Read tharaka NJOANA 17 Bible Online

NJOANA 17 - tharaka bible

NJOANA 17

¹Yiesû akûrîîkia kuuga mamu monthe, aacûûba îgûrû. Auga, “Baaba, kagiita gagûkinya. Îtûma mwago wa Mwana waku wonekane, kaingo Mwana n'we atûma mwago waku wonekana,

²n'ûntû nwamwere watho îgûrû rîa bonthe kaingo atûma bara bonthe wamwere batûûra mwoyo wa tene na tene.

³Na i kaingo muntû atûûra mwoyo wa tene na tene, nwa mwanka akûmenye, woû Ngai ûra ûrî wa mma wenka. Na nwa mwanka muntû amenye Yiesû Kîrîstû ûra watûmire.

⁴Niû ingûtîîyîîte ndî gûkû nthîgûrû na inthirîîtie ngûgî îra wampeere nduta.

⁵Na kwoogu îîndî, Baaba, ntîîya ta bûra wantîîyîîte mbere ya ûûmba nthîgûrû.

⁶“Intûmîîte antû baba bakûmenya, bara wanthuurîîre kuuma kîrî kîrîndî kîa nthîgûrû wampa bo. Baarî baaku wampa, na ibathingataga kiugo gîaku.

⁷Na îîndî ibamenyeete kîonthe kîra ûmpete kiumîîte kîrî woû.

⁸Indabeerire ntûmwa yaku îra wantûmire n'yo kîrî bo, na ibamîîtîgîrîte. Ibaiyî n'ûûma mbumîîte kîrî woû, na i beetîgîîtie i woû wantûmire.

⁹“Ntikûrombera kîrîndî kîra kîngî kîa nthîgûrû, bara wampeere i bo nkûrombera n'ûntû i bo baaku.

¹⁰Kîonthe kîra ndî na kîo i gîaku, na kîonthe kîra ûrî na kîo i gîakwa. Bara wampeere ibantîîyaga.

¹¹Îîndî ntirî nthîgûrû kaîrî, mbûyîîte kîrî woû. Îndî bo bagaatigwa gûkû. Kwoogu, Baaba ûmûtheru, kwa inya ya riîtwa rîaku îra ûmpete bamenyeere kaingo bakaraga barî gîntû kîmwe ta bûra niû na woû tûrî gîntû kîmwe.

¹²Kagiitaani kara nkaranîîtie na bo, ndarabamenyagîîra kwa inya yaku, îra ûmpete. Indarabakaragia bwega na gûtirî nwa ûmwe wao aûra, tatiga ûra aataarîîtwe akaûra na tene, kaingo *Maandîko Maatheru makaûyûra.

¹³“Îîndî mbûyîîte kîrî woû. Ka ndauga ngwete mantû mama ndî gûkû nthîgûrû, kaingo baba baûyûrwa i gîkeno kîra mpeyanaga.

¹⁴Ndabeerire kiugo gîaku antû ba nthîgûrû babamena. Babameneete n'ûntû bo ti ba nthîgûrû îno, ta bûra niû ntarî wa nthîgûrû îno.

¹⁵Tika ngûkûûria kana wabaruta gûkû nthîgûrû. Ka ngûkûûria ûbamenyeere kîrî ûra mûthûûku.

¹⁶Bo ti ba nthîgûrû îno, ta bûra na niû ntarî wa nthîgûrû îno.

¹⁷Tûmîra ûmma kûbatheria batuîke baaku. Biugo biaku i bio ûmma.

¹⁸Mbatûmîîte nthîgûrû wata bûra naawe wantûmire nthîgûrû.

¹⁹Na indîîrutîîte kîrî woû n'ûntû bwao, kaingo kwaûmbîka na bo batherua n'ûmma batuîka antû baaku.

²⁰“Na ti baba bonka nkûrombera. Ndîrombera kinya bara bakaambîtîgia kuumania na ûkûûyî bwao.

²¹Ndîkûromba ûtûma bonthe batuîka gîntû kîmwe. Baaba, ta bûra ûrî ndeni yakwa, na naani ndî ndeni yaku, îngûkûromba ûtûme batuîka gîntû kîmwe ndeni yetû, kaingo antû beetîgia nwantûmire.

²²Imbeete gîtîîyo ta bûra ûmpete gîtîîyo na niû. Ndarûthire ûgu kaingo wîgua barî gîntû kîmwe, ta bûra woû na niû tûrî gîntû kîmwe.

²³Niû ndî ndeni yao na naawe ûrî ndeni yakwa kaingo beegua barî gîntû kîmwe kaingo antû bamenya nwantûmire, na atî nûbeendeete ta bûra ûmbendeete.

²⁴“Baaba, ndîkûromba ûtûma baba ûmpete beegua barî naani ara ûkeegua ndî, kaingo boona mwago ûra mbonaga, mwago ûra wampeere. Wampeere uu n'ûntû wambendire mbere ya ûûmba nthîgûrû.

²⁵Antû batikwiyî îndî niû inkwiyî, woû Baaba ûmwagîru. Na athingati baba baakwa ibaiyî nwantûmire.

²⁶Indakûmenyithaniirie kîrî bo, na nkaathi na mbere gûkûmenyithania kîrî bo, kaingo kwenda kûra ûmbendeete kwîgua kûrî kîrî bo, na kaingo wîgua ndî ndeni yao.”