Read tharaka NJOANA 18 Bible Online

NJOANA 18 - tharaka bible

NJOANA 18

¹Yiesû akûrîîkia kûgweta mantû mamu, aathi na arutwa baake. Baaringa kauro geetagwa Kindironi. Rûgongo rûru rûngî ikwarî na kamûnda. Yiesû na arutwa baake baathi kamûndaani gaku.

²Njundas ûra aarî akaamûkunyanîra naiyî ara kamûnda gaku kaarî, n'ûntû agu mbereeni Yiesû naathiîte na bo noogo kaîrî maita maingî.

³Kwoogu, Njundas aaya oogo na njûûrî ya acikaarî na antû bara eetwe *n'athînjîri bara banene ba Ngai na *Abarisai. Baakamatîîte imonjo, ntandîka, na mîrigo ya mbaara.

⁴Yiesû naiyî bunthe bûra bwathiîte gûkarîka kîrî we. Kwoogu abathagaana abaûria, “N'ûû bûgûcûa?”

⁵Bamûcookeria bamwîra, “I Yiesû wa kuuma Nasareethi.” Yiesû abeera, “I niû we.” (Njundas ûra aathiîte kûmûkunyanîra aarûngi waagu amwe na bo.)

⁶Rîra Yiesû aabeerire, “I niû we,” baacooka na gîteretere baagwa.

⁷Yiesû abaûri kaîrî, “Î n'ûû bûgûcûa?” Bamwîra, “I Yiesû wa kuuma Nasareethi!”

⁸Yiesû abeera, “Anga ntirabwîra i niû we? Kwoogu weegua i niû bûgûcûa, baba ndî na bo ka bathi.”

⁹Yiesû augire ûgu kwingia bûra kwandîkîîtwe atî, “Ntaata nwa ûmwe wa bara wampeere.”

¹⁰Simioni Petûrû naarî na rûyiû. Arucomoora njûraani aagiita mûruti ngûgî wa mûthînjîri ûra mûnene wa Ngai gûtû kwa ûrîo. (Mûruti ngûgî ûyu eetagwa Marikos.)

¹¹Yiesû eera Petûrû, “Cookia rûyiû njûraani. Ka ntabatîîrue nnyua gîkombe gîa kûnyamaarua kîra Baaba ampete nnyua?”

¹²Acikaarî babu barî na mûtongoria wao na aruti ngûgî ba atongoria ba Ayaundi, baagwata Yiesû bamûthaîka njara.

¹³Baamba bamwira kîrî Anas, ûra mwarî wake aagûrîîtwe i Kayabas. Kayabas n'we aarî mûthînjîri ûra mûnene wa Ngai îgiitaani rîru.

¹⁴Kayabas ûyû n'ûra eerîîte anene ba Ayaundi we oonaga i kaaba muntû ûmwe agakua bantû a antû bonthe.

¹⁵Simioni Petûrû na mûrutwa ûngî ûmwe baathingata Yiesû. Mûrutwa ûyu ûngî n'ûntû we naamenyagwa i mûthînjîri ûra mûnene wa Ngai, eetîgîîrua aathûngîra gûku kwa mûthînjîri wa Ngai kûra Yiesû airirwe,

¹⁶Petûrû aatigwa mûrangooni. Mûrutwa ûyu aumagarûka aaria na mwarî ûra aathookagia antû nyomba, eetîgîîria Petûrû aathûngîra.

¹⁷Mwarî ûyu aûria Petûrû, “Anga woû ûtirî ûmwe wa arutwa ba muntû ûyû?” Petûrû amwîra, “Arî, niû ntirî mûrutwa wake!”

¹⁸Nkombo na aruti ngûgî ba mûthînjîri ûyu wa Ngai ibaacereereete riiko bagiotaga mwanki n'ûntû ikwarî na mpîo. Petûrû aathi aarûngama agu baarî wana we oota mwanki.

¹⁹Mûthînjîri ûra mûnene wa Ngai aûria Yiesû biûria îgûrû rîa arutwa baake na ûrutani bwake.

²⁰Yiesû amwîra, “Mbaragia rîonthe antû bonthe bakîîgagua. Na ndutanaga *masinagoogiini na nyomba ya Ngai, kûra Ayaundi barîîkanaga. Gûtirî ûntû ndauga nkiithaga.

²¹Ntikûmenya gîtûmi gîa kûmbûûria biûria. Ûria bara baanthikîîrie nkîaria bakwîre bûra ndabeerire. Ibaiyî mara ndaaria.”

²²Yiesû akuuga ûgu, ûmwe wa aruti ngûgî ûra aarûngi akubî n'we amûringa îkoobi. Amûûria, “I bu ûbatîîrue warîria mûthînjîri wa Ngai ûgu?”

²³Yiesû eera Anas, “Ûkaaya kwîgua kûrî meeyia ndaaria, tagweta mo. Îndî weegua n'ûmma ndaaria, i mbi îîndî nkûringîrwa?”

²⁴I rîo Anas augire Yiesû airwe arî mûthaîke woogû kîrî mûthînjîri ûra mûnene wa Ngai eetagwa Kayabas.

²⁵Petûrû nwa bootaga mwanki ara baarûngî. Bara baarî na bo bamûûria, “Anga ûtirî ûmwe wa arutwa ba muntû ûyû?” Petûrû aakaana auga, “Arî, niû ntirî mûrutwa wake!”

²⁶Mûruti ngûgî ûmwe wa mûthînjîri ûra mûnene wa Ngai, wa bamuntû ûra Petûrû aagiitîîte gûtû, amûûria, “Anga ntikwonire naara kamûndaani kara bûkûrî?”

²⁷Kaîrî Petûrû auga, “Arî!” Na warîo ngûkû yakurura.

²⁸Gûkwereerûka, Yiesû aarutwa gwa Kayabas, airwa kambîîni ya ngabana. Ayaundi bara baamwirîîte bo bataathûngîra kambîîni, n'ûntû bakîthûngîîre kwayaga gûtuîka bakûgîa mûgiro na batikîrîa kîatho gîa *Pasaka.

²⁹Kwoogu Piraatû, ûra aarî ngabana îgiitaani rîru, aumagarûka aathi kîrî bo. Abeera, “Mbîraani bûra ûyû arûthîîte.”

³⁰Bamwîra, “Ûkaaya kwîgua gûtirî bu arûthîîte, tûtigîkûreetera we.”

³¹Piraatû abeera, “Îthiini n'we ni bûmûgiitîre îgamba bûrî biû kûringana na watho bwenu.” Bamwîra, “Biû Arooma bûtitwîtîgîîrîîtie tûgiitîra muntû îgamba, aûragwa.” (

³²Gwakarîkire ûgu kaingo bûra Yiesû augîîte bûûyûra. Mbereeni naarî akuuga bûra agaakuyanga.)

³³Piraatû aacooka kambîîni kaîrî, auga Yiesû airwe kîrî we. Amûûria, “I woû Mûnene wa Ayaundi?”

³⁴Yiesû amûcookeria amûûria, “I woû wengwa wathûgaania nûmbûûrie kîûria gîku, kana n'antû bakwîra mantû maakwa?”

³⁵Piraatû amûûria, “Ka ndî Mûyaundi? Anga t'antû beenu na *athînjîri bara banene ba Ngai bakûreetire kîrî niû! N'ata ûrûthîîte?”

³⁶Yiesû eera Piraatû, “Niû ntirî mûnene wa gûkû nthîgûrû. Ûkeegua ndî we, athingati baakwa bakîrûa boona nkîgwatwa n'Ayaundi. Îndî îîndî na rîo, niû ntirî mûnene wa gûkû nthîgûrû.”

³⁷Piraatû amûûria, “Aabu ûtirî mûnene?” Yiesû amwîra, “Wauga ndî mûnene. Na gîku i kîo gîatûmire nciarwa. Ndaayire nthîgûrû kwîra antû ûmma. Muntû wonthe ûra eendeete ûmma naambîgagua.”

³⁸Piraatû amûûria, “Na ûmma i bûrîkû?” Piraatû aumagarûka kaîrî. Eera antû, “Niû ntikwona mabîtia mara arûthîîte.

³⁹N'ûntû ibûmenyeereetie kwona ndabûthaûrîra mûgwate ûmwe wakîra îgiita rîa Pasaka, ibûkwenda mbûthaûrîra Mûnene wa Ayaundi?”

⁴⁰Bamuugîîria na inya bamwîra, “Arî! Tûtikwenda ûyû. Tûrîenda Baraba!” (Baraba aarî mûtunyani.)