Read tharaka NJOANA 21 Bible Online

NJOANA 21 - tharaka bible

NJOANA 21

¹Nyumaani Yiesû eebonania kîrî arutwa baake barî rûteere rwa îria rîîtagwa Tiberias. Bara baarî oogo baarî, Simioni Petûrû, Tooma (ûra kaîrî eetagwa Ndindimas), Nathanieri wa kuuma taûni yeetagwa Kana îra yarî Gariiri, aana bara baîrî ba Cabendi, na arutwa bangî baîrî. Gwakarire ûûgû.

³Simioni Petûrû eera bara bangî, “Niû ka nthi ngatege makûyû.” Babu bangî bamwîra, “Wana tiû itûkûthiyania naawe.” Baatwa îtarûûni baathi. Baareere gûtega îndî gûtirî kîo baagwata.

⁴Rûûni rûûkîîrî, Yiesû naarûngi rûteere rwa îria, îndî arutwa baake bataamenyaga kana n'we aarî.

⁵Yiesû abaûria, “Kûrî kîo bûragwata, acoore?” Bamwîra, “Arî, gûtirî kîo tûragwata.”

⁶Yiesû abeera, “Taambaani neeti bwa njara ya ûrîo ya îtarû bwoneeni bûgwate makûyû.” Bakwamba neeti, bataûmba kûmîkuuyia bamîtwethia îtarûûni n'ûntû bwa makûyû kwingîa.

⁷Mûrutwa ûra Yiesû eendeete mûno eera Petûrû, “I Mwathani!” Simioni Petûrû akwîgua i Mwathani aarî, eekîra nguo yake îra ndaaya (n'ûntû naarî akûmîruta). Aathûngûtha rûûyîîni aathi naara Yiesû aarî.

⁸Arutwa babu bangî bo baayaga barî îtarûûni, bakuuyîîtie neeti yûyûri makûyû n'ûntû bataarî kûraaya na rûteere rwa îria. Baarî ta makinya îgana rîmwe ûgu kuuma rûteere.

⁹Bagûkinya rûteere boona mwanki wa makara na ikwarî na makûyû na mûgaate îgûrû rîa mwanki ûyu.

¹⁰Yiesû abeera, “Reeteeni makûyû mamwe ma mara bwagwata.”

¹¹Simioni Petûrû aathi îtarûûni aakururia neeti amîreeta rûteere. Neetiini kwarî na makûyû maanene îgana rîmwe rîa mîrongo îtaano na mathatû, na amwe noogu neeti îtaatuîka.

¹²Yiesû abeera, “Ncûûni bûrîe.” Gûtirî mûrutwa aûmîîria kûmûûria aarî ûû. Îndî ibaiyî i Mwathani aarî.

¹³Yiesû aathûkia mûgaate abanenkera. Aacooka aathûkia makûyû na mo abanenkera.

¹⁴Rîrî i rîo rîarî rîa mathatû Yiesû kwîbonania kîrî arutwa baake kuuma akûriûka.

¹⁵Bakûrîîkia kûrîa, Yiesû aûria Simioni Petûrû, “Simioni wa Njona, nûmbendeete nkûrûki ya bûra bara bangî bambendeete?” Petûrû amûcookeria amwîra, “Yîî, Mwathani, nwiyî inkwendeete!” Yiesû amwîra, “Menyagîîra tûgondu twakwa.”

¹⁶Yiesû amûûria kaîrî, “Simioni wa Njona, nûmbendeete?” Petûrû amûcookeria amwîra, “Yîî, Mwathani, nwiyî inkwendeete!” Yiesû amwîra, “Rîîthagia ng'ondu ciakwa.”

¹⁷Yiesû amûûria kaîrî rîa mathatû, “Simioni wa Njona, nûmbendeete?” Petûrû aagwatwa i kîeba Yiesû akûmûûria rîa mathatû kana namwendeete. Eera Yiesû, “Nwiyî mantû monthe, Mwathani. Nwiyî inkwendeete.” Yiesû amwîra, “Menyagîîra ng'ondu ciakwa.

¹⁸Na mma ga ngûkwîra, rîra warî mwana, wekagîra nguo ûkathi wanaara ûkeenda. Îndî rîra ûgaatindira ûgaatambûrûkia njara wogwe cio i muntû ûngî akwire naara ûtakwenda.”

¹⁹Yiesû augire ûgu kwonania gîkuû kîra Petûrû agaakua gîgaatûma Ngai atîîywa. Akûrîîkia kuuga ûgu, Yiesû eera Petûrû, “Nthingata!”

²⁰Petûrû aûndûka oona mûrutwa ûra Yiesû eendeete mûno abathingatîîte. Mûrutwa ûyu n'ûra aakari akubî na Yiesû rîra baarîyanagîra rîa mûthia irio bia ûgoro, rîra aamûûririe n'ûû akaamûkunyanîra.

²¹Petûrû akûmwona, aûria Yiesû, “Mantû ma ûyû n'we n'ata, Mwathani?”

²²Yiesû amûcookeria amwîra, “Wana nkeenda atûûra mwoyo mwanka rîra nkaaya yîya rîa maîrî, înu ti ngûgî yaku. Woû nthingata.”

²³Kuumania na ûgu Yiesû eerire Petûrû, ntheto ciambîîria kwarua gûkîîragwa mûrutwa ûyu atiikua. Îndî Yiesû atauga atiikua. Ka augire, “Wana nkeenda atûûra mwoyo mwanka rîra nkaaya yîya rîa maîrî, înu ti ngûgî yaku.”

²⁴Mûrutwa ûyu n'we ûyû akûbwîra mantû mama, na n'we mwandîki. Itwiyî mantû mamu i ma mma.

²⁵I mantû mangî maingî mûno mara Yiesû aarûthire. Makîandîkirwe monthe ntikwona taka nthîgûrû yonthe îkîganîra mabuku monthe mara makîandîkwa.