Read tharaka NJOANA 16 Bible Online

NJOANA 16 - tharaka bible

NJOANA 16

¹Yiesû aathi na mbere na kwaria na arutwa baake. Abeera, “Ndabwîra mantû mamu kaingo bûtataratara wîtîgioni.

²Bûkeengatua n'Ayaundi babwîre bûtigaakinye *masinagoogiini maao. Na kagiita gagaakinya gûtuîke muntû wonthe ûra akaabûûraga akaathûgaania i Ngai agûtûmîkîra.

³Bakaabûrûtha ûgu n'ûntû batiiyî Baaba na batimbiyî.

⁴Ndabwîra mantû mama kaingo rîra kagiita gagaakinya bûkaaririkana indabwîrire.” Yiesû auga, “Ntaabwîra mantû mama naara mwanjîîrioni n'ûntû tûraarî amwe.

⁵Îndî îîndî inthiîte kîrî ûra aantûmire na gûtirî wacienu akûmbûûria bûra ndathi.

⁶Na n'ûntû nkûbwîra ûgu, nkoro cienu îîndî i ciûyûri kîeba.

⁷Îndî na mma ga nkûbwîra, i kaaba nkathi n'ûntû bwenu. Nkarega kûthi Mûteetheeria atiiya. Îndî nkathi, ndamûtûma kîrî biû.

⁸Rîra akaaya akoonia antû wîyia bwao. Akaboonia ibaagîrîtwe beegua barî baagîru na akaboonia mûthûûro wa Ngai ûrî kîrî kîrîndî kîa nthîgûrû.

⁹Akaboonia beeyagia n'ûntû batimbîtîgîîtie.

¹⁰Akaboonia ibaagîrîtwe beegua barî baagîru n'ûntû inthiîte kîrî Baaba na bûtiimbona kaîrî.

¹¹Akaboonia mûthûûro wa Ngai ûrî kîrî kîrîndî kîa nthîgûrû n'ûntû ûra aathaga nthîgûrû îno n'ûmûgiitîre îgamba.

¹²“Ndî na mangî maingî ma kûbwîra. Nkabwîra mo îîndî bûtimaûmbanîria.

¹³Îndî rîra Kîrundu ûra oonanagia ûmma akaaya, agaatûma bûmenya ûmma bunthe. Kîrundu atiaragia mantû maake na bwake, arî we. Mara akeegagua nwa mo monka akaabwîraga. Na akabwîra mantû mara magaatuîkîka îgiita rîkaaya.

¹⁴Agaatûma mwago wakwa wonekana, n'ûntû mantû mara akaabwîraga ûkeegua maumanîîtie naani.

¹⁵Kîonthe kîra Baaba arî na kîo i gîakwa. Na i kîo n'ûntû ndauga Kîrundu akabwîra mantû mara akeegagua kuumania naani.”

¹⁶Yiesû abeera, “Nyuma ya kagiita gaakai kuuma îîndî bûgaatiga kûmbona. Îndî nyuma ya kagiita kaganoona, bûkaambona kaîrî.”

¹⁷Arutwa baake bakwîgua ûgu baanjîîria kûûrania, “N'ata akwenda gûtwîra rîra akuuga nyuma ya kagiita gaakai kuuma îîndî tûgaatiga kûmwona, îndî nyuma ya kagiita kaganoona tûkamwona kaîrî? Na agîtwîra ariuga i kwa Îthe athiîte!

¹⁸Na n'ata akwenda kwonania rîra akuuga ‘Kagiita gaakai?’ Tûtikûmenya bûra akwenda kuuga.”

¹⁹Yiesû aamenya arutwa baake ibeendaga kûmûûria bûra eendaga kuuga. Abaûria, “Ka bûkûûrania ûgu ndauga i ta kuuga ata, rîra ndauga, ‘Nyuma ya kagiita gaakai kuuma îîndî bûgaatiga kûmbona, îndî nyuma ya kagiita kaganoona bûkaambona kaîrî?’

²⁰Na mma ga nkûbwîra, bûkaarîra bûminûke, îndî kîrîndî gîgaakena. Biû bûkaagwatwa i kîeba, îndî nyumaani bûgaakena.

²¹Rîra mûka arî akubî kûgîa na mwana, neegagua agwetwe i kîeba n'ûntû kagiita gake ga kûnyamaara gagûkinya. Îndî rîra mwana aaciarwa nariganagîrua i kûnyamaara kûra eegagûa anyamaarîîte, n'ûntû bwa gîkeno gîa kûreeta muntû nthîgûrû.

²²Ûgu i ta bu bûkari. Îîndî biû bûrî na kîeba, îndî nkabwona kaîrî bûkene mûno, na gûtirî muntû agaatûma gîkeno gîku kîenu kîthira.

²³Na ntugû înu yakinya gûtirî ûntû bûkaambûûria. Na mma ga nkûbwîra, Baaba akabûrûthîra bûra bunthe bûkaamûûria kwa riîtwa rîakwa.

²⁴Mwanka îîndî gûtirî bu bwamûûria kwa riîtwa rîakwa. Ûriani na bûkaarûthîrwa bûra bûkwenda, kaingo bûkena mûno.

²⁵“Ndarabwîraga mantû mama ngîtûmagîra ngerekano. Îndî kagiita kaayîîte ntibwîra mo ngîtûmagîra ngerekano. Nkaabumbûragîra mantû ma Baaba ntakûbwitha.

²⁶Na kagiita gaku gaakinya bûkaarombaga kwa riîtwa rîakwa. Ti niû nkaabûûrîria.

²⁷Baaba arî we nabwendeete. Na abwendeete n'ûntû bwa kwîgua ibûmbendeete na ibwîtîgîîtie mbumîîte kîrî Ngai.

²⁸Ndaumire kîrî Baaba ndaaya nthîgûrû, na îîndî inkuuma nthîgûrû ncooke kîrî Baaba.”

²⁹Arutwa ba Yiesû bamwîra, “Îîndî n'îîndî waria ûkiumbûraga cwe, ûtagûtûmîra ngerekano.

³⁰Îîndî i rîo twamenya gûtirî bu ûtaiyî na gûtirî gîtûmi kîa muntû gûkûûria biûria. Tûgwîtîgia uumîîte kîrî Ngai.”

³¹Yiesû abacookeria abeera, “Atî îîndî bûgwîtîgia?

³²Îndî kagiita i kaayîîte na i ta gaakinyu, keenu biû bwinthe ga kûnyagaarania, woora muntû athi bwa kwao bûntige ninka. Îndî ingî tika ndî ninka. Baaba arî amwe naani.

³³Ndabwîra mantû mama i kaingo bwîgua bûrî na ûkiri, n'ûntû bûrî na ngwatanîro naani. Nthîgûrûûni îno bûkaanyamaarua. Îndî ûmîîriani! Indakîriirie mantû ma nthîgûrû inya!”