Read tharaka NJOANA 1 Bible Online

NJOANA 1 - tharaka bible

NJOANA 1

¹Kîambîrîriani kîongwa, Kiugo nwa kîarî oogo, na Kiugo nwa gîatûûraga na Ngai, na Kiugo nwa kîarî bûmwe na Ngai.[1]

²Kiugo nwa gîatûûraga na Ngai kîambîrîriani kîongwa.

³Into bionthe biaûmbirwe gûkûrûkîîra kîrî Kiugo n'ûntû gûtirî gîntû nwa kîmwe kîaûmbwa i Ngai, Kiugo atarî oogo.

⁴Kiugo gîkî i kîo kaumo ka mwoyo. Na mwoyo ûyu n'uu watuîkire werû kîrî antû.

⁵Werû bûthararaga mwinduuni na mwindu ûtaarobûkîria inya.

⁶Ngai naatûmire muntû eetagwa Njoana,

⁷arî mûkûûyî aaya kwîra antû mantû ma werû bûbû, kaingo antû bonthe beetîgia kuumania na ûkûûyî bwake.

⁸Njoana t'we aarî werû bûbû. We ka aayire arî ta mûkûûyî wa kwîra antû mantû ma werû bûbû.

⁹Werû bûbû i bu werû bungwa bûra bwarî bûûye nthîgûrû bûthararîre antû bonthe.

¹⁰Kiugo naarî nthîgûrû îno, na nthîgûrû yaûmbirwe gûkûrûkîîra kîrî we, îndî nthîgûrû îtaamûmenya we aarî ûû.

¹¹Akûthi kwao antû ba kwao bataamûkeneera.

¹²Îndî bara bo baamûkeneere bamwîtîgia, naatûmire batuîka aana ba Ngai.

¹³Babu bo bataatuîka aana ba Ngai na njîra ya gûciarwa ta wîthîre. Bataaciarwa kuumania na kwenda kwa muntû, kana kûringana na mûbango wa muntû. Baaciarirwe gîîkîrundu i Ngai.

¹⁴Kiugo gîku i kîo gîatuîkire muntû, aatûûrania amwe naati. Na kuumania na mûkarîre wake itwoonire arî na mwago, mwago wa kîmoomwe kîa Îthe. Aarî na ûtugi bwingî mûno na ûmma bwingî mûno.

¹⁵N'we Njoana aakûûyagîîra mantû maake rîra aatûmagîîria akiugaga, “Ûyû n'we ndaaragîîria rîra ndaugaga, ‘Ûra aayîîte nyuma yakwa n'we mûnene kîrî niû, n'ûntû we naarî oogo mbere yakwa.’ ”

¹⁶Na n'ûntû bwa wingî bwa ûtugi bwake natûthaarimaga na bu kwa wingî.

¹⁷Ngai aatûmîîre Musa kweyana *watho, îndî ûtugi na ûmma biareetirwe i Yiesû Kîrîstû.

¹⁸Gûtirî muntû oona Ngai na meetho rî kana rî. Ûra aatûmenyithiirie mantû maake i Mwana wake wa kîmoomwe, ûra atarûmûkanaga na Îthe.

¹⁹Rîra atongoria ba Ayaundi ba Njerusaremu baatûmire *athînjîri ba Ngai na Araawî bathi kûûria Njoana Mûbaatithania n'we ûû,

²⁰Njoana ataarega kûbacookeria. Aabeerire mantû caû, abeera, “Niû ti niû Kîrîstû.”

²¹Na bo bamûûria, “Aabu woû naawe rî, i woû ûû? Kana i woû Eriya?” Njoana abeera, “Arî, ti niû Eriya.” Bamûûria, “Ti woû kîroria kîra?” Njoana abeera, “Arî.”

²²Bamûûria, “Aabu îîndî rî, woû ûrî ûû? Twîre ûrî ûû, n'ûntû kûrî bara batûtûmîîte na ibakwîrîgîîra tûbaa îcookio.”

²³Njoana aabacookeerie na mîgambo îra kîroria Isaaya aaroririe, abeera, “Niû ndî kayû ka muntû ûra agûtûmîîria rwanda gakiugaga, rûngariani njîra ya Mwathani!”

²⁴Atûmwa babu baatûmîîtwe n'Abarisai

²⁵bamûûria, “Aabu naka ûkûbaatithania na ûtirî Kîrîstû, kana Eriya, kana kîroria?”

²⁶Njoana abeera, “Niû mbaatithanagia na rûûyî. Arî oogo ûmwe wacienu ka bûtamwiyî n'we ûû.

²⁷N'we aayîîte nyuma yakwa, ûra niû ningwa ntaagîrîte nwa wa kûmûtharia rûrigi rwa kîraatû gîake.”

²⁸Mantû mama maakarîkîîre Bethania, rûgongo rûra rûngî rwa uumîîro bwa riûa rwa muuro wa Njorondani, naara Njoana aabaatithanagîria.

²⁹Rûûni rwa ntugû înu, Njoana akwona Yiesû aayîîte kîrî we, auga, “Cûûbaani bwone Kagondu ka Ngai kara kathiragia mawîyia ma nthîgûrû!

³⁰Ûyû n'we ndaraaragîîria rîra ndaraugaga, ‘Ûra aayîîte nyuma yakwa n'we mûnene kîrî niû, n'ûntû we naarî oogo mbere yakwa!’

³¹Niû ningwa ntaiyî kana n'we aarî. Ndarabaatithanagia na rûûyî kaingo antû ba Isiraeri bamûmenya n'we ûû.”

³²Njoana eeyana ûkûûyî bûbû, auga, “Ndoonire Kîrundu amwîndamîîra aumîîte bwa îgûrû akari ta îcea, aatûûrania n'we.

³³Mbereeni ntaiyî kana n'we aarî. Ka ndeerirwe i Ngai ûra aantûmire mbaatithanagia na rûûyî, ‘Muntû ûra ûkoona eendamîîrwa i Kîrundu kuuma îgûrû atûûranie n'we, ûmenye ûyu n'we akaabaatithanagia na Kîrundu Ûmûtheru.’

³⁴Na wabu indoonire ûgu. Na ga nkûbwîra ûkûûyî bwakwa, ûyû n'we Mwana wa Ngai.”

³⁵Rûûni Njoana naarûngi kaîrî na arutwa bamwe baake, baîrî.

³⁶Akwona Yiesû akûrûkîîte, auga, “Cûûbaani bwone! Gaka i ko Kagondu ka Ngai.”

³⁷Arutwa babu baîrî bakwîgua ûgu, baathingata Yiesû.

³⁸Yiesû akûûndûka oona arutwa babu bamûthingatîîte. Abaûria, “N'ata bûkwenda?” Bamûcookeria bamûûria, “I kû ûkaraga, Rabai?” (Na Kîîbirania ‘Rabai’ i ta kuuga ‘Mwarimû’.)

³⁹Yiesû abeera, “Ncûûni mbwonie.” Arutwa babu bamûthingata boona ara aakaraga. Na n'ûntû kwarî ta thaa kûmi, baakara mwanka gwatuga.

⁴⁰Ûmwe wa arutwa babu baîrî aarî Enderea, mûruagina wa Simioni Petûrû. Aarî ûmwe wa bara beegiirue ûgu Njoana augire, bakwona Yiesû bamûthingata.

⁴¹Ûntû bwa mbere bûra Enderea aarûthire, n'acûire mûruagina Simioni amwîra, “Itwonire *Mesia.” (‘Mesia’ tûgîtaûra i ta kuuga ‘Kîrîstû’ na Kîîngiriki.)

⁴²Enderea aira mûruagina, Simioni, kîrî Yiesû. Yiesû akwona Simioni, amûcûûba kii amwîra, “Woû ûrî Simioni mwana wa Njona, îndî îîndî ûgeetagwa Kebas.” (‘Kebas’ i bûmwe na ‘Petûrû’ na Kîîngiriki.)[2]

⁴³Rûûni rwa ntugû înu, Yiesû aabanga kûthi Gariiri. Akûthi eethîra muntû eetagwa Piripû noogo. Amwîra, “Nthingata!”

⁴⁴Piripû aarî wa kuuma kûmwe na Enderea na Petûrû. Baarî ba kuuma taûni yeetagwa Bethisainda.

⁴⁵Piripû aacûa Nathanieri. Akûmwona amwîra, “Tûkwona ûra Musa aandîkire mantû maake îbukuuni rîa *watho, ûra iroria biaandîkire mantû maake. N'we i Yiesû mwana wa Njosebu, kuuma Nasareethi.”

⁴⁶Nathanieri aûria Piripû, “Î Nasareethi! Kûrî gîntû kîega kiuma Nasareethi?” Piripû amwîra, “Tancû wone.”

⁴⁷Yiesû akwona Nathanieri aayîîte, auga, “Na mma, ûyû n'we Mwisiraeri ûra ataaragia ûrongo.”

⁴⁸Nathanieri amûûria, “N'ata wamenyanga?” Yiesû amwîra, “Wana kinya mbere ya Piripû agwîta, ingûkwene ûkari nthî ara ûgûkari rungu rwa mûkûyû.”

⁴⁹Nathanieri amwîra, “Rabai, woû ûrî Mwana wa Ngai na i woû Mûnene wa Isiraeri!”

⁵⁰Yiesû amûûria, “Ûrîîtîgia n'ûntû bwa gûkwîra inkwonire ûkari rungu rwa mûkûyû? Ûkoona manene nkûrûki ya ûgu.”

⁵¹Yiesû abeera, “Na mma ga nkûbwîra, bûkoona îgûrû rîarugûka, na araîka ba Ngai bakîîndamaga na bagîîtagîîria gûkûrûkîîra kîrî Mwana wa Muntû.”