Read tharaka NJOANA 11 Bible Online

NJOANA 11 - tharaka bible

NJOANA 11

¹Ikwarî na muntû aayîîtue eetagwa Racaarû. Racaarû naarî na aaragina beetagwa Maria na Mariitha. Baatûûraga gataûni geetagwa Bethania. (

²Maria ûyû mûruagina Racaarû aayîîtue n'we ûra eetûûrîîrie Mwathani maguta ma mîtaa mbayo, amagiria na ntundu ciake.)

³Maria na Mariitha baatûmana Yiesû eetwa. Bauga itû neerwe mûcoore wake n'ûmwayie.

⁴Yiesû akwîrwa ûgu auga, “Aayîîtue kaingo Ngai akumua na kaingo mwago wa Mwana wa Ngai wonekana bûra ûgana, na t'ûntû bwa gîkuû.”

⁵Yiesû neendeete Mariitha, Maria na mûruagina Racaarû.

⁶Îndî amwe na ûgu, wana akwîgua ntûmwa atî Racaarû naarî ûmwayie, aakarire naagu aarî ntugû cingî ciîrî.

⁷Nyuma ya ntugû inu ciîrî i rîo eerire arutwa baake, “Tûcookeeni bwa Njundea.”

⁸Arutwa baake bamwîra, “Mwarimû, anga ti weendî antû bareendaga gûkûringangîra na maiga noogo bakûûraga? I noogo ûkwenda gûcooka kaîrî?”

⁹Yiesû abeera, “Mûthenya n'wa mathaa îkûmi na maîrî. Ti bu? Kwoogu muntû nwa athi kûrî mûthenya kûthararîîte na atitaratara n'ûntû nwîgagua kûrî na kîra kîmûmûrîkîrîte.

¹⁰Îndî muntû akathi ûtugû nataratara n'ûntû atiîgagua arî na werû.”

¹¹Yiesû aacooka eera arutwa baake, “Mûcoore wetû Racaarû namaami, îndî inkûthi mmûûkie.”

¹²Arutwa bamwîra, “Weegua namaami, gûtirî thîîna, Mwathani.”

¹³Yiesû eendaga kwîra arutwa baake Racaarû n'ûmûkuû, îndî arutwa baataûkiirwe Racaarû naamaami eethikîîrîîtie.

¹⁴Kwoogu Yiesû atakûbaitha, abeera, “Racaarû narakuire.

¹⁵Na n'ûntû bwenu kaaba ntiraarî noogo kaingo bûkaambîtîgia. Ta tûthiini noogo!”

¹⁶Tooma (ûra kaîrî eetagwa Ndindimas), eera arutwa bara bangî, “Tûthiini na tiû tûkaûraganîrue amwe n'we.”

¹⁷Rîra Yiesû aakinyire, eethîîre mwîrî wa Racaarû ûthirîîtie ntugû inya nthikooni.

¹⁸Kuuma Bethania kûthi Njerusaremu gûtigîkinya mairi ciîrî.

¹⁹Na kwoogu Ayaundi baingî ibaayîîte gûkirakiria Mariitha na Maria n'ûntû bwa gûkuîrwa i mûruagina.

²⁰Mariitha akûmenya Yiesû naarî mûûyi, amûtûngatûngia. Îndî Maria we aatigirwe mûciî.

²¹Mariitha eera Yiesû, “Ûkeegua nwarî oogo, Mwathani, mûruayia atigîkua.

²²Îndî wana îîndî inkûmenya Ngai agakûrûthîra bûra ûkaamûromba akûrûthîra.”

²³Yiesû eera Mariitha, “Mûruanyûkwe akaariûka.”

²⁴Mariitha amwîra, “Imbiyî akaariûka ntugû ya mûthia rîra antû bakaariûkua.”

²⁵Yiesû amwîra, “I niû ndiûkanagia, na i niû mwoyo. Ûra aambîtîgagia, wana aakua agaatûûra mwoyo.

²⁶Muntû wonthe ûra arî na mwoyo n'ûntû bwa kûmbîtîgia atiikua. Nûgwîtîgia ûgu?”

²⁷Mariitha amwîra, “Yîî, Mwathani. Imbîtîgîîtie atî i woû Kîrîstû, Mwana wa Ngai na ûûyîîte gûkû nthîgûrû kûringana na bûra *Maandîko Maatheru maugîîte.”

²⁸Mariitha akwîra Yiesû ûgu, aacooka bwa mûciî eera mwaragina Maria mpoora antû batakûmenya, “Mwarimû arî waaga na nakwenda kwaria naawe.”

²⁹Maria akwîgua ûgu aûkîîra na mpwî aathi naara Yiesû aarî. (

³⁰Yiesû ataarî agûkinya ara ongwa Racaarû baatûîre. Aarî waara aarîîkanire na Mariitha.)

³¹Antû bara baarî na Maria nyomba bara baayîîte kûbakirakiria bakwona aûkîîra na mpwî auma ome, bamûthingata. Baathûgaanagia naathiîte kûrîrîra nthikooni.

³²Rîra Maria aakinyire ara Yiesû aarî, akûmwona eeturania nthî magûrûûni maake amwîra, “Ûkeegua nwarî oogo, Mwathani, mûruayia atigîkua!”

³³Yiesû akwona bûra Maria na bûra bara baarî n'we baarîraga bûgana, aaringithua mûno na eegua agîtangîka nkorooni.

³⁴Aûria, “I kû bûmwaigîîte?” Bamwîra, “Ncû wone, Mwathani.”

³⁵Yiesû aarîra.

³⁶Antû baanjîîria kwîrana, “Nûkwona bûra aramwendeete bûgana!”

³⁷Antû bamwe baûrania, “Weegua naatûmire ntûngi îra îtua kwona rî, i mbi îndî îragiriirie agiria Racaarû akua?”

³⁸Yiesû aathi nthikooni akîîgagua ûrito nkorooni. Nthiko yarî îkurungu rîakunîkîrîtwe na iiga rîînene.[13]

³⁹Yiesû auga, “Rutaani iiga oogo.” Mariitha, mwaragina wa ûyu aakuîte, eera Yiesû, “Mwanka îîndî nakûnunka, Mwathani, n'ûntû i kiimba gîa ntugû inya!”

⁴⁰Yiesû amwîra, “Ntaakwîrire weetîgia ûkoona mwago wa Ngai?”

⁴¹Baarutaruta iiga oogo. Yiesû aaraitha îgûrû auga, “Baaba, ingûgûcookeria nkaatho n'ûntû bwa kûmbîgua.

⁴²Imbiyî nûmbîgagua rîonthe. Îndî ndauga ûgu ndauga n'ûntû bwa antû baba barî aaga, kaingo beetîgia i woû ûntûmîîte.”

⁴³Yiesû akuuga ûgu, aagondoka na inya îra nene auga, “Uma, Racaarû!”

⁴⁴Racaarû auma arî mwoge na mîtaame njara na magûrû, na gîtambaa ûthiû. Yiesû auga, “Mûtharieni bûmûrekeerie athi.”

⁴⁵Antû baingî ba bara baayîîte kwa ba Maria, bakwona bûra Yiesû aarûthire, bamwîtîgia.

⁴⁶Îndî kûrî bamwe bo baathiire beera *Abarisai bûra Yiesû aarûthire.

⁴⁷*Athînjîri bara banene ba Ngai na Abarisai baarûtha mûceemanio wa kîama. Baûrania, “N'ata tûkûrûtha? Muntû ûyû nakûringa biama biingî mûno.

⁴⁸Tûkamûrekeeria, antû bonthe ibakaamwîtîgia, Arooma beenyangie bantû aaga eetû na mûgongo ûyû wetû!”

⁴⁹Ûmwe wao eetagwa Kayabas, ûra mwanka ûyu aarî mûthînjîri ûra mûnene wa Ngai, auga, “Biû gûtirî bu bûkûmenya!

⁵⁰Ka bûtakwona bûrî kaaba muntû ûmwe akuîrîîte antû, bantû a mûgongo unthe ûthirîîtue?”

⁵¹Îndî Kayabas akiuga ûgu ataaciûkagîrwa i bûra akuuga. Îndî n'ûntû bwa bûra aarî mûthînjîri ûra mûnene wa Ngai mwanka ûyu, naaroragia akoona Yiesû agaakua n'ûntû bwa mûgongo wa Ayaundi.

⁵²Na aaroragia akoona t'ûntû bwa antû ba Njundea bonka, îndî i kaingo kinya acookanîria amwe aana ba Ngai bara banyageere.

⁵³Kuuma ntugû înu, atongoria ba Ayaundi baabanga kûûraga Yiesû.

⁵⁴Kwoogu Yiesû ataariûnga Njundea antû bakîmwonaga kaîrî. Aumire naagu aathi gûntû kûngî akubî na rwanda, bantû kwarî na taûni yeetagwa Eburaîmu, aakara noogo na arutwa baake.

⁵⁵Kagiita ga kîatho gîa *Pasaka ikaarî akubî. Na kwoogu antû baingî kuuma nteere cionthe ibaathiîte Njerusaremu, kaingo beetheria mbere ya Pasaka yanjîîria.

⁵⁶Antû ibaacûaga Yiesû. Bakûrîîkana nyomba ya Ngai baûranagia, “Bûrîona ata? Ibûkwona taka akaaya kîathooni?”

⁵⁷Athînjîri bara banene ba Ngai na *Abarisai ibaarutîîte watho bauga, muntû ûra akaamenya ara Yiesû aarî, nwa mwanka abamenyithie kaingo bamûgwata.