Read tharaka NJOANA 4 Bible Online

NJOANA 4 - tharaka bible

NJOANA 4

¹Mwathani aaya kûmenya *Abarisai ibaarî bakwîgua bûra aakuuyagia antû baingî nkûrûki ya Njoana bagatuîka arutwa baake akababaatithia. (

²Îndî ingî ti Yiesû we wengwa aababaatithagia, n'arutwa baake baababaatithagia.)

³Akûmenya ûgu, auma Njundea aacooka Gariiri kaîrî.

⁴Yiesû naabatîîrue akûrûkîîra nthîgûrû ya Asamaria.

⁵Aagendeera taûni yeetagwa Sînka, akubî na kîthaka kîra Njakubu aagaîrîr îte nthaka îmwe yake îra yeetagwa Njosebu.

⁶Kîthima kîa Njakubu kîarî waagu ûgu. Na n'ûntû bwa kûnoga kûra aanogeete i rûgendo, Yiesû aathi aakara nthî waagu rûteere rwa kîo. Kwarî ta thaa thiita.

⁷Mûka ûmwe Mûsamaria aaya gûtaa rûûyî. Yiesû amwîra amûkundie rûûyî anyue. (

⁸Arutwa ba Yiesû bataarî oogo, ibaarî bakûthi taûni kûgûra irio.)

⁹Mûka ûyu Mûsamaria amwîra, “Ûrî Mûyaundi, naani ndî Mûsamaria. N'ata ûkûmbîîranga ngûkundie rûûyî?” (Ayaundi batigîtûmîra into bimwe na Asamaria.)

¹⁰Yiesû amwîra, “Ûkeegua nûkûmenya kîewa kîra Ngai aûmba gûkwaa, na n'ûû agûkwîra ûmûkundie rûûyî, nûûria Ngai akwe kîewa gîku na agûkundie rûûyî rwa mwoyo.”

¹¹Mûka ûyu amwîra, “Itû, aba, i kû ûkaaruta rûûyî rûru rwa mwoyo ûkûmbîîra? Ntikwona ûrî na gîntû gîa gûtaa na kîo na i bu kîthima gîkî kîrî kîraaya.

¹²Nûkwenda kûmbîîra i woû mûnene kîrî kîûyûyû gîetû Njakubu, ûra aatûtigîîre kîthima gîkî? We wengwa aanyunyaga rûûyî rwa kîthima wagîkî na aana baake na ûrîîthi bwake.”

¹³Yiesû amûcookeria amwîra, “Muntû ûra anyunyaga rûûyî rûrû atirega kwîgua bûûta kaîrî,

¹⁴îndî ûra anyunyaga rûûyî rûra nkundanagia, atiîgua bûûta kaîrî. Rûûyî rûra mmûkundagia rûtuîkaga kînyaka ndeni yake, rûûyî rwa kîo rûkanyenyeaga akoona mwoyo wa tene na tene.”

¹⁵Mûka Mûsamaria amwîra, “Itû, aba, nkundia rûûyî rûru kaingo nteegua bûûta kaîrî na kaingo ntaaya gûtaa aaga kaîrî.”

¹⁶Yiesû amwîra, “Îthi wîte mûrûmeegu bûûye n'we.”

¹⁷Mûka ûyu amwîra, “Niû ntirî mûrûme.” Yiesû amwîra, “Ûkwaria mma wauga ûtirî na mûrûme,

¹⁸n'ûntû ûgûrîîtwe n'arûme bataano, naka na ûra ûrî n'we îîndî tika wana we arî mûrûmeegu. Bûbu wauga n'ûmma.”

¹⁹Mûka ûyu eera Yiesû, “Na ûrî kîroria, aba!

²⁰Biûyûûyû beetû tiû Asamaria baagongagîra Ngai kîrîmaani gîkî, îndî naabi Ayaundi buugaga Ngai abatîîrue agongagîrwa Njerusaremu.”

²¹Yiesû amwîra, “Mbîtîgia, mwekûrû, kagiita kaayîîte bûtiigongera Ngai kîrîmaani gîkî, kana Njerusaremu.

²²Na rîo gûkîa, biû Asamaria bûgongaga ûra bûtaiyî. Îndî tiû tûgongaga ûra twiyî n'ûntû wonokio bûûyanîîtie na Ayaundi.

²³Kagiita ikaayîîte, na gaka i ko kagiita. Bara bakaagongaga Ngai Baaba bûra kwagîrîte bakaamûgongaga na njîra ya gîîkîrundu, na ya mma. Na babu i bo Ngai acûaga bamûgonga.

²⁴Ngai i kîrundu. Bara bamûgongaga nwa mwanka bamûgonge na njîra ya gîîkîrundu na ya mma.”

²⁵Mûka ûyu Mûsamaria amwîra, “Imbiyî rîra *Mesia ûra eetagwa ‘Kîrîstû’ akaaya agatuumbûrîra mantû monthe.”

²⁶Yiesû amwîra, “Niû nkwaria naawe i niû we.”

²⁷Yiesû na mûka ûyu bakîaragîîria agu, arutwa ba Yiesû baakinya. Baarigara mûno bakwîthîra Yiesû akîaria na mûka, îndî gûtirî muntû aûria kîra baaragîîria kana baûria Yiesû kîra gîatûmaga aaria na mûka ûyu.

²⁸Mûka ûyu aatiga nyûngû îra aataîte n'yo rûûyî. Aacooka bwa taûni eera antû,

²⁹“Tancûûni bwone muntû ûngî aambîîra mantû monthe ndarorûtha. Waûmba kwîgua n'we Kîrîstû?”

³⁰Antû bauma taûni baathi naagu Yiesû aarî.

³¹Kagiitaani gaku i rîo arutwa beeyaga Yiesû irio, bamwîra, “Rabai, itû rûma gantû.”

³²Îndî Yiesû abacookeria abeera, “Ndî na irio biakwa ka bûtaiyî.”

³³Arutwa baake baanjîîria kûûrania, “Ka kûrî we amûrûmiirie irio kana?”

³⁴Yiesû abeera, “Irio biakwa i kûrûtha kwenda kwa ûra aantûmire, mwanka nthirie ngûgî îra aampeere.

³⁵Anga bûtiugaga, ‘Nyuma ya mîeri îna tûgaaketha?’ Îndî ka mbwireeni, raithaani mînda bwega bwone bûra irio biûmîîte bieteereete gûkethwa.

³⁶Agu tûrî mûkethi nakûrîwa ngûgî yake ya gûketha maketha ma mwoyo wa tene na tene, kaingo mwandi na mûkethi bakena bûmwe bonthe.

³⁷Bûra kwîragwa n'wabu kûrî atî, ‘Kûrî ûra aandaga na ûra akethaga.’

³⁸Ndabûtûma bûketha maketha bûtaathithinîra. Kûrî bara baathithinîîre mo. Biû ka bûthûkîîtie kuuma ara baatigîîre.”

³⁹Asamaria baingî ba taûni înu beetîgia Yiesû n'ûntû bwa gûkûûyîîra kûra mûka ûyu aakûûyîîre auga Yiesû naamwîrire monthe mara aarorûtha.

⁴⁰Rîru Asamaria babu baayîîte kwona Yiesû, bamwîra atikaathi bakarakarange. Yiesû eetîgîîria baakara ntugû ciîrî.

⁴¹Asamaria bangî baingî beetîgia Yiesû bakûmûthikîîria.

⁴²Beera mûka ûyu, “Wabu tûgwîtîgia n'ûntû tûkûthikîîria twingwa, na t'ûntû bwa bûra twîgîîtue ûkiuga. Tûkûmenya na mma muntû ûyû i Mwonokia wa nthîgûrû.”

⁴³Nyuma ya ntugû inu ciîrî, Yiesû auma agu aathi bwa Gariiri. (

⁴⁴Kûrî rîo we wengwa augîîte kîroria gîtirî nkuma kwao.)

⁴⁵Agûkinya Gariiri, antû ba Gariiri bamûkeneera, n'ûntû kûrî rîo baarî Njerusaremu boona mara monthe aarûthire rîra baarî noogo kîathooni gîa *Pasaka.

⁴⁶Aacooka taûni ya Kana naagu Gariiri, naara aagarûrîîte rûûyî rwatuîka ndibei. Ikwarî na mûnene ûmwe wa thirikaarî aatûîre taûni ya Kaperinaumu. Mûnene ûyu naarî na kaana ga kaîyî kaayîîtue.

⁴⁷Akwîgua Yiesû naarî akuuma Njundea aaya Gariiri, aaya aûria Yiesû bathi Kaperinaumu akamwoorerie kaana, n'ûntû i ta gûtarî ko kaarî oogo.

⁴⁸Yiesû amwîra, “Î biû nwanga bûkoona biama na magegania nwa rîo bwîtîgia!”

⁴⁹Mûnene ûyu amwîra, “Itû, aba, twîndame Kaperinaumu mbere ya gakua.”

⁵⁰Yiesû amwîra, “Na ûkathi mwana waku akaabua.” Mûnene ûyu eetîgia mîgambo înu ya Yiesû, aathi.

⁵¹Acookeete aarîîkana na aruti ngûgî baake bamwîra, “Mwana waku narabwire.”

⁵²Mûnene aûria aruti ngûgî baake rîra rîongwa mwana aabuîte. Bamwîra, “N'îgoro thaa mûgwanja cia mûthenya i rîo karatigire kûbîîyanîra mwîrî.”

⁵³Îthe wa kaana gaku aaririkana thaa inu nwa cio ciongwa ira Yiesû aamwîrîîte kaana gaake gakaabua. Kwoogu we na antû ba mûciî wake beetîgia Yiesû.

⁵⁴Gîku i kîo kîama kîa Yiesû kîa biîrî kîra aaringire kuuma akuuma Njundea aaya Gariiri.