Read tharaka NJOANA 14 Bible Online

NJOANA 14 - tharaka bible

NJOANA 14

¹Yiesû eera arutwa baake, “Bûtikaanyamaare nkoro. Îtîgiani Ngai na niû mbîtîgiani.[14]

²Kwa Baaba kûrî na ikaro biingî. I bio nthiîte kûbûthuuranîra. Ûkeegua t'ûmma ntibwîra ûgu.

³Ndathi ndabûthuuranîra ikaro, ngaacooka mbûthûkie bûûye kîrî niû, kaingo ara ûkeegagua niû ndî wîgagua noogo biû bûrî.

⁴Njîra ya naara nthiîte ibûmiiyî.”

⁵Tooma, ûmwe wa arutwa baake, amwîra, “N'ata tûûmba kûmenya njîra na tûtiiyî naara ûthiîte, Mwathani?”

⁶Yiesû auga, “I niû njîra, ûmma na mwoyo. Gûtirî we athiyaga kîrî Baaba atakûrûkîîrîte kîrî niû.

⁷Woona bûmbiyî, wana Baaba bûkamûmenya.[15] Na kuuma îîndî ûûgû, bûkûmûmenya na bwamwona.”

⁸Piripû amwîra, “Twonie Abaagu na tûkaaganîrwa, Mwathani.”

⁹Yiesû amwîra, “Piripû, kuuma îgiita rîru rîonthe ndakarania naabi, ûtiyî ndî ûû? Muntû arambona aroona Baaba. N'ata îîndî ûkuuganga mbwonie Baaba?

¹⁰Nûtagwîtîgia ndî ndeni ya Baaba, na Baaba arî ndeni yakwa? Mîgambo yonthe îra mbwaragîria ntiaragia yo na bwakwa. I Baaba ûra arî ndeni yakwa n'we arutaga ngûgî yake.

¹¹Îtîgiani ndabwîra ndî ndeni ya Baaba, na Baaba arî ndeni yakwa. Î kana rî, bwîtîgie n'ûntû bwa mantû mara ndûthaga.

¹²Na mma ga nkûbwîra, ûra akaambîtîgia akaarûtha mantû ta mara ndûthaga. Naka mantû mara akaarûtha i mo ûkeegua marî manene nkûrûki ya maakwa, n'ûntû nthiîte kîrî Baaba.

¹³Na ûntû kinya bûrîkû bûra bûkaaromba na riîtwa rîakwa, nkabûrûthîra, i kaingo ntûma Baaba akumua.

¹⁴Bunthe bûra bûkaaromba na riîtwa rîakwa nkabûrûthîra bu.”

¹⁵Yiesû abeera, “Weegua ibûmbendeete bûkaathîkîra maathana maakwa.

¹⁶Naani nkaûria Baaba, na Baaba akabûtûmîra ûngî arî Mûteetheeria wenu ûra agaakaraga naabi tene na tene.

¹⁷N'we i Kîrundu ûra oonanagia ûmma. Antû ba nthîgûrû îno batimwîtîgîra, n'ûntû batimwonaga na batimwiyî. Îndî biû ibûkûmûmenya n'ûntû atûûranagia naabi arî ndeni yenu.

¹⁸Ntibûtiga ta twana tûkîa, ngacooka kîrî biû.

¹⁹Îîndî gatigeere kagiita gaakai, na bara barî ba nthîgûrû batimbona kaîrî, îndî biû bûkambona. Na n'ûntû niû ntûûraga mwoyo, wana biû bûgaatûûra mwoyo.

²⁰Na îgiita rîru rîakinya, bûkaamenya ndî ndeni ya Baaba, na biû naabi bûrî ndeni yakwa, na naani ndî ndeni yenu.

²¹“Muntû ûra eetîgagîra maathana maakwa na akamaathîkîra, ûyu n'we ambendeete. Na ûra ambendeete akeendwa i Baaba. Na niû naani nkamwenda na ndîîbonanie kîrî we.”

²²Njundas (îndî ti Njundas Mûcikariota), aûria Yiesû, “Mwathani, i kî n'ûntû ûkeebonania kîrî tiû na ti kîrî antû bonthe?”

²³Yiesû amûcookeria amwîra, “Muntû ûra akaambenda, akaathîkîra kiugo gîakwa na Baaba akamwenda. Na tûrî na Baaba tûkaaya kîrî muntû ûyu tûkarage n'we.

²⁴Muntû ûra atambendeete atiathîkagîra biugo biakwa. Kiugo kîra bwîgagua nkiuga ti gîakwa, kiumaga kîrî Baaba ûra aantûmire.”

²⁵“Ndabwîra mantû mama îîndî tûrî amwe.

²⁶Kîrundu Ûmûtheru, Mûteetheeria wenu, ûra Baaba agaatûma na riîtwa rîakwa akabûrutana mantû monthe na abûririkanie mara monthe ndabûrutanire.”

²⁷“Tigwaani na ûkiri. Ndîbûtigîra ûkiri bwakwa bûra ndî, bûra bûtakari ta bûra bara barî ba nthîgûrû batiganagîra. Bûtikaanyamaare nkoro kana bûguaya.

²⁸Ibwîgîîtue nkîbwîra, ‘Inthiîte, îndî ngaacooka kîrî biû kaîrî.’ Ûkeegua bûmbendeete ibûkena n'ûntû bwa kwîgua nthiîte kîrî Baaba, na Baaba n'we mûnene nkûrûki yakwa

²⁹Ndabwîra mantû mama îîndî mbere ya matuîkîka, kaingo rîra magaatuîkîka bûgeetîgia.

³⁰Ntiaria naabi rwaria rûraaya mûno, n'ûntû ûra aathaga nthîgûrû îno arî akubî kûûya. Atimbûmba,

³¹îndî nwa mwanka antû ba nthîgûrû bonthe bamenye atî, imbendeete Baaba na i ntûma ndûthaga bûra bunthe aambîîrîîte ndûthe. “Ncûûni tûthiini tuume aaga.”