Read tharaka NJOANA 10 Bible Online

NJOANA 10 - tharaka bible

NJOANA 10

¹Yiesû abeera, “Na mma ga nkûbwîra, ûra atathûngagîra kiugûûni kîa ng'ondu na mwîrîga, îndî nwanga akauna rwinci, ûyu i mwamba na i mûtunyani.

²Îndî ûra we athûngagîra na mwîrîga, ûyu n'we mûrîîthi mwene wa cio.

³Mûraaria wa ng'ondu arugûragîra mûrîîthi mwene cio mwîrîga, ng'ondu ciegua kayû ka mûrîîthi mwene cio agîciîta mariîtwa, ikauma agaitongoreeria.

⁴Ng'ondu ciake ciauma imûthingataga aitongoreereetie n'ûntû iciiyî kayû gaake.

⁵Itienda kûthingata mûgeni, nimûtoorookaga n'ûntû itiyî kayû gaake.”

⁶Yiesû akweyana ngerekano înu, antû bataaciûra bamenya bûra eendaga kûbeera.

⁷Yiesû abeera kaîrî, “Na mma ga nkûbwîra, i niû mwîrîga wa ng'ondu.

⁸Bara bonthe baayire mbere, n'aamba na n'atunyani. Ng'ondu itaatindanîra na bo.

⁹I niû mwîrîga. Ûra agaakûrûkaga naani akoonokua. Agaakûrûkaga na auma akoona ndîîthia.

¹⁰Mwamba atiiyaga n'ûntû bwa kîîngî. Aayaga kwiya, kûûraga na kwînyangia. Niû mbûyîîte kaingo ng'ondu ciona mwoyo wa mma, mwoyo wa kûgana na wakûrûkîîria.

¹¹“I niû mûrîîthi ûmwega. Mûrîîthi ûmwega n'ûra arutaga mwoyo wake n'ûntû bwa ng'ondu ciake.

¹²Mûrîîthi wa kwandîkwa, n'ûntû i kwandîkwa aandîkîîtwe oonaga ngo îîyîîte akaugia, agatiga ng'ondu irî cionka n'ûntû ti ciake. Augia, ngo îkaaya îkagwata ng'ondu îgatûma ira ingî inyagaara.

¹³Mwandîkwa augagia n'ûntû we ikwandîkwa aandîkîîtwe, atiruta mwoyo wake n'ûntû bwa ng'ondu.

¹⁴“I niû mûrîîthi ûmwega. Na wata bûra Baaba ambiyî na naani mmwiyî, nwa ta bu mbiyî ng'ondu ciakwa na ng'ondu ciakwa na cio nimbiyî. Ndî oogo nduta mwoyo wakwa n'ûntû bwa cio.

¹⁶Ng'ondu ciakwa imwe itirî kiugûûni gîkî. Nwa mwanka ncireete kinya cio n'ûntû ikeegua kayû gaakwa, ituîke cia ûrîîthi bûmwe, ûrîîthi bwa mûrîîthi ûmwe.

¹⁷“Kîra Baaba ambenderete, i kwîgua indîîthuuranîrîte kûrutwa mwoyo kaingo ncookerua uu kaîrî.

¹⁸Gûtirî we agûntunya uu, i niû nkwenda ningwa. Ndî na watho bwa kuunenkanîra na nkauthûkia kaîrî. I Baaba aambîrîîte ndûthe ûgu.”

¹⁹Yiesû akuuga ûgu Ayaundi baagîa na mwathûkano kaîrî.

²⁰Baingî baao baugaga, “I nkoma arî na cio. I nkoma ino. Nwa kî bûkûthikîîria?”

²¹Îndî kûrî bo baugaga, “Muntû wa nkoma atiaria mantû ta mama! N'ata nkoma yûmba gûtûma ntûngi itua kwona?”

²²Kwarî kagiita ga kîatho gîa kûririkana kûthaarimithua kwa nyomba ya Ngai,[12] Njerusaremu, na kaarî kagiita ga mpîo.

²³Yiesû akîangaangaga rwembeani rwa nyomba ya Ngai rûra rweetagwa rwa Soromoni,

²⁴Ayaundi bamwîthîranîra bamûûria, “I mwanka rî ûgaatwaiga ûtagûtwîra kana i woû Kîrîstû? Twîre ûmma bungwa.”

²⁵Yiesû abeera, “Anga ntaabwîrire tika bwaregire kûmbîtîgia? Ngûgî ira niû ndutaga riîtwaani rîa Baaba i cio ûkûûyî bwakwa.

²⁶Îndî naabi bûtiîtîgagia n'ûntû bûtirî ba ng'ondu ciakwa.

²⁷Ng'ondu ciakwa iciathîkagîra kayû gaakwa. Inciiyî na ninthingataga.

²⁸Mpeyaga ng'ondu ciakwa mwoyo wa tene na tene. Kwoogu, cio itikooro ikua. Gûtirî we antunya cio kuuma njaraani ciakwa.

²⁹Baaba ûra ampete cio n'we mûnene kîrî bonthe. Na kwoogu, gûtirî we aciiya irî ûkariani bwa Baaba.

³⁰Niû na Baaba tûrî gîntû kîmwe.”

³¹Antû baarûma maiga kaîrî bakîendaga kûmûringanga na mo bamûûraga.

³²Yiesû abeera, “Imbwoneetie mantû maingî meega kuuma kîrî Baaba. I bûrîkû kîrî mo bûgûtûma bwenda kûndinganga na maiga bûmbûraga?”

³³Bamwîra, “Tûtikwenda gûkûûraga na maiga n'ûntû bwa ûntû bwa mantû meega mara watwonia. Tûrîenda gûkûûraga na mo n'ûntû bwa kûgwetanîria Ngai na mantû maathûûku. Ûrîenda gûtwonia ûrî Ngai, na woû ûrî muntû tu.”

³⁴Yiesû abeera, “Anga îbukuuni rîenu rîa *watho gûtiandîkîîtwe, ‘Ndaugire biû bûrî ngai?’

³⁵Kwoogu, bara Ngai eere kiugo gîake aabeetire ‘ngai’. Ûgu n'ûmma n'ûntû *Maandîko Maatheru i ma mma.

³⁶Aabu n'ata îîndî bûûmba kuuga ûra Baaba athuurîîte aatûma nthîgûrû nakûruma Ngai, n'ûntû bwa kuuga we i Mwana wa Ngai?

³⁷Bûtikaambîtîgieni weegua ntikûruta ngûgî cia Baaba.

³⁸Îndî ûkeegua inkwiruta, wana weegua bûtikûmbîtîgia niû, ciîtîgieni îrî cio kaingo bûmenya na bwîtîgia atî Baaba arî ndeni yakwa na naani ndî ndeni yake.”

³⁹Antû bagûcûûgia kûgwata Yiesû ta rîra rîngî, Yiesû aûra.

⁴⁰Yiesû aacooka bwa rûgongo rûra rûngî rwa muuro wa Njorondani, naara Njoana Mûbaatithania aambîîrîe kûbaatithanîria îgiita rîa mbere, aakara noogo.

⁴¹Antû baingî baathi kîrî we. Beeranaga, “Njoana ataaringa kîama, îndî bûra bunthe augaga îgûrû rîa Yiesû n'ûmma.”

⁴²Antû baingî agu beetîgia Yiesû.