Read tharaka NJOANA 13 Bible Online

NJOANA 13 - tharaka bible

NJOANA 13

¹Kîatho gîa *Pasaka kîrî akubî gûkinya, Yiesû naiyî îgiita rîake irîarî rîgûkinya rîa kuuma nthîgûrû îno, athi kîrî Îthe. Rîonthe neendeete bara baarî baake gûkû nthîgûrû, na naabooniirie bûra aabeendeete bûgana.

²Yiesû na arutwa baake ibaarîyaga irio bia ûgoro. Nkoma nîarî îgwîkîra Njundas wa Simioni Mûcikariota îthûgaania rîa gûkunyanîra Yiesû.

³Yiesû naiyî Îthe namwete wathani bunthe. Naiyî aumîîte kîrî Ngai na aacookeete wakîrî we.

⁴Yiesû aûka ara baarîyagîra. Aaruta nguo îra ndaaya, aathûkia taurû ooga kauna.

⁵Eekîra rûûyî karaîni, aanjîîria kûthambia arutwa baake mbayo akîbagiragia na taurû.

⁶Agûkinyîîra Simioni Petûrû, Simioni amûûria, “Mwathani, woû ûnthambie mbayo?”

⁷Yiesû amwîra, “Îîndî ûtikûmenya bûra nkûrûtha, îndî ûkaamenya nyumaani.”

⁸Petûrû eera Yiesû, “Gûtirî rîo ûkanthambia mbayo, rî kana rî!” Yiesû amwîra, “Gûgatuîka ntikûthambia, ûtirî na ngwatanîro naani.”

⁹Simioni Petûrû i rîo eerire Yiesû, “Mwathani, wana ti mbayo cionka, nthambia kinya njara na kîongo kîene!”

¹⁰Yiesû auga, “Gûtirî gîtûmi kîa muntû eerîîtie acooka kwîria kaîrî n'ûntû n'ûmûtheru kunthe, twanga akathamba mbayo cionka. Bwinthe bûrî baatheru, tatiga ûmwe akî.” (

¹¹Yiesû naiyî ûra akaamûkunyanîra. I ntûma augire, “Bwinthe bûrî baatheru, tatiga ûmwe akî.”)

¹²Yiesû akûrîîkia kûthambia arutwa baake mbayo eekîra nguo îra ndaaya kaîrî. Aacooka ara aakari. Aûria arutwa baake, “Anga bûkûmenya bûra ndabûrûtha i ta kwonania ata?

¹³Biû bûmbîtaga Mwarimû kana Mwathani, na ûtiîgagua bûkîbîtia n'ûntû ndî we.

¹⁴Kwoogu ûkaaya kwîgua niû ndî Mwathani na Mwarimû wenu inkûbûthambia mbayo, wana biû ibûbatîîrue bûthambanagia mbayo.

¹⁵I ngerekano ndabwonia, kaingo naabi bûrûthanîra ûgu ndabûrûtha.

¹⁶“Na mma ga nkûbwîra, nkombo t'yo nene kîrî ûra amîandîkîîte. Na mûtûmwa t'we mûnene kîrî ûra amûtûmîîte.

¹⁷N'ata bwîgua bûrî bathaarime bûgana ûkaaya kwîgua bûkaarûthaga ûgu ndabûrutana!

¹⁸“Îndî ntikwarîîria îgûrû rîenu bwinthe. Imbiyî bara nthuurîîte. Na nwa mwanka ûroria bûra bûrî *Maandîkooni Maatheru bûûyûre, bûra buugîîte, ‘Ûra twarîyanîîre irio amwe n'we naangarûkire.’

¹⁹“Ndîbwîra îîndî mbere ya mantû marûthwa, kaingo rîra makaarûthwa bûgeetîgia i niû we.

²⁰Na mma ga nkûbwîra, ûra eetîgagîra mûtûmwa wakwa, i niû eetîgagîra. Na ûra aambîtîgagîra, n'ûra aantûmire eetîgagîra.”

²¹Yiesû akûrîîkia kuuga ûgu, aatua kwîgua agîtangîka mûno nkorooni yake. Auga atakwitha, “Na mma ga nkûbwîra, ûmwe wenu agaankunyanîra.”

²²Arutwa baanjîîria kûraithana barigarîîte, batakûmenya n'ûû we waciao aarî arûthe ûgu.

²³Ûmwe wa arutwa, ûra Yiesû eendeete mûno naakari akubî na Yiesû.

²⁴Simioni Petûrû amûûnya, amwîra, “Tamûûrie n'ûû.”

²⁵Mûrutwa ûyu aathiyathiyanga akubî na Yiesû. Amûûria, “N'ûû we, Mwathani?”

²⁶Yiesû auga, “N'ûra nkaanenkera kîng'enyua kîa mûgaate ndagîtombeka mbakûriini.” Aatombeka kîngenyua kîa mûgaate mbakûriini, aanenkera Njundas wa Simioni Mûcikariota.

²⁷Njundas akwewa kîng'enyua gîku, Saitaani aathûngîra nkorooni yake. Yiesû amwîra, “Rûtha bûra ûbatîîrue ûrûtha na mpwî.”

²⁸Gûtirî we kîrî bara baarî agu baarîyagîra aamenya gîtûmi kîa Yiesû kûmwîra ûgu.

²⁹Na n'ûntû Njundas n'we aarî mwaigi wa kîondo kîra beekagîra mbia, bamwe ba arutwa baathûgaaniirie Yiesû naamwîrîîte athi agûre bira biendekanaga n'ûntû bwa kîatho, kana akae nkîa ûteethio.

³⁰Njundas akwewa kîng'enyua gîku aûka warîo, auma aathi. Kwarî ûtugû.

³¹Njundas akûthi, Yiesû auga, “Îîndî mwago wa Mwana wa Muntû nwengeerie kwonekana. Na kuumania na uu, mwago wa Ngai wana uu ûkoonekana.

³²Na mwago wa Ngai wonekana, Ngai akoonania mwago wa Mwana wa Muntû gûkûrûkîîra kîrî we. Na aakara kûrûtha ûgu, akaarûtha ûgu warîmwe.”

³³“Aana baakwa, gatigeere kagiita gaakai ga kwîgua ndî amwe naabi. Na ndabûtiga bûgancûa. Na ka mbwîreeni bûra ndeerire atongoria ba Ayaundi. Ndabeerire, ‘Biû bûtiûmba kûthi ara nthiîte.’

³⁴“Na îîndî inkûbwaa yathana rîngî rîîyerû. Na rîo i rîrî: endanagaani. Endanagaani ta bûra naani mbwendeete.

³⁵Weegua bûkeendanaga, gûtirî we atakîmenya bûrî arutwa baakwa.”

³⁶Simioni Petûrû aûria Yiesû, “I kû ûthiîte, Mwathani?” Yiesû amûcookeria amwîra, “Kûra nthiîte woû ûtiûmba kûnthingata îîndî, îndî nyumaani ûkaanthingata.”

³⁷Petûrû amûûria, “I mbi n'ûntû ntaûmba gûkûthingata îîndî, Mwathani? Na ûkeegua inkûûragwa nwa mbûragwe n'ûntû bwaku.”

³⁸Yiesû amûûria, “Nûkwîbîtîgia wabu nwa wîrute ûkaûragwa n'ûntû bwakwa? Na mma ga ngûkwîra, mbere ya ngûkû îkurura, ûgaankaana maita mathatû.”