Read tharaka NJOANA 8 Bible Online

NJOANA 8 - tharaka bible

NJOANA 8

²Rûûni rûkîîrî mûno aaraûka nyomba ya Ngai kaîrî. Kîrîndî kîonthe kîamwîthîranîra. Aakara nthî abarutana.

³Aarimû ba watho na *Abarisai bamûreetera mûka ûmwe aatuîkîîrîîtue amaami na muntû. Bamûrûngamia mbere yao bonthe.

⁴Beera Yiesû, “Mwarimû, mûka ûyû eethîîrua warîra rîongwa amaami na muntû.

⁵Na *wathooni bûra Musa aatwere, twîrîîtwe mûka ta ûyu abuîrîîte kûûragwa na maiga. Kana ka woû ûkuuga ata?”

⁶Baûriirie Yiesû ûgu bakîmûgeria, kaingo boona bwa kwîra atongoria. Yiesû aakuamîîria aandîka nthîgûrû na kîara.

⁷Bagûkara bakîmûûragia, Yiesû aarûngama bwega. Abeera, “Ûkaaya kwîgua kûrî we wacienu ateeyia, namûgere iiga arî wa mbere.”

⁸Yiesû aakuamîîria kaîrî aandîka nthî na kîara.

⁹Bakwîgua ûgu, baanjîîria kûthi woomwe kwa ûmwe. Akûrû i bo baarî ba mbere kûthi. Yiesû aatigwa wenka na mûka ûyu arûngi agu.

¹⁰Yiesû aarûngama bwega, aûria mûka ûyu, “N'ata ingî bara bagûkûgiitîrîte îgamba baathi?”

¹¹Mûka ûyu amwîra, “Gûtirî we aratigwa, mûnene.” Yiesû amwîra, “Wana niû ntikûgiitîra îgamba. Îthi, îndî naawe ûtikeeyie kaîrî.”][9]

¹²Kagiita kamwe Yiesû eera antû, “I niû werû bwa kîrîndî kîa nthîgûrû. Ûra akaanthingata akeegua arî na werû bwa mwoyo, na atiithiîra mwinduuni kaîrî.”

¹³*Abarisai bamwîra, “Ûrîîkûûyîîra wengwa. Kwoogu gûtirî bu ûkuuga.”

¹⁴Yiesû abeera, “Ga tuuge ndîîkûûyagîîra ningwa, îndî mantû mara mbaragia i ma mma n'ûntû inkûmenya ara mbumîîte na ara nthiîte. Îndî tika biû bûkûmenya ara mbumîîte kana ara nthiîte.

¹⁵Biû bûgiitaga mantû gîîantû, îndî niû gûtirî we ngiitagîra îgamba.

¹⁶Îndî wana nkauga ngiitîre muntû îgamba, ngiita bûra kwagîrîte, n'ûntû kûrî ûra tûrî n'we. Tûrî na Baaba ûra aantûmîîte.

¹⁷*Wathooni bwenu kwandîkîîtwe atî, ûkûûyî bwa antû baîrî bûkaaya kûgwatanîra, ûntû bûbu bûrî oogo.

¹⁸Niû na bwakwa ndî mûkûûyî wakwa, na mûkûûyî ûra ûngî wakwa, i Baaba ûra aantûmîîte.”

¹⁹Bamûûria, “Abaagu arî kû?” Yiesû abacookeria abeera, “Bûtimbiyî, na Baaba bûtimwiyî. Ûkeegua bûmbiyî wana Baaba weegua bûmwiyî.”

²⁰Yiesû aaragia mantû mamu monthe akîrutana antû nyomba ya Ngai, arî ara tûthandûkû twa kwîthîranîria biewa twarî. Na amwe na ûgu gûtirî muntû aamûgwata n'ûntû kagiita gataarî gagûkinya.

²¹Kaîrî Yiesû abeera, “Niû inthiîte na bûgaakua na meeyia meenu bûgîncûaga. Naara nthiîte niû, bûtikinya noogo biû.”

²²Ayaundi bakwîgua ûgu baanjîîria kûûrania, “Nakeebûraga kana n'ûntû agûtwîra naara athiîte tiû tûtikinya noogo?”

²³Yiesû abeera, “Biû bûrî ba aaga nthîgûrû, îndî niû ndî wa îgûrû. Biû bûrî ba nthîgûrû îno, îndî niû ntirî wa nthîgûrû îno.

²⁴Na i ntûma nkûbwîra bûgaakua na meeyia meenu. Na weegua bûtiîtîgia ndî ûra nkûbwîra, nwa gûkua bûgaakua na meeyia meenu.”

²⁵Bamûûria, “Ka ûrî ûû?” Yiesû abeera, “Woora ndabwîrire, i niû we kuuma wo tene.

²⁶Ndî na maingî mbuga îgûrû rîenu na nwa mbûgiitîre îgamba îgûrû rîa mantû maingî. Îndî ûra aantûmire n'wa mma, na mantû mara mbîîraga antû i mantû mara ndîkîîtie na kwîgua kuumania n'we.”

²⁷Bataamenya kana Yiesû aaragîîria îgûrû rîa Îthe.

²⁸Yiesû abeera, “Rîra bûgaûkîîria Mwana wa Muntû, rîru i rîo bûkaamenya ndî ûra nkûbwîra. Na atî, gûtirî ûntû ndûthaga kûringana na bûra nkwenda, mbaragia mantû mara monka Baaba aandutanîîte.

²⁹Tûrî na ûra aantûmire. Atintigîîte ninka, n'ûntû rîonthe ndûthaga bûra bûmûkenagia.”

³⁰Rîru Yiesû aaragia antû baingî ibaamwîtîgiirie.

³¹Yiesû eera bara baamwîtîgagia, “Weegua bûgaakaraga bwîtîgîîtie ûrutani bwakwa, wabu bûrî arutwa baakwa.

³²Bûkaamenya ûmma, na ûmma bûkabûruta ûkombooni.”

³³Bamwîra, “Tûrî ba rûrîîyo rwa Îburaîmu, na gûtirî rîo twatuîka nkombo cia muntû. N'ata aabu ûgûtwîra ûmma bûgatûruta ûkombooni?”

³⁴Yiesû abeera, “Na mma ga nkûbwîra, mwîyia wonthe i nkombo ya wîyia.

³⁵Na nkombo ititûûraga kwa eene rîonthe, îndî mwana wa mûciî ûyu atûûraga kwao rîonthe.

³⁶Kwoogu Mwana agakûruta ûkombooni, wabu ûkauma ûkombooni cwe.

³⁷Imbiyî bûrî ba rûrîîyo rwa Îburaîmu, îndî bûrîenda kûmbûraga n'ûntû bûtiîgagua mantû mara mbûrutanaga.

³⁸Mbaragia mara Baaba aamboneetie, na biû naabi bûrûthaga mara bweegiirue kuumania na abaagu.”

³⁹Bamwîra, “Baaba wetû n'Îburaîmu.” Yiesû abeera, “Ûkaaya kwîgua wabu bûrî aana ba Îburaîmu, wîgua bûkari ta bûra Îburaîmu aakari,

⁴⁰na ûtiîgua bûkîendaga kûmbûraga na mbwîrîîte ûmma bûra ndeerirwe i Ngai. Îburaîmu atikîrûtha ûntû ta bûbu!

⁴¹Bûrîrûtha mantû wamara mongwa abaagu arûthaga.” Bamwîra, “Tiû tûtirî aana ba kîthaka. Baaba wetû i Ngai, na t'ûngî.”

⁴²Yiesû abeera, “Ûkaaya kwîgua wabu Ngai n'we Abaagu wîgua bûkîmbendaga, n'ûntû mbumîîte kîrî Ngai nkîîya gûkû. Ntiyîîte n'ûntû bwakwa ningwa. N'we aantûmîîte.

⁴³I mbi îgûtûma bûrigwa i bûra nkuuga? I kwîgua bûtiûmba kûmenya bûra nkuuga.

⁴⁴Biû bûrî ba abaagu, Nkoma. Bwendaga kûrûtha mantû wamara abaagu eendaga kûrûtha. Atûîre arî mûûragani kuuma wo tene, na gûtirî rîo aaria ûmma, n'ûntû ûmma bûtirî ndeni yake. Na rîra aaragia ûrongo, aaragia kûringana na bûra akari, n'ûntû we i mûûrongo, na n'we kaumo ka ûrongo bunthe.

⁴⁵Niû bûregaga kûmbîtîgia n'ûntû mbaragia ûmma!

⁴⁶N'ûû wacienu aûmba kwonania wîyia bwakwa? Aabu weegua mbaragia ûmma rî, i mbi îîndî îkûgiria bûmbîtîgia?

⁴⁷Ûra we arî wa Ngai neegagua bûra Ngai akuuga. Îndî biû n'ûntû bûtirî ba Ngai, i ntûma bûteendaga kwîgua bûra akuuga.”

⁴⁸Beera Yiesû, “T'ûmma tuugire, twauga ûrî Mûsamaria, na i nkoma ûrî na cio?”

⁴⁹Yiesû abeera, “Gûtirî nkoma ndî na cio. I Baaba ntîîyaga, îndî biû bûtintîîyaga.

⁵⁰Nticûaga gûkumua ndî niû. Kûrî ûra akwenda nkumua, ûra atuuyaga na bûkaa.

⁵¹Na mma ga nkûbwîra, muntû ûra aathîkagîra ûrutani bwakwa atiikua rî kana rî.”

⁵²Bamwîra, “Îîndî, n'îîndî twamenya wabu i nkoma ûrî na cio! Ûkaaya kwîgua Îburaîmu naakuire rî, naka na iroria, n'ata ûkuuganga muntû aathingata ûrutani bwaku atiikua?

⁵³Ka ûrî mûnene nkûrûki ya Îburaîmu kîûyûûyû gîetû na we naakuire? Kana nkûrûki ya iroria na ibiakuire? Ka ûkuuga woû ûrî ûû?”

⁵⁴Yiesû abeera, “Gûgatuîka ndîkumagîîria ningwa, gwîkumithia gwakwa i kwa ûtheri. Ûra aankumagîîria i Baaba ûra bûkuuga i Ngai wenu,

⁵⁵na i Ngai bûtaamûmenya. Niû imwiyî na ntiuga ntimwiyî n'ûntû nkauga ûgu ka wîgua nkîrongoa ta biû. Niû imwiyî na imbathîkagîra kiugo gîake.

⁵⁶Kîûyûûyû kîenu Îburaîmu eetîgîîtie akoona ntugû îra nkaaya agakena mûno. Akûmîona aakena mûno.”

⁵⁷Bamûûria, “Ûriuga ûroona Îburaîmu na ûtikinyîîtie ûkûrû nwa bwa mîanka mîrongo îtaano?”

⁵⁸Yiesû abeera, “Na mma ga nkûbwîra, mbere ya Îburaîmu aciarwa nwa ndarî oogo.”[10]

⁵⁹Yiesû akuuga ûgu baarûma maiga. Bakîenda kûmûgera mo Yiesû aûra, auma nyomba ya Ngai.