Read tharaka NJOANA 6 Bible Online

NJOANA 6 - tharaka bible

NJOANA 6

¹Nyumaani Yiesû aaringa aathi bwa rûgongo rûra rûngî rwa îria rîa Gariiri, (rîra kaîrî rîetagwa îria rîa Tiberias).

²Kîrîndî kîînene kîamûthingata noogo, n'ûntû ibaarî bakwona biama bira aaringaga bia kworia aayie.

³Yiesû na arutwa baake baatwa karîmaani, baakara nthî.

⁴Kîatho kîa Ayaundi gîa *Pasaka ikîarî akubî.

⁵Yiesû akûgera meetho oona mûkondo wa antû ûûyîîte kîrî we. Yiesû aûria Piripû, “I kû tûkaagûra mîgaate tûrûmie antû baba?”

⁶Yiesû aûriirie Piripû ûgu akîenda kwîgua bûra akauga. Naiyî bûra akaarûtha antû babu baakinya.

⁷Piripû amûcookeria amwîra, “Wana tûkauga woora muntû nwa acame, nwanga tûtûmîrîte mbia igana ta cia îrîi rîa muntû wa kîbaarûa rîa mîeri îthanthatû!”

⁸Enderea, ûngî wa arutwa baake, mûruagina wa Simioni Petûrû, eera Yiesû,

⁹“Aaga kîrî kîrîndî gîkî, kûrî kaîyî karî na mîgaate îtaano ya mûtu wa cayiri na tûkûyû twîrî, îndî gûtirî bu tûteethia.”

¹⁰Bantû agu ikwarî na nyaki mûno. Yiesû eera arutwa baake, “Îraani antû bakare nthî.” Antû baakara nthî. Arûme baarî ta ngiri îtaano.

¹¹Yiesû aathûkia mîgaate înu aacookeria Ngai nkaatho, rîru aanenkanîîria yagaîrwa antû babu bonthe baarî agu. Aathûkia tûkûyû na tu aarûtha woogû. Antû bonthe baarîa wabûra muntû eebîgagua.

¹²Antû bonthe bakûrîa mwanka babaa, Yiesû eera arutwa baake beethîranie mang'enyûrû mara maatigarire n'ûntû gûtirî kîo eendaga kîûra.

¹³Arutwa beethîrania ikaabû îkûmi na biîrî bia mang'enyûrû mara maatigarire kuumania na mîgaate înu îtaano ya mûtu wa cayiri îra antû baarîîte baaremwa kûthiria.

¹⁴Antû bakwona kîama gîku Yiesû aaringire, baatua kuuga, “Na mma gîkî i kîo kîroria kîra tûreerîgîîrîîte kîîya gûkû nthîgûrû.”

¹⁵Yiesû akûmenya ibeendaga kûmûgwata kwa inya atakwenda bamûtuîkithia mûnene, aatherekeria bwa irîma wenka.

¹⁶Gûgûkinya ûgoro arutwa ba Yiesû beendama bwa îria.

¹⁷Baathi baatwa îtarûûni, baanjîîria kûringanîria bacookeete bwa rûgongo rûra baumîîte, bathiîte bwa taûni yeetagwa Kaperinaumu. Gwatuga Yiesû waataaya.

¹⁸Ruuo irwabuutanaga na inya mûno, rûûyî rwagîa mîkumbîîrî îmînene.

¹⁹Arutwa bakûthi ta mairi ithatû kana inya ûgu, i rîo booneere Yiesû waagu akubî na îtarû aayîîte athiîrîîte îgûrû rîa rûûyî, baamaka.

²⁰Yiesû abeera, “I niû. Tigaani kûmaka.”

²¹Beendaga Yiesû athûngîra îtarûûni. Yiesû akûthûngîra bataakarakaranga batirakinya ara baathiîte.

²²Rûûni kîrîndî kîra gîatigirwe rûgongo rûru rûngî kîaririkana ikîoneete îtarû rîmwe oogo îgorooni, na Yiesû ataatwa rîo. Arutwa baake baatwere rîo baathi bonka.

²³Matarû mangî maumîîte Tiberias, maaya agu antû baagaagûrîrîtwe na mûgaate ûcookeretue nkaatho i Mwathani.

²⁴Antû babu baagaagûrîîtwe bakwona matarû mamu, baatwa mo baathi bwa Kaperinaumu gûcûa Yiesû noogo, n'ûntû bakûmûcûa agu bataamwona na batoona arutwa baake.

²⁵Bakwîthîra Yiesû naagu Kaperinaumu bamûûria, “Rabai, i rî ûûyire naaga?”

²⁶Yiesû abeera, “Na mma ga nkûbwîra, bûtigûncûa n'ûntû bwa biama, îndî bûrîncûa n'ûntû bwa mîgaate îra bûrarîîre bwabaa.

²⁷Tigaani kwînyamaaria gûcûa irio bira bitakarangaga bitathûûkîîte. Înyamaaragieni na gûcua irio bia mwoyo wa tene na tene bira bitathûûkaga rî kana rî, bira Mwana wa Muntû akaabwaa n'ûntû Baaba noonanîîtie nakûmûkenia.”

²⁸Antû bamûûria, “N'ata tûbatîîrue tûrûtha kaingo tûruta ngûgî cia Ngai?”

²⁹Yiesû abacookeria abeera, “Bûra Ngai eenda bûrûtha n'ûûgû—bwîtîgie ûra aantûmire.”

³⁰Bamûûria, “I kîama kîbi ûkaaringa twone kaingo tûgwîtîgia? Twîre bûra ûkaarûtha.

³¹Biûyûûyû bietû ibiarîîre mana[6] rîra baarî rwanda wata bûra *Maandîko Maatheru maugaga, ‘Naabeere mûgaate wa kûrîa kuuma îgûrû.’ ”

³²Yiesû abeera, “Na mma ga nkûbwîra, ti Musa aabwere mûgaate kuuma îgûrû. Baaba nwa we eeyanaga mûgaate ungwa wa kuuma îgûrû.

³³Mûgaate ûra Ngai eeyanaga, n'ûra aumire îgûrû, ûra eeyaga kîrîndî kîa nthîgûrû mwoyo.”[7]

³⁴Antû bamwîra, “Aba, tweyage mûgaate ûyu rîonthe.”

³⁵Yiesû abeera, “I niû mûgaate wa mwoyo. Ûra aayaga kîrî niû atiîgagua yûûra kaîrî, rî kana rî. Aambîtîgia atiîgagua bûûta kaîrî rî kana rî.

³⁶Îndî anga ntaabwîrire wana weegua ibûmbonaga bûtimbîtîgagia?

³⁷Ûra wonthe Baaba ampeeyaga aayaga kîrî niû na gûtirî rîo nkamwîngatia,

³⁸n'ûntû ntauma îgûrû mbûya kûrûtha kwenda gwakwa, îndî i kwa ûra aantûmire.

³⁹Na kwenda kwa ûra aantûmire na ku, i ntigaate bara ampete, îndî i mbariûkie bonthe ntugû ya mûthia.

⁴⁰I kwenda kwa ûra aantûmire atî, muntû wonthe ûra akoonana na Mwana na amwîtîgie oone mwoyo wa tene na tene, na naani nkamûriûkia ntugû ya mûthia.”

⁴¹Ayaundi baanjîîria kûnung'una n'ûntû bwa bûra Yiesû augire we n'we mûgaate ûra waumire îgûrû.

⁴²Baûranagia, “Anga ûyû ti Yiesû, mwana wa Njosebu? Anga îthe na gina t'antû tûkûmenya? Aabu îîndî n'ata agûtwîra akiuga aaga yî, we aumire îgûrû?”

⁴³Yiesû abeera, “Tigaani kûnung'una.

⁴⁴Gûtirî muntû aaya kîrî niû tatiga arî mûkuuyie i Baaba ûra aantûmire, i rîo naani nkaamûriûkia ntugû ya mûthia.

⁴⁵Mabukuuni ma iroria kwandîkîîtwe, ‘Antû bonthe bakaarutanwa i Ngai.’ Muntû wonthe ûra athikagîîria Baaba na akathooma kuuma kîrî we aayaga kîrî niû.

⁴⁶Tika kûrî we oona Baaba tatiga ûra aumîîte kîrî Ngai.

⁴⁷Na mma ga nkûbwîra, muntû ûra eetîgagia akoona mwoyo wa tene na tene.

⁴⁸I niû mûgaate wa mwoyo.

⁴⁹Biûyûûyû bienu amwe na kûrîa mana rwanda ibaakuire.

⁵⁰Ûyû n'uu mûgaate ûra uumîîte îgûrû. Muntû akarîa uu atiikua.

⁵¹I niû mûgaate ûra ûrî na mwoyo, ûra waumire îgûrû. Muntû ûra akaurîa agaatûûra mwoyo tene na tene. Na mûgaate ûra nkeeyana n'ûntû bwa mîoyo ya kîrîndî kîa nthîgûrû, i nyama cia mwîrî wakwa.”

⁵²Yiesû akuuga ûgu Ayaundi baatua gûturania mbaara. Bamwe baûragia, “N'ata muntû ûyû aûmba gûtweyanga nyama cia mwîrî wake tûrîa?”

⁵³Yiesû abeera, “Na mma ga nkûbwîra, twanga bûkarîa nyama cia mwîrî wa Mwana wa Muntû na bûkanyua nthakame yake, bûtiona mwoyo wa tene na tene.

⁵⁴Îndî ûra we akaarîa nyama cia mwîrî wakwa na anyue nthakame yakwa akoona mwoyo wa tene na tene. Nkamûriûkia ntugû ya mûthia.

⁵⁵Mwîrî wakwa n'uu irio bia mma na nthakame yakwa n'yo biakûnyua bia mma.

⁵⁶Ûra arîyaga nyama cia mwîrî wakwa na akanyua nthakame yakwa akaraga ndeni yakwa, na naani nkaraga ndeni yake.

⁵⁷Baaba ûra aantûmire i mûtûûra mwoyo. N'we atûmîîte wîgua ngaatûûra mwoyo. Na ûra arîyaga nyama cia mwîrî wakwa agaatûûra mwoyo gûkûrûkîîra kîrî niû.

⁵⁸Ûyû n'uu mûgaate ûra waumire îgûrû. Uu ti ta mana mara biûyûûyû bienu biarîîre na amwe na kûrîa biakua. Ûra akaarîa mûgaate ûyû, we agaatûûra mwoyo tene na tene.”

⁵⁹Yiesû augagîra mantû mamu *sinagoogiini Kaperinaumu, akîrutana.

⁶⁰Baingî ba athingati baake bakwîgua mantû mamu bauga, “Ûrutani bûbû n'ûrutani bûûmo. Bûtiûmbîkana na bu.”

⁶¹Yiesû atarîmwîre i muntû aamenya wengwa athingati baake ibaanung'unaga. Abaûria, “Ka ndabûthûûria?

⁶²Î bûkoona Mwana wa Muntû agîîtia acookeete naara aarî mbere?

⁶³I Kîrundu wa Ngai eeyanaga mwoyo. Muntû n'wa ûtheri. Mîgambo înu bweegua ndabwîra n'ya gîîkîrundu na n'yo mwoyo.

⁶⁴Îndî bamwe beenu bûtiîtîgîîtie.” (Kuuma mwanjîîrioni Yiesû nwa aiyî bara bataamwîtîgagia na ûra akaamûkunyanîra.)

⁶⁵Yiesû aathi na mbere na kûbeera, “Na i ntûma mbwîrire gûtirî muntû aaya kîrî niû tatiga Baaba amûnenkanîrîte.”

⁶⁶Kuumania na mantû mamu, baingî ba athingati ba Yiesû baagarûka baatiga kûthiyanagia n'we.

⁶⁷Yiesû aûria arutwa bara îkûmi na baîrî, “Wana biû ka bûkwenda kûthi?”

⁶⁸Simioni Petûrû amwîra, “Mwathani, îîndî tûgûtiga tûkathi kîrî ûû ûngî, na i woû ûrî na mîgambo ya mwoyo wa tene na tene?

⁶⁹Twîtîgîîtie i woû Mûtheru ûra wa kuuma kîrî Ngai, na ûgu i bu twiyî tiû.”

⁷⁰Yiesû aacookia auga, “Ntaabûtaarire bûrî îkûmi na baîrî, îndî ûmwe wenu i nkoma?”

⁷¹Yiesû akiuga ûgu aaragia mantû ma Njundas ûra wa Simioni Mûcikariota, n'ûntû wana weegua Njundas aarî ûmwe wa arutwa bara îkûmi na baîrî, naarî agaakunyanîra Yiesû.