Read tharaka NGÛGÎ 1 Bible Online

NGÛGÎ 1 - tharaka bible

NGÛGÎ 1

¹Îbukuuni rîakwa rîa mbere kîrî woû, Thiobiras, ndaandîkire mantû monthe mara Yiesû aarûthaga na mara aarutanaga antû kuuma rîra aanjîîrie ngûgî yake,

²mwanka ntugû îra aathûkiirue eetithua îgûrû matuuni. Na mbere ya gwîtithua, Yiesû aatigire aatha atûmwa baake na njîra ya Kîrundu Ûmûtheru bara aathuurîîte.

³Nyuma ya gûkua, Yiesû akûriûka neebonaniirie kîrî bo na njîra inyingî itaarî nkanja. Îgiita na îgiita neebonaniirie kîrî bo bantû a ntugû mîrongo îna akîaragia na bo mantû makonetie ûnene bwa Ngai.

⁴Kagiita kamwe barî amwe bakîrîyaga, Yiesû eera atûmwa ûûgû, “Bûtikaume Njerusaremu. Eteeraani bwewe kîewa gîa kwîgua bûrî na Kîrundu Ûmûtheru ûra Baaba eeranire, naani ndabwîra.

⁵Njoana aabaatithaniirie na rûûyî. Îndî bûkaabaatithua na Kîrundu Ûmûtheru nyuma ya ntugû inkai ciyîîte.”

⁶Bakwonana kagiita kangî atûmwa baûria Yiesû, “Kagiita gaka i ko ûgaacookeria Aisiraeri ûnene bwao?”

⁷Yiesû abacookeria abeera, “Kagiita na tarîki cia mantû mamu i Baaba wenka aituîte kûringana na watho bwake. T'îgûrû rîenu kûmenya i rî ûkeegua kûrî.

⁸Îndî bûkaagîa inya rîra Kîrundu Ûmûtheru akaabwîndamîîra. Na bûgaatuîka akûûyî baakwa kwanjîîria Njerusaremu, nthîgûrû yonthe ya Njundea, Samaria, mwanka nteere cionthe cia nthîgûrû yonthe.”

⁹Yiesû akûrîîkia kuuga ûgu, atûmwa bamûcûûbîîte woogu boona aathûkua eetithua îgûrû. Îtu rîamûkunîkîra mwanka aatherekeria baatiga kûmwona.

¹⁰Bagûtigwa bakûnîîrîîte îgûrû meetho Yiesû eetîîtie, atûmwa boona araîka baîrî beekîrîte nguo injerû barûngi waagu akubî na bo.

¹¹Araîka babu baaria na bo. Babeera, “Antû ba Gariiri, n'ata bûkûrûtha aaga bûkari bûkûnîîrîîte îgûrû meetho? Yiesû wooyu bwona aathûkua kuuma kîrî biû eetitithua îgûrû akaaya kaîrî na njîra ta înu bwona eetia n'yo.”

¹²Bakuuma agu baarî Karîmaani ka Mîceituuni, baacooka baathi bantû ta a kiromita îmwe baakinya Njerusaremu.

¹³Bagûkinya, baatwa ngoroba baathi nyomba yao kûra baakaraga. Atûmwa babu baarî—Petûrû, Njoana, Njakubu, Enderea, Piripû, Tooma, Bathoromayo, Mathayo, Njakubu wa Arubayo, Simioni (ûra kaîrî eetagwa Mûciroti) na Njundas wa Njakubu.

¹⁴Atûmwa babu beethîranaga gûku ngorobaani rîonthe bakaromba barî amwe bonthe. Kinya eekûrû bamwe ta Maria gina wa Yiesû na aruagina ba Yiesû ibeegagua barî oogo.

¹⁵Îgiitaani rîru eetîgîri ta îgana rîmwe na mîrongo îîrî beethîreene, Petûrû aarûngama mbere yao kûbaarîria. Abeera,

¹⁶“Aruayia na antû beetû, ûroria bûra bûrî *Maandîkooni Maatheru bwarî nwa mwanka bûûyûre. Tene Kîrundu Ûmûtheru aariirie gûkûrûkîîra kîrî Ndaundi aaroria mantû ma Njundas ûra aatongoreerie kîrîndî kîra kîagwatire Yiesû.

¹⁷Njundas aarî ûmwe wa gîkundi gîetû na aathuurîîtwe aruta ngûgî ya ûtûmwa.”

¹⁸(N'ûntû bwa mbia ira oonire agûkunyanîra Yiesû, aathiire aagûra na cio kîthaka. Aagwîre gûku aatembûka into bia nda biauma bietîga.

¹⁹Mantû mamu ma Njundas maamenyekanire Njerusaremu yonthe. Antû beeta kîthaka gîku na rwaria rwao ‘Akerindama’. Na i ta kuuga ‘Kîthaka kîa nthakame’.)

²⁰Petûrû aathi na mbere kwaria. Auga, “Îbuku rîa Cabuurî na rîo riugîîte ûûgû mantûûni ma muntû ta ûyu, ‘Nyomba yake nîkare îrî îkurungu. Gûtikaagîte muntû athaamîra ku.’ Kaîrî rîauga, ‘Muntû ûngî nathûkie kaanya gaake.’

²¹Na ûra akaathûkia kaanya gaake nwa mwanka eegue arî muntû aakaranîîtie naati îgiita rîonthe rîra Mwathani Yiesû aarî amwe naati,

²²kuuma rîra Njoana aabaatithanagia mwanka rîra Yiesû aathûkiirue eetithua îgûrû.”

²³Antû beeyana mariîtwa maîrî ma bara beendaga. Ûmwe aarî Njosebu, ûra kaîrî eetagwa Barisabas kana Njastas, na wa baîrî eetagwa Mathias.

²⁴Baaromba barî amwe bauga, “Mwathani, n'ûntû i woû wiyî nkoro cia antû bonthe, tûtongorie kûmenya n'ûû ûkwenda kûthuura kîrî antû baba baîrî barî aaga,

²⁵kaingo athûkia kaanya ga gûtuîka mûtûmwa kara Njundas aatigire akîthi bûra aathiire.”

²⁶Baaringa kuura, Mathias aacinda oongeereka kîrî atûmwa bara îkûmi na ûmwe.