo. Yiesû abagwata ûgeni abeera mantû ma ûnene bwa Ngai, na bara beendaga kworua abooria.

¹²Riûa rîkwanjîîria kûthûa, arutwa bara baake îkûmi na baîrî baathi beera Yiesû, “Îra antû bathi kaingo bakinya ntûûra ira irî akubî kûra bakoona ûmaamo na irio. Gûkû tûrî i ta rwanda.”

¹³Yiesû abeera, “Baeni gîntû bûrî biû barîe.” Arutwa bamwîra, “I mîgaate îtaano na makûyû maîrî akî tûrî na mo. Kîrîndî gîkî kîgana ûûgû kîagûrîrîka irio?”

¹⁴(Antû bara baarî oogo baarî antû arûme ta ngiri itaano ûgu.) Yiesû eera arutwa babu baake beere antû bakare nthî na ikundi, na wakîra gîkundi kîîgue kîrî gîa antû ta mîrongo îtaano.

¹⁵Arutwa bakûrûtha ûgu,

¹⁶Yiesû aathûkia mîgaate îra îtaano na makûyû mara maîrî. Aacûûba îgûrû, aacookeria Ngai nkaatho n'ûntû bwa bio, abing'enyûranangia, aanenkera arutwa baake bagaîra antû.

¹⁷Antû bonthe baarîa baabaa. Arutwa beethîrania mang'enyûrû ma mîgaate na inuku bia makûyû baûyûria ikaabû îkûmi na biîrî.

¹⁸Ntugû îmwe Yiesû akîrombaga arî wenka, arutwa baake baaya kîrî we. Yiesû abaûria, “Bungwa antû baugaga ndî ûû?”

¹⁹Arutwa baake bamûcookeria bamwîra, “Bamwe baugaga ûrî Njoana Mûbaatithania, bangî bakauga ûrî Eriya, na bangî na bo bakauga nûriûkîîte ûrî ûmwe wa iroria bira bia tene.”

²⁰Yiesû abaûria, “Î biû buugaga ndî ûû?” Petûrû amûcookeria amwîra, “Woû ûrî Kîrîstû ûra atûmîîtwe i Ngai.”

²¹Yiesû aakaania arutwa baake abeera batikeere antû n'we Kîrîstû.

²²Yiesû aacooka abeera, “Mwana wa Muntû nwa mwanka anyamaarue mûno. Akaaregwa n'akûrû, *athînjîri bara banene ba Ngai, na aarimû ba watho. Na nwa mwanka aûragwe, îndî akaariûka nyuma ya ntugû ithatû.”

²³Yiesû aacooka eera antû bonthe, “Muntû akeenda kûnthingata abatîîrue eetîîyîra akamata mûtharaba wake anthingata ntugû cionthe.

²⁴Ûra oonaga mwoyo ûyû ûrî gîtûmi, akaûra. Îndî ûra akeeruta n'ûntû bwakwa, agaatûûra mwoyo.

²⁵Î rîo rî, i baita mbi muntû oona wana ûkeegua nthîgûrû yonthe n'yake, îndî akaaga mwoyo?

²⁶“Ûra akambîgua îgi kana eegue ûrutani bwakwa îgi, Mwana wa Muntû nakaamwîgua îgi rîra akaaya na araîka baatheru arî na mwago wa Îthe.

²⁷“Na mma ga nkûbwîra, bamwe ba baba barûngi aaga batiikua batooneete ûnene bwa Ngai.”

²⁸Nyuma ya ntugû ta inyanya kuuma Yiesû akuuga mantû mamu aathûkia Petûrû, Njoana na Njakubu baathi baatwa kîrîmaani kûromba Ngai.

²⁹Akîrombaga, ûthiû bwake bwagarûka na nguo ciake ciatua gûyica mûno ta rweni.

³⁰Nthûti îmwe antû baîrî baumîîra baanjîîria kwaria n'we. Baarî Musa na Eriya,

³¹barî na mwago wa îgûrû bakîaragia na Yiesû. Baaragia mantû ma gîkuû kîa Yiesû kîra eengeerie gûkua Njerusaremu, kwingia kwenda kwa Ngai.

³²Petûrû, barî na bara bangî baarî na bo ibaamaami toro îndito. Bakûyiûkia toro boona Yiesû arî na mwago na boona antû babu baîrî barûngi n'we.

³³Antû babu baîrî bagûkara taka bakwenda kûthi, Petûrû eera Yiesû, “Mwathani, na kaaba tûrî aaga. Ga twake tûganda tûthatû aaga—gaaku, ka Musa na ka Eriya.” Petûrû akiuga ûgu ataamenyaga bûra augaga.

³⁴Petûrû akîaragia woogu, îtu rîaya rîabakunîkîra. Arutwa babu baagwatwa n'ûguaya.

³⁵Beegua kayû kauma îtuuni rîru kauga, “Ûyû n'we Mwana wakwa ûra nthuurîîte. Mûthikagîîrieni!”

³⁶Kayû gaku gagûtiga kwaria, Yiesû aatigwa wenka. Bakîîya kwaria mantû mamu arutwa babu ibaambîîte baakarakara bateera antû ûgu boonire.

³⁷Rûûni Yiesû na arutwa babu baake bathatû baagûrûka kîrîmaani. Bakûgûrûka beethîra kîrîndî kiingî kîyire.

³⁸Muntû ûmwe kîrî bo augîîria auga, “Mwarimû! Itû ngûkwereka mbonera kaana. Ntirî kaîyî kangî!

³⁹Waara kîrundu kîra karî na kîo kîrakagwatîra kaanjagîîria gûkurura gakîrutaga mûthonjo na kanyua. Îgiita rîra kîrundu gîkî gîkagwete igîkanyamaaragia mûno gîkîîya gûtigana na ko.

⁴⁰Mberekire arutwa baaku bakîîngatia, bakûgeria baaremwa i kîo.”

⁴¹Yiesû abeera, “Biû bûrî nthuke înthûûku, îtarî wîtîgio. Ga tûgaakarania naabi na mbwinyîkîrie mwanka rî?” Yiesû eera muntû ûyu, “Reete kaana gaaku aaga.”

⁴²Kaana gaku kathiîte, kîrundu gîku kîanjîîria gûkaûmagaria. Gîagaturania nthî gakîgeraga nthari. Yiesû aagondokera kîrundu gîku gîakagirîkagia. Kaana gaku kaabua. Yiesû akanenkanîra kîrî îthe.

⁴³Antû bonthe baarigara i bûra inya ya Ngai îneneete bûgana. Antû barigarîîte woogu i mantû mamu Yiesû aarûthire, Yiesû eera arutwa baake,

⁴⁴“Kindaani matû mbwîre. Mwana wa Muntû agaakunyanîrwa anenkanîrwe kîrî antû.”

⁴⁵Arutwa bataaciûra ûntû bûbu n'ûntû ibaithîîtwe bu batikaabumenye. Îndî na bo baakuthûka kûûria biûria.

⁴⁶Arutwa ba Yiesû ibaakararanagia bakîûranagia ûra kîrî bo akeegua arî mûnene kîrî bara bangî.

⁴⁷Yiesû akûmenya bûra baathûgaanagia aathûkia kaana kaniini akarûngamia akubî n'we.

⁴⁸Abeera, “Ûra akenagîîra kaana ta gaka riîtwaani rîakwa, i niû akenagîîra. Na ûra ankenagîîra, n'ûra aantûmire akenagîîra. Ûra akeenyithia kîrî bonthe n'we agaatuîka mûnene.”

⁴⁹Njoana eera Yiesû, “Mwathani, kûrî muntû twonire akîîngatia irundu biithûûku agîtûmagîra riîtwa rîaku twamwîra atige n'ûntû t'ûmwe wetû.”

⁵⁰Yiesû amwîra, “Bûtikaagirie muntû ta ûyu, n'ûntû weegua muntû atirî ûthû naabi bûrî kîmwe n'we.”

⁵¹Ntugû îgûkara gûkinya ya Yiesû gwîtithua îgûrû aathûgaania oona nwa athiire Njerusaremu.

⁵²Aatûma atûmwa baathiyaga. Atûmwa baathi bwa taûni ya Samaria kûmûthuuranîra bantû a kûmaama.

⁵³Antû ba naagu Samaria bataagwata Yiesû ûgeni, n'ûntû aathiîte bwa Njerusaremu.

⁵⁴Arutwa baake—Njakubu na Njoana bakwona ûgu, bamwîra, “Mwathani, twîte mwanki kuuma îgûrû ûbarûngûrie?”

⁵⁵Yiesû abacûûba abagondokera abeera, “Bûtiiyî kîrundu gîku bûrî na kîo i kîa mûthemba mûbi!

⁵⁶Mwana wa Muntû aayire kwonokia, ataaya kûûraga.”[3] Yiesû na arutwa baake bauma agu baathi ntûûra îngî.

⁵⁷Bathiîte na njîra woogu muntû ûmwe eera Yiesû, “Ngakûthingataga gûntû kunthe kûra ûkaathiyaga.”

⁵⁸Yiesû amwîra, “Mbwe irî mîrinya na nyoni irî ntara, îndî Mwana wa Muntû atirî kîmaamo.”

⁵⁹Yiesû eera muntû ûngî, “Nthingata!” Muntû ûyu amwîra, “Mwathani, nwanga ndaamba kûthika baaba.”[4]

⁶⁰Yiesû amûcookeria amwîra, “Tigana na ntungu ithike ntungu cia cio. Îthi ûgatûmîîrie mantû ma ûnene bwa Ngai.”

⁶¹Muntû ûngî n'we eera Yiesû, “Ngakûthingataga, Mwathani, îndî ka mbambe nthi nkamenyithie antû ba mûciî wetû nkûthi.”

⁶²Yiesû amwîra, “Muntû akagwata mûraaû akîrîma akaraitha nyuma, muntû ta ûyu atiagîrîte ûneneeni bwa Ngai.”