Read tharaka NJOANA 20 Bible Online

NJOANA 20 - tharaka bible

NJOANA 20

¹Rûûni rûkîîrî mûno ntugû ya mbere ya kiumia, Maria Mûmagindari aathi nthikooni îra Yiesû aathikîîtwe. Oona iiga rîra rîakunîkîrîte mûromo wa nthiko rîrî rîrutarute oogo.

²Akwona ûgu, augia rwîro aathi kîrî Simioni Petûrû na mûrutwa ûra Yiesû eendeete mûno. Abeera, “Ibararutire Mwathani nthikooni na tûtikûmenya ara baramwirire.”

³Petûrû na mûrutwa ûyu ûngî baanjîîria kûthi bwa nthiko

⁴baugîîtie rwîro. Mûrutwa ûyu ûngî augia aatiga Petûrû, aakinya nthikooni arî mbere.

⁵Ataathûngîra, naakuamîîrie aaraitha ndeni. Akûraitha oona cuka yonka.

⁶Simioni Petûrû aakinya, aathûngîra nthikooni. Wana we oona cuka

⁷na gîtambaa kîra Yiesû aakunîkîrîtwe na kîo kîongo. Gîtambaa gîakûnjîtwe kîaigwa bantû mwanya, gîtaarî amwe na cuka.

⁸Mûrutwa ûyu ûngî, ûra aakinyire arî mbere, wana we aathûngîra nthikooni. Oona mantû mamu, eetîgia.

⁹Îgiitaani rîru bataiyî *Maandîko Maatheru maugîîte Yiesû nwa mwanka ariûke.

¹⁰Baacooka naara baakaraga.

¹¹Maria aarûngi ome ya nthiko akîrîraga. Aakuamîîria akîrîraga aaraitha nthikooni ndeni,

¹²oona araîka baîrî beekîrîte nguo injerû. Baakari ara kiimba kîa Yiesû kîarî. Ûmwe aakari naara kîongo kîarî na ûyu ûngî aakari naara magûrû maarî.

¹³Araîka babu baûria Maria, “Mwekûrû, i mbi ûkûrîrîra?” Maria abeera, “Ibarathûkiirie Mwathani wakwa na ntikûmenya ara baramwirire.”

¹⁴Akuuga ûgu, aagarûka oona Yiesû arûngi waagu, îndî ataamenyaga kana i Yiesû aarî.

¹⁵Yiesû amûûria, “Mwekûrû, i mbi ûkûrîrîra? N'ûû ûgûcûa?” Maria akîthûgaanagia aarî mûmenyeeri wa kamûnda gaku, amwîra, “Weegua i woû ûramûrutire nthikooni, mbîîra itû, aba, ara ûramwirire kaingo mmûthûkia.”

¹⁶Yiesû amwîta, “Maria.” Maria aûndûka amwîtîga, “Rabai!” (Kuuga ûûgû na Kîîbirania i ta kuuga Mwarimû.)

¹⁷Yiesû amwîra, “Ndekia, tiga kûngwata n'ûntû ntikûrî ngwîtia kîrî Baaba. Îthi wîre arutwa baakwa imbîtîîtie kwa Baaba, Ngai wakwa ûra arî Abaagu na Ngai wenu.”

¹⁸Maria Mûmagindari aathi eera arutwa ba Yiesû, “Nkwona Mwathani.” Abeera bûra Mwathani aamwîrire.

¹⁹Kîûgorooni gîa ntugû ya mbere ya kiumia, arutwa ibeethîreene amwe. Ibaingîîte mîrango na konji n'ûntû ibaakuthûkaga atongoria ba Ayaundi. Yiesû aaya aarûngama gatîgatî kaao. Abeera, “Ûkiri bûrookaraga naabi.”

²⁰Akûbeera ûgu, aboonia marema ma njara ciake na rwaru. Arutwa bakwona i Mwathani aarî baakena mûno.

²¹Yiesû abeera, “Ûkiri bûrookaraga naabi. Wata bûra Baaba aantûmire, i ta bu nkûbûtûma.”

²²Ababeebeera mîruke. Abeera, “Thûkiani Kîrundu Ûmûtheru.

²³Bwarekera antû meeyia maao, bakaarekerwa mo. Bwarega kûbarekera batiirekerwa.”

²⁴Tooma (ûra kaîrî eetagwa Ndindimas), ûra aarî ûmwe wa arutwa bara îkûmi na baîrî ataarî oogo rîru Yiesû aayire.

²⁵Arutwa bara bangî bamwîra, “Itwonire Mwathani.” Tooma abeera, “Ntiîtîgia nwanga nkoona na ngatongithia marema ma mîcumaarî njaraani yake, na ngatongithia rwaru rwake.”

²⁶Nyuma ya ntugû inyanya, arutwa ibeethîreene amwe kaîrî nyomba îmwe. Na îgiita rîru Tooma naarî oogo. Amwe na kwîgua mîrango nîarî îminge, Yiesû aaya aarûngama gatîgatî kaao. Abeera, “Ûkiri bûrookaraga naabi.”

²⁷Eera Tooma, “Cûûba njara ciakwa na tonga marema na kîara gîaku. Tonga rwaru rwakwa na njara yaku. Tiga gûkararia, îtîgia.”

²⁸Tooma amwîra, “Ûrî Mwathani wakwa na Ngai wakwa!”

²⁹Yiesû amwîra, “Weetîgia n'ûntû ûkûmbona. Îndî bara beetîgagia batooneete bakaathaarimwa mûno.”

³⁰Yiesû naaringire biama bingî biingî bira arutwa baake boonire, îndî bitiandîkîîtwe îbukuuni rîrî.

³¹Mantû mama maandîkîîtwe kaingo bwîtîgia Yiesû n'we Kîrîstû, Mwana wa Ngai, na kaingo bûtûûra mwoyo n'ûntû bwa riîtwa rîake.