Read tharaka NJOANA 19 Bible Online

NJOANA 19 - tharaka bible

NJOANA 19

¹Rîru Piraatû auga Yiesû athûkue aringwe ibooko.

²Acikaarî baatumania matî ma mîîgua maakara ta nthûmbî ya ûnene, beekîra Yiesû yo kîongo. Baacooka kaîrî bamwîkîra nguo îndaaya ya rangi ya ûkûyû.

³Bakûrûtha ûgu, baacooka baatua kûthiyaga mbere yake bakamûkeethia, bakamwîra, “N'ata îîndî, Mûnene wa Ayaundi!” Na wabamwîra ûgu, bakamûringa îkoobi.

⁴Piraatû aumagarûka kaîrî. Eera antû, “Ndauga nareetwe kîrî biû kaingo bûmenya niû ntikwona mabîtia mara arûthîîte.”

⁵Kwoogu Yiesû aumagarûkua eekîrîtwe nthûmbî îra ya mîîgua na nguo înu ndaaya ya rangi ya ûkûyû. Piraatû eera antû, “N'ûyû muntû wenu!”

⁶*Athînjîri bara banene ba Ngai na aruti ngûgî baao bakwona Yiesû, baugîîria na inya, bauga, “Mwambe! Mwambe!” Piraatû abeera, “Mûthûkieni bûkamwambe bûrî biû. Niû ntikwona mabîtia mara arûthîîte.”

⁷Na bo bamwîra, “Tûrî na watho buugîîte muntû ta we abuîrîîte kûûragwa, n'ûntû bwa kwîbîta Mwana wa Ngai.”

⁸Piraatû akwîgua bauga ûgu, aamaka mûno.

⁹Aacooka kambîîni kaîrî. Aûria Yiesû, “Kwenu i kû?” Yiesû ataamûcookeria.

¹⁰Piraatû aûria Yiesû, “Nûkûrega kwaria naani? Nûtakûmenya ndî na watho na nwa nkûrekeerie kana nkauga ûkaambwa?”

¹¹Yiesû amwîra, “Ûkeegua ti Ngai agwîtîgîîrîîtie ûtiîgua ûrî na watho bwa kuuga ndûthwe bûra ûkwenda. Kwoogu ûra aankunyanîrîte ndareetwa kîrî woû n'we eeyîîtie nkûrûki yaku.”

¹²Piraatû akwîgua ûgu, aanjîîria gûcûa gîtûmi gîa gûtûma arekeeria Yiesû. Îndî kîrîndî kîamuugîîria na inya kîamwîra, “Ûkamûrekeeria tûkaamenya ûtirî ûcoore na Kaisaarî. Muntû wonthe ûra eetuuyaga mûnene i ta kwonania atigwatanagîra na Kaisaarî.”

¹³Piraatû akwîgua antû bauga ûgu, auga Yiesû aumagarûkue. Aakara nthî gîtîîni gîa kûgiitîra magamba, bantû kwarîîtwe maiga. (Na Kîîbirania bantû agu eetagwa ‘Gabatha’.)

¹⁴Kwarî mûthenya wa kwîthuuranîra n'ûntû bwa kîatho gîa *Pasaka, ta thaa kûmi na ciîrî ûgu. Piraatû eera Ayaundi, “N'ûyû mûnene wenu!”

¹⁵Antû bamuugîîria na inya bamwîra, “Naûragwe! Naûragwe! Mwambe!” Piraatû abaûria, “Ka bûkwenda mbamba mûnene wenu?” Athînjîri ba Ngai bara banene, bamwîra, “Gûtirî mûnene ûngî twiyî tatiga Kaisaarî wenka!”

¹⁶Piraatû aanenkanîra Yiesû kîrî acikaarî bathi kûmwamba. Acikaarî baathûkia Yiesû.

¹⁷Yiesû aakamata mûtharaba ûra akaambwa. Baumagarûka baathi baakinya bantû eetagwa, ‘Kîîndî gîa kîongo.’ (Na Kîîbirania eetagwa ‘Gorogotha’.)

¹⁸Agu noogo acikaarî baambire Yiesû na antû bangî baîrî. Ûmwe aambirwe rûteere rûmwe rwa Yiesû, na ûra ûngî rûteere rûra rûngî. Yiesû aarî gatîgatî ka bo.

¹⁹Piraatû aandîka kabaaû, kaaringaringîrwa mûtharabaani wa Yiesû îgûrû. Kabaaû gaku kaandîkîîtwe, “YIESÛ WA NASAREETHI, MÛNENE WA AYAUNDI.”

²⁰Na Ayaundi baingî ibaathoomire ûgu kabaaû gaku kaandîkîîtwe, n'ûntû bantû agu ataarî kûraaya na taûni, na kaandîkîîtwe na Kîîbirania, Kîîratini, na Kîîngiriki.

²¹Athînjîri bara banene ba Ngai beera Piraatû, “Buuta ‘Mûnene wa Ayaundi,’ wandîke, ‘Araugaga n'we Mûnene wa Ayaundi.’ ”

²²Piraatû abeera, “Ûgu ndaandîka i bu.”

²³Acikaarî bakwamba Yiesû, baagaana nguo ciake barî bana. Baathûkia nguo yake îra ndaaya. Nguo înu yatumîîtwe îgwateene, îtaarî na rûtumo.

²⁴Beerana, “Menya tûmîtembûrania. Tûringeeni kuura twone ûra akaathi n'yo.” Ûntû bûbu bwatuîkîkire kaingo *Maandîko Maatheru maûyûra, mara maugîîte, “Baagaanire nguo ciakwa na baaringa kuura bagîcindanîra nguo yakwa îmwe.” Na ûgu i bu acikaarî baarûthire.

²⁵Gina wa Yiesû, mwaragina wa gina wa Yiesû, Maria mwekûrû wa Kiriopas na Maria Mûmagindari baarûngi akubî na mûtharaba wa Yiesû.

²⁶Yiesû akwona gina arûngi akubî na mûrutwa ûra Yiesû eendeete mûno, eera gina, “Taata, ûyu i mwana waku.”

²⁷Eera mûrutwa ûyu n'we, “Naawe ûyu i nyûkwe.” Na kuuma îgiita rîru, mûrutwa ûyu eetîgîîria gina wa Yiesû aatua gûkaraga gwake.

²⁸Yiesû naamenyaga mantû monthe maakarîkaga wabûra maarî makarîke. Na kaingo *Maandîko Maatheru maûyûra, auga, “Inkwîgua bûûta.”

²⁹Agu akubî ikwarî na mbakûrî yaûyûri ndibei yarî na gana. Baathûkia cibonji bamîtombeka ndibeini înu. Bamîmunta mûthiani wa kamûtî,[16] bamîtiirithia mîromo ya Yiesû.

³⁰Yiesû aaciia ndibei înu. Auga, “Nkûthiria ngûgî yakwa.” Eenîka kîongo nthî, aakua.

³¹Na n'ûntû kwarî ntugû ya kwîthuuranîra n'ûntû bwa *Sabatû, atongoria ba Ayaundi baaromba Piraatû rûûtha rwa kuunanga magûrû bara baambîîtwe, kaingo babaambûra mîtharabaani. Bateendaga biimba bikara mîtharabaani ntugû ya Sabatû na mûno mûno, Sabatû înu yarî întheru, n'ûntû yarî ya kîatho gîa *Pasaka.

³²Kwoogu acikaarî baathi baunanga magûrû antû bara baîrî baambîîtwe akubî na Yiesû nteere ciake irî ciîrî.

³³Bagûkinyîîra Yiesû, boona we naarî agûkua. Kwoogu bataamuunanga magûrû maake.

³⁴Îndî mûcikaarî ûmwe amûmunta mbaru na îtumo. Auma nthakame na rûûyî. (

³⁵Ûkûûyî bûbû i bwa muntû oonire mantû mama magîkarîka. Na ûkûûyî bûbû i bwa mma. Naiyî n'ûmma akwaria kaingo kwaûmbîka naabi bwîtîgia mantû mama.)

³⁶Mantû mama maakarîkire kaingo *Maandîko Maatheru maûyûra, mara maugîîte, “Gûtirî mwîndî wake ûkaunwa.”

³⁷Kaîrî bantû angî Maandîko Maatheru mauga, “Bakoona ûra baamuntire.”

³⁸Ikwarî na muntû eetagwa Njosebu wa kuuma taûni ya Arimathea. Aarî mûrutwa wa Yiesû na witho, n'ûntû naakuthûkaga atongoria ba Ayaundi. Nyuma ya mantû mamu, aathi kîrî Piraatû kûmûromba rûûtha rwa kûthûkia kiimba kîa Yiesû. Piraatû amwîtîgîîria. Kwoogu Njosebu aathi kûthûkia kiimba kîa Yiesû.

³⁹Nikondemu wana we aathiyania na Njosebu akamatîîte mîtaa ya kûthiria kiimba woru. Mîtaa înu yarî ya manemane na aroi ya ûrito ta bwa kiirû mîrongo îthatû ûgu. Nikondemu ûyu n'ûra aathiire kwona Yiesû ûtugû.

⁴⁰Njosebu na Nikondemu baathûkia kiimba kîa Yiesû bakîoga na cuka bagîkîmincagîria manemane na aroi. Ûgu i bu Ayaundi baathikanaga.

⁴¹Bantû agu Yiesû aambîîtwe ikwarî na kamûnda. Na kamûndaani gaku ikwarî na nthiko îtaarî nthike muntû.

⁴²Njosebu na Nikondemu baathika Yiesû nthikooni înu n'ûntû yarî akubî, na n'ûntû Ayaundi ibaanjîîrîîtie kwîthuuranîra n'ûntû bwa Sabatû.