Read tharaka NJOANA 5 Bible Online

NJOANA 5 - tharaka bible

NJOANA 5

¹Nyumaani Yiesû aathi Njerusaremu kîathooni kîa ndini ya Ayaundi.

²Njerusaremu, akubî na mwîrîga weetagwa, ‘Mwîrîga wa Ng'ondu,’ ikwarî na kîria kîa rûûyî kîarî oogo. Na rûteere rwa kîo igwaakîîtwe rwembea rwa antû kwîyûa rwagaanîîtue maita mataano. Na rwaria rwa Kîîbirania, kîria gîku gîetagwa Bethisatha.

³Antû baingî mûno bateebûmbagîra, bamwe ntûngi, bangî batootaga kûthi na bangî bionje baamaamaga tûnyombaani tûtu twa kwîyûa, bageeteera rûûyî rûtua kwinainua. [

⁴Kweerîkanaga weegiita na îgiita mûraîka wa Mwathani aayaga kîriani gîku akainainia rûûyî. Kwoogu muntû wa mbere kûthûngîra ku warîra rûûyî rwainaina nooraga ndwari wa yonthe îra eegagua arî n'yo.][5]

⁵Ikwarî na muntû ûmwe oogo aatûîre arî kîonje mîanka mîrongo îthatû na înana.

⁶Yiesû akûmwona amaami agu na aamenya aakarîîte arî ûmwayie kwa îgiita rîgana ûgu, amûûria, “Nûkwenda kwora?”

⁷Muntû ûyu amwîra, “Niû, aba, ntionaga muntû wa kûnthûngîria kîriani rîra rûûyî rwainaina. Ngîkara gûcûûgia kûthûngîra wîgagua muntû ûngî akûthûngîra.”

⁸Yiesû amwîra, “Rûngama ûthûkie imaamîro biaku ûthi.”

⁹Nthûti weenu muntû ûyu oora. Aathûkia imaamîro biake aathi. Na n'ûntû kwarî ntugû ya *Sabatû,

¹⁰Ayaundi bakwona muntû ûyu akamatîîte imaamîro bamwîra, “Ka ûtaiyî îmunthî i ntugû ya Sabatû, na *watho ibûkûrega wîgua ûkamatîîte imaamîro?”

¹¹Muntû ûyu abeera, “Muntû ûra amboriirie n'we aambîîrire nkamate imaamîro biakwa nthi.”

¹²Ayaundi bamûûria, “N'ûû we ûyu we akwîrire ûgu?”

¹³Muntû ûyu ataiyî kana i Yiesû aarî n'ûntû Yiesû naarî akwîngîrana na kîrîndî, aathi.

¹⁴Nyumaani Yiesû eethîra muntû ûyu nyomba ya Ngai. Amwîra, “Nûkwona îîndî nûbuîte. Tigana na meeyia, weegua t'ûgu ûkoona kînyamaara kîongwa.”

¹⁵Muntû ûyu auma agu aathi eera atongoria ba Ayaundi i Yiesû aamworeetie.

¹⁶Atongoria babu baabanga kûnyamaaria Yiesû n'ûntû bwa kûrûtha ûgu ntugû ya Sabatû.

¹⁷Yiesû abeera, “Baaba arutaga ngûgî rîonthe na nwa ta bu na niû nkûrûtha.”

¹⁸Mîgambo înu ya Yiesû yatûma Ayaundi bathi na mbere nkûrûki gûcûa njîra ya kûmûûraga, na mûno mûno, t'ûntû bwa kûrûtha bûra boonaga bûtaagîrîte kûrûthwa ntugû ya Sabatû, îndî n'ûntû bwa kuuga Ngai n'Îthe, na kuuga ûgu i kwîganaania eeganaanagia na Ngai.

¹⁹Yiesû eera Ayaundi babu, “Na mma ga nkûbwîra, gûtirî bu Mwana aûmba kûrûtha arî we na bwake. Aiyî kûrûtha wabûra bunka oonaga Îthe akîrûtha. Bûra Îthe wa Mwana arûthaga i bu Mwana arûthaga.

²⁰Îthe amwonagia monthe mara mongwa we wengwa arûthaga, n'ûntû namwendeete. Na atirî mbarû îîndî, akamwonia mangî maanene nkûrûki ya mama, na biû bûrigare.

²¹Kwoogu, wata bûra Baaba ariûkagia antû bakuîte akabatuîkithia antû barî mwoyo, nwa ta bu kinya Mwana wake atuîkithagia antû mwoyo bara akwenda.

²²Na kaîrî bûmenye ti Baaba agiitanagîra magamba. I Mwana wake anenkerete watho bûbu bunthe,

²³kaingo antû bonthe batîîya Mwana bûmwe na bûra bamûtîîyaga arî we Îthe. Kwoogu ûra atatîîyaga Mwana, atitîîyaga Îthe ûra aamûtûmire.

²⁴“Na mma ga nkûbwîra, muntû ûra eegagua ntheto ciakwa na ageetîgia ûra aantûmire, ûyu we arî na mwoyo wa tene na tene. We gûtirî îgamba rîra arî na rîo. Narîîkîîtie kuuma gîkuûni aathûngîra mwoyooni.

²⁵Na mma ga nkûbwîra, kagiita ikaayîîte, na gaka i ko kagiita, rîra bara bakuîte bakeegua kayû ka Mwana wa Ngai, na bara bakeegua bûra akuuga, bagaatûûra.

²⁶Wata bûra Baaba arî we atûmaga antû batûûra mwoyo, nwa ta bu atuîkithîîtie Mwana atûmaga antû batûûra mwoyo.

²⁷Kwoogu namwete watho bwa kûgiitîra antû îgamba n'ûntû we i Mwana wa Muntû.

²⁸“Bûtikaarigare i bûra nkûbwîra. Îgiita irîyîîte bara bonthe bakuû beegue kayû ka Mwana wa Ngai,

²⁹bariûke baume nthikooni. Bara baarûthire bwega bariûke batûûre, îndî bara baarûthire mantû mataagîrîte bakaariûka bagiitîrwe îgamba rîao bûûthûûku mûno.

³⁰Gûtirî bu mbûmba kûrûtha na kwenda gwakwa na bwakwa. Ngiitagîra muntû îgamba kûringana na bûra mbîîragwa. Kwoogu kîrî bûra ngiitaga magamba, ngiitaga ntakûbîtia n'ûntû ntirûthaga bûra nkwenda ndî niû na bwakwa. Ndûthaga kwenda kwa ûra aantûmire.”

³¹Yiesû auga, “Ûkaaya kwîgua ndîkûûyagîîra ningwa bûbu bûtiîtwa ûkûûyî.

³²Kûrî ûra arî mûkûûyî, na imbiyî bûra augaga îgûrû rîakwa i bu kûrî.

³³“Bwatûmanire kîrî Njoana na naugire bûra kûrî.

³⁴Îndî ingî tika ûkûûyî bwa muntû îgûrû rîakwa bûrî na gîtûmi. Ka ndauga ngwete kaingo bwonokua.

³⁵Njoana aarî ta taa îra yaankanaga îkatharara. Na kûrî kagiita bwonaniirie ibwakeneere werû bwake.

³⁶“Nkûrûki niû ndî na ûkûûyî bûngî bûûnene kîrî ya bûra Njoana eeyanire, n'ûntû mantû mara Baaba aantûmire ndûtha na i mo ndûthaga imoonanagia Baaba naantûmire.

³⁷Na kinya Baaba wengwa ûra aantûmire naankûûyîîre. Îndî tika biû bweegua bûra aaragia kana bwona bûra akari.

³⁸Na bûremagwa kûrikia kiugo gîake n'ûntû bûtiîtîgagia i niû aatûmire.

³⁹Bûcûnkûûnaga *Maandîko Maatheru n'ûntû bûthûgaanagia bwarûtha ûgu bûkoona mwoyo wa tene na tene. Naka na Maandîko wamama nwa mo magweteete mantû maakwa,

⁴⁰îndî amwe na ûgu bûtienda kûûyîra mwoyo.

⁴¹“Ntiîtîgîîria gûkumua i muntû niû.

⁴²Biû inkûbûmenya bwega. Imbiyî nkorooni cienu bûtiendeete Ngai.

⁴³Mbûyîîte ndî na watho kuuma kîrî Baaba, îndî bûtirî bata naani. Îndî muntû ûngî akaaya na bwake we wengwa, ûyu n'we wîgua bûrî bata n'we.

⁴⁴N'ata biû bûmbîtîgangia weegua bûkenaga rîra bûgûkumanîîria bûrî bwingwa bûtagûtindanîra na gûcûa gûkumua i Ngai ûra gûtarî ûngî ta we?

⁴⁵“Na bûtikaathûgaanieni i niû nkaabuuga kîrî Baaba, mmwîre bûra bûrî bathûûku. Ûra akaabuuga i Musa woora bûtûîre bwîgwetie.

⁴⁶Ûkaaya kwîgua wabu ibwetîgiirie Musa bwambîtîgia, n'ûntû Musa naandîkire mantû maakwa.

⁴⁷Kwoogu bûtiîtîgia bûra mbugaga n'ûntû bûtiîtîgîîtie bûra Musa aandîkire.”