Read tharaka NJOANA 7 Bible Online

NJOANA 7 - tharaka bible

NJOANA 7

¹Nyumaani Yiesû aathi gûntû na gûntû nthîgûrû ya Gariiri. Ateendaga kûriûnga Njundea n'ûntû atongoria ba Ayaundi ba noogo ibeendaga kûmûûraga.

²Kîatho kîa Ayaundi kîra beetaga gîa Tûganda[8] ikîarî akubî gûkinya.

³Aruagina ba Yiesû bamwîra, “Uma gûkû ûthi Njundea kaingo athingati baaku boona mantû mara ûkûrûtha.

⁴Gûtirî muntû arûthaga mantû akiithanagia na akîendaga kûmenyekana. Na n'ûntû kûrî mantû ûkûrûtha, îmenyithanie nthîgûrû yonthe.”

⁵Wana kinya aruagina ba Yiesû bongwa bataamwîtîgagia.

⁶Yiesû abeera, “Kagiita gaakwa kara kaagîrîte ti gakinyu. Îndî biû kagiita konthe ikaagîrîte.

⁷Biû gûtirî kîo antû babûmenera, îndî niû ibaameneete, n'ûntû mbeeraga mantû mara barûthaga i maathûûku.

⁸Biû îthiini kîathooni, îndî niû ntiithi n'ûntû kagiita gaakwa kara kaagîrîte ga kûthi ti gakinyu.”

⁹Yiesû akûbeera ûgu ataathi. Aakarakaranga Gariiri.

¹⁰Aruagina bakûthi, i rîo Yiesû n'we aathiire, îndî na witho; ataathi antû bakîmenyaga.

¹¹Atongoria ba Ayaundi ibaamûcûaga naagu kîathooni bakîmûûrithagîria nwa, “Arî kû?”

¹²Yiesû naamumungagwa mûno i kîrîndî, bamwe bakiugaga i muntû ûmwega, na bangî bakîregaga bakauga i kweneeria eenagîîria antû.

¹³Îndî gûtirî muntû aûmîîria amûgweta na inya n'ûntû ibaakuthûkaga antû.

¹⁴Kîatho kîrî gatîgatî i rîo Yiesû aayire nyomba ya Ngai aanjîîria kûrutana.

¹⁵Atongoria ba Ayaundi bakûmûthikîîria baarigara mûno. Baûria, “I kû muntû ûyû amenyerete mantû mama na ataathooma?”

¹⁶Yiesû abacookeria abeera, “Ûrutani bûbû nkûrutana ti bwakwa, i bwa ûra aantûmire.

¹⁷Muntû ûra arî na wendo bwa kûrûtha bûra Ngai eendaga, akaamenya weegua ndîrutana ûrutani kuuma kîrî Ngai, kana i mantû maakwa na bwakwa.

¹⁸Ûra aaragia mantû na bwake n'ûkumio eegagua agîîcûîra. Îndî ûra we acûagîra ûra amûtûmîîte ûkumio, ûyu i muntû wa mma na naagîrîte.

¹⁹Musa ataabwere *watho na amwe na ûgu gûtirî we wacienu abwathîkagîra? I mbi bûkwenda kûmbûragîra?”

²⁰Kîrîndî kîamûûria, “Nûrî na nkoma? N'ûû akwenda gûkûûraga?”

²¹Yiesû abeera, “I kîama kîmwe niû ndaringire kîra kîbûrigarîîtie bwinthe,

²²îndî biû bûtaanaga kinya ntugû ya *Sabatû n'ûntû Musa naugire bûtaanage twana twa twîyî (îndî ingî wana ûkeegua ti Musa aambanîîrie na ûntû bûbû n'ûntû bwambanîîrue na Îburaîmu).

²³Îîndî rî, ûkaaya kwîgua mwana we nwa bûtaane kinya ntugû ya Sabatû kaingo bûtauna watho rî, bûrîthûûra i niû i kî ndooria muntû mwîrî unthe ntugû ya Sabatû?

²⁴Tigaani kûthûkagia mantû kûringana na mwonekere wa mo. Giitagaani mantû bûra kwagîrîte.”

²⁵Antû bamwe ba Njerusaremu baûria, “Muntû ûyû n'we atongoria bagûcûûgia kûûragithia?

²⁶T'we ûyû îîndî akwaria atakûmaka na gûtirî we akuuga nwa ata? Kana ka atongoria baramenyire wabu n'we Kîrîstû?

²⁷Îndî arî! Itûkûmenya ara muntû ûyû aumîîte. Rîra Kîrîstû we akaaya gûtirî muntû akaamenya kûra akauma!”

²⁸Yiesû athiîte na mbere na kûrutana gûku nyomba ya Ngai, aûria na inya îra nene, “Îbûriuga ibûmbiyî na ibwiyî ara mbumîîte? Ntirî aaga n'ûntû bwakwa. Kûrî ûra aantûmîîte na wabu n'wa mma. Biû bûtimwiyî.

²⁹Îndî niû imwiyî n'ûntû n'we aantûmîîte na mbumîîte kîrî we.”

³⁰Antû bamwe beenda kwîngana n'we bamûgwata, îndî gûtirî muntû aamûtonga n'ûntû kagiita gataarî gagûkinya.

³¹Antû baingî kîrîndîîni gîku beetîgia Yiesû bakîûranagia, “Kîrîstû aaya rî, akaaringa biama biinene nkûrûki ya muntû ûyû?”

³²*Abarisai bakwîgua antû bakîmumunga Yiesû baagwatanîra na *athînjîri bara banene ba Ngai, baatûma akaria ba nyomba ya Ngai bathi kûmûgwata.

³³Yiesû auga, “Ntigeerie kagiita gaakai ga kwîgua ndî amwe naabi nkîîya gûcooka kîrî ûra aantûmire.

³⁴Bûgaancûa bûmbage, n'ûntû niû ara ûkeegua ndî, biû bûtiûmba kûthi oogo.”

³⁵Atongoria ba Ayaundi baûrania, “I kû muntû ûyû akuuga we nathiîte, na aathi tiû tûkaamûcûa tûmwage? Nakwenda kuuma gûkû athi kûngî kûra Ayaundi barî? Kana i kîrî bara batarî Ayaundi akwenda kûthi?

³⁶N'ata akwenda kuuga akiuga tiû tûkaamûcûa tûmwage, na ara we akeegua arî, tiû tûtiûmba kûthi oogo?”

³⁷Ntugû îgûkinya ya mûthia wa kîatho gîku îra yarî gîtûmi mûno, Yiesû aarûngama auga na inya îra nene, “Muntû ûra akwîgua bûûta naaye kîrî niû anyue rûûyî.

³⁸Na wata bûra *Maandîko Maatheru maugîîte, ûra aambîtîgîîtie miuro ya rûûyî rwa mwoyo îkauma nkorooni yake.” (

³⁹Yiesû akiuga ûgu aaragîîria mantû ma Kîrundu wa Ngai ûra bara baamwîtîgîîtie baarî bakeewa. Îgiitaani rîru Kîrundu ataakinyîtie rîa kweyanwa, n'ûntû Yiesû ataarî agwîtia îgûrû.)

⁴⁰Antû bamwe ba babu baarî kîathooni bakwîgua Yiesû auga ûgu, bauga, “Wabu muntû ûyû i kîroria kîra.”

⁴¹Bangî na bo bauga, “N'we Kîrîstû!” Na kûrî bangî na bo baugaga, “Gûtirî bu Kîrîstû aûmba kwîgua aumîîte Gariiri!

⁴²Anga Maandîko Maatheru matiugaga Kîrîstû akeegua arî wa rûrîîyo rwa Ndaundi, na agaaciarîrwa taûni ya Bethireemu, ara Ndaundi aatûûraga?”

⁴³Kîrîndî kîanjîîria kûgîa na mwathûkano.

⁴⁴Kûrî bamwe beendaga kûmûgwata, îndî gûtirî muntû aamûtonga.

⁴⁵Akaria ba nyomba ya Ngai bara baatûmîîtwe kûmûgwata baacooka. *Athînjîri bara banene ba Ngai na *Abarisai bara baabatûmîîte, babaûria, “I kî n'ûntû bûtiraaya n'we?”

⁴⁶Babeera, “Mantû mara muntû ûyu akwaria mateeguîka na muntû ûngî!”

⁴⁷Abarisai babaûria, “Kana wana biû narabweneerie?

⁴⁸Gûtirî mûtongoria kana Mûbarisai amwîtîgîîtie,

⁴⁹tatiga antû babu n'ûntû batiiyî bûra *watho bwa Musa buugîîte? Ibarî barume.”

⁵⁰Ûmwe wa atongoria babu ba Abarisai eetagwa Nikondemu, (Nikondemu woora aathiire kwona Yiesû kagiita kamwe), aûria,

⁵¹“Anga *watho bwetû i buugîîte muntû nwa agiitîrwe îgamba ataambîîte kûthikîîrua kûmenyekana bûra arûthîîte?”

⁵²Bara bangî bamûûria, “Ka ûrî wa kuuma Gariiri? Ûtaraithe *Maandîkooni Maatheru ûkoona gûtirî kîroria kiumaga Gariiri.” [

⁵³Baanyagaarania bonthe, woora muntû eenûka bwa gwake.