Read tharaka NJOANA 9 Bible Online

NJOANA 9 - tharaka bible

NJOANA 9

¹Yiesû akûrûkîîte oona muntû aatûîre arî ntûngi kuuma gûciarwa.

²Arutwa baake bamûûria, “Mwarimû, n'ûû eeyiirie kaingo muntû ûyû aciarwa arî ntûngi? N'we kana n'aciari baake?”

³Yiesû abeera, “T'ûntû bwa meeyia maake kana ma aciari baake. Aaciarirwe arî ntûngi kaingo inya ya Ngai yonekana îkîruta ngûgî kîrî we.

⁴Nwa mwanka ndute[11] ngûgî ya ûra aantûmire îîndî kûrî mûthenya mbere ya gûtuga muntû aremwa kûrûtha nwa ata.

⁵Îîndî ndî nthîgûrû i niû werû bwa kîrîndî kîa nthîgûrû.”

⁶Yiesû akuuga ûgu, aatuîra mata nthîgûrû aarinda ntondo na mo. Aaka yo ntûngi înu meetho.

⁷Amîîra, “Îthi ûthambe kîriani gîa Siroamu.” (Siroamu i ta kuuga ‘Gûtûmwa’.) Muntû ûra ntûngi aathi aathamba meetho maarancûka, eenûka akîonaga.

⁸Atûûri na bara bangî baamwonaga mbereeni akîromba antû ûteethio, bakûmwona baûrania, “Anga muntû ûyû t'ûra arakaraga akîrombaga antû bamwaa ûteethio?”

⁹Bamwe bauga, “N'we.” Îndî bangî na bo bauga, “Arî t'we, ibakûbuanaana.” Muntû ûyu auga arî we wengwa, “I niû.”

¹⁰Bamûûria, “N'ata gûtuîkîkire kaingo ûtua kwona?”

¹¹Abeera, “Muntû ûra agwîtwa Yiesû arindire ntondo aambaka yo meetho, aambîîra nthi Siroamu nthambe. Nkûthi ndathamba, warîo ndatua kwona.”

¹²Antû bamûûria, “I kû arî îîndî?” Abeera, “Ntiiyî.”

¹³Muntû ûyu airwa kîrî *Abarisai.

¹⁴Abarisai bamûûria bûra gwakarîkire kaingo atua kwona. Muntû ûyu abeera, “Aambakire ntondo meetho, ndathamba ndatua kwona.” Ntugû înu Yiesû aarindîîte ntondo aaka muntû ûyu yarî ntugû ya *Sabatû.

¹⁶Bamwe ba Abarisai bauga, “Muntû ûyu atiûmba kwîgua aumîîte kwa Ngai n'ûntû atikûthingata watho bwa Sabatû.” Îndî bangî na bo bakaûria, “N'ata mwîyia aûmba kûringa biama bikari ta bira aringîîte?” Baanjîîria kûgîa mwathûkano.

¹⁷Baûria muntû ûyu kaîrî, “N'ûntû i woû ooriirie rî, ûriuga ata?” Muntû ûyu abeera, “We i kîroria.”

¹⁸Atongoria babu ba Ayaundi bateenda gwîtîgia kana muntû ûyu aarî ntûngi mbereeni mwanka beeta aciari baake.

¹⁹Babaûria, “Mwana ûyû n'wenu? Buugaga aaciarirwe atakwona? Aabu n'ata îîndî gûkarîkîîte kaingo atua kwona?”

²⁰Aciari ba muntû ûyu babeera, “Bûra twiyî, ga twiyî i mwana wetû, na aaciarirwe atakwona.

²¹Îndî bûra kûrakarîkire kaingo atua kwona, kana n'ûû atûmîîte atua kwona, tûtiiyî. Mûûrieni, i muntû mûgima nwa eebarîrie wengwa.”

²²Aciari ba muntû ûyu baugire ûgu n'ûntû ibaakuthûkaga atongoria babu ba Ayaundi, n'ûntû ibaarî bakuuga muntû ûra akauga nagwîtîgia Yiesû bakaamwîra atigaakinye *sinagoogiini kaîrî.

²³Kwoogu i ntûma aciari ba muntû ûyu baugire, “I muntû ûmûgima, mûûrieni.”

²⁴Beeta muntû ûyu kaîrî. Bamwîra, “Takîra Ngai, n'ûntû itûkûmenya muntû ûyû i mwîyia!”

²⁵Muntû ûyu abeera, “Nwîgue i mwîyia kana ti mwîyia, niû ntiyî ûgu. Bûra mbiyî ka mbiyî ndaraarî ntûngi, îndî îîndî inkwona.”

²⁶Atongoria ba Ayaundi bamûûria, “N'ata arakûrûthire? N'ata aratûmangire ûtua kwona?”

²⁷Muntû ûyu abeera, “Anga ntirabwîra, tika bûtireenda kûthikîîria? I cia kî bûkwenda mbwîra kaîrî? Ka bûkwenda gûtuîka arutwa baake na biû?”

²⁸Bamûruma, bamwîra, “I woû mûrutwa wa muntû ûyu, tiû tûrî arutwa ba Musa!

²⁹Tiû twiyî Ngai aariirie na Musa, tûtiiyî kûra muntû ûyû we aumîîte!”

³⁰Muntû ûyu abeera, “I bûûbû ûntû! Î bûtiiyî kûra aumîîte, na îndî natûmire ntua kwona!

³¹Twiyî Ngai atiîgagua eeyia, eegagua ûra amûtîîyaga, ûra arûthaga kwenda gwake.

³²Kuuma nthîgûrû yaûmbirwe gûtirî we eegua muntû atûmîîte muntû acierwe arî ntûngi atua kwona.

³³Kwoogu ûkeegua muntû ûyû atiumîîte kwa Ngai, gûtirî bu akîûmba kûrûtha.”

³⁴Atongoria babu bamwîra, “N'ata ûgûtûrutananga îîndî naawe, muntû aciarîrîtwe meeyiani na aakûrîra ku?” Bamwîngatia gûku baarî.

³⁵Yiesû akwîgua ûgu atongoria babu baarûthire, aacûa muntû ûyu. Akûmwona amûûria, “Woû nûgwîtîgia Mwana wa Muntû?”

³⁶Muntû ûyu amûûria, “N'we ûû itû, mmwîtîgie?”

³⁷Yiesû amwîra, “Ûkûmwona. N'we akwaria naawe îîndî ûûgû.”

³⁸Muntû ûyu amwîra, “Mwathani, ngwîtîgia.” Amûturîria maru, amûgonga.

³⁹Yiesû auga, “Ndaayire nthîgûrû kaingo mbathûrana antû. Ntûngi itue kwona, bara boonaga batuîke ntûngi.”

⁴⁰*Abarisai bamwe baarî agu bakwîgua Yiesû auga ûgu, bamûûria, “Gookuuga tûrî ntûngi na tiû?”

⁴¹Yiesû abeera, “Ûkeegua ka bûrî ntûngi, ûtiîgua bûbîtîîtie. Îndî îîndî n'ûntû bûriuga ibûkwona, ibûbîtîîtie.”