Read tharaka NGÛGÎ 11 Bible Online

NGÛGÎ 11 - tharaka bible

NGÛGÎ 11

¹Atûmwa na eetîgîri bara bangî ba Njundea beegua antû bataarî Ayaundi ibeetîgîîre kiugo kîa Ngai.

²Petûrû agûcooka Njerusaremu, eetîgîri bamwe ba Ayaundi bataagwatanîra n'we.

³Bamwîra, “Ûrathûngîîre nyomba cia antû batarî bataane warîyanîra na bo!”

⁴Petûrû aanjîîria kûbataranîria bwega bûra gwakarîkire. Abeera,

⁵“Ntugû îmwe ndî taûni ya Njopa nkîrombaga, ndoona kîoneki. Ndoona ndeendamîîrua mwanka ara ndarî gîntû gîakari ta cuka înene îtambûrûkîîtue kuuma îgûrû, îrî ngwate koona cionthe irî inya.

⁶Ndaraithîîria bwega ndoona îrî na nyamû cia mîthemba yonthe. Nyamû cia magûrû mana, cia mîciî na cia kîthaka, cia gwîkururia, na nyoni.

⁷Ndeegua kayû kambîîra, ‘Petûrû, thînja nyamû ino wîgaagûre.’

⁸“Ndauga, ‘Arî buru, Mwathani, n'ûntû gûtirî rîo ndaarîa gîntû gîtaagîrîte kana gîtarî kîtheru.’

⁹“Kayû gaku kaaragia kuuma îgûrû kaîrî kambîîra, ‘Ûtigeete into Ngai atheretie bitaagîrîte.’

¹⁰Gwakarîkire ûgu maita mathatû, rîru nyamû inu cionthe ciacookua îgûrû.

¹¹“Îgiitaani warîru ikwarî na antû bathatû baarûngi agu nyomba înu ndakaraga. Baatûmîîtwe kîrî niû kuuma Kaisaria.

¹²Kîrundu aambîîra ntikeegue ndî na nkanja ndega kûthi na bo. Aruayia baba tûraayaniirie na bo kuuma Njopa, baba bathanthatû bûkwona aaga, i bo twathiire na bo nyomba ya muntû ûyu eetagwa Koronerias.

¹³Tûgûkinya, Koronerias atwîra bûra oonangire mûraîka aaya kîrî we nyomba yake. Mûraîka ûyu amwîra, ‘Tûmana Njopa wîtîrwe muntû agwîtwa Simioni, kaîrî Petûrû.

¹⁴Agakwîra mîgambo îgaatûma wonoka na antû baaku bonthe.’

¹⁵“Nkwanjîîria kwaria, Kîrundu Ûmûtheru abeendamîîra wata bûra na tiû aatwîndamîîre kagiita ka mbere.

¹⁶Ndaririkana mîgambo îra Mwathani aariirie auga, ‘Njoana aabaatithaniirie na rûûyî. Îndî bûkaabaatithua na Kîrundu Ûmûtheru.’

¹⁷Weegua Ngai naabeere kîewa ta kîra tiû aatwere tûgwîtîgia Mwathani Yiesû Kîrîstû rî, ndî ûû ndigîîria Ngai?”

¹⁸Bara bataagwatanagîra na Petûrû bakwîgua mantû mamu baatiga. Baakumia Ngai bauga, “Kwoogu Ngai neete antû batarî Ayaundi kaanya kinya bo beerira kaingo batûûra mwoyo?”

¹⁹Eetîgîri bara baanyagaaraniirie n'ûntû bwa kûnyamaarua kûra kwaumaniirie na gûkua gwa Stibini, bamwe baao baathiire bwa nthîgûrû ya Boinîcia, Kupooro na taûni ya Antiokia bagîtûmagîîria Ayaundi bonka.

²⁰Îndî bamwe ba bo ba kuuma Kupooro na Kureni baathiire Antiokia baatûmîîria mantû ma Mwathani Yiesû kîrî antû bataarî Ayaundi.

²¹Inya ya Mwathani nîarî amwe na bo. Antû baingî beetîgia, baagarûka baatuîka ba Mwathani.

²²Mantû mamu maakinyîîra kanica ya Njerusaremu baatûma Baranaba athi Antiokia.

²³Agûkinya oona bûra Ngai aathaarimaga antû, aakena. Abeekîra wîru bonthe abeera bathi na mbere nkoro ciao kwîgua irî kîrî Mwathani, beerikîîtie.

²⁴Baranaba aarî muntû ûmwega na aûyûrîîtwe i Kîrundu Ûmûtheru, na aarî na wîtîgio bûûnene mûno. Antû baingî boongeereka baatuîka ba Mwathani.

²⁵Baranaba auma Antiokia aathi Taarisas gûcûa Saûrû.

²⁶Akûmûgwatithania baacookania n'we Antiokia. Baranaba na Paûrû baagwatana na kanica ya Antiokia, baakarania na bo mwanka wathira wabakîrutanaga gîkundi kîînene gîa antû. Na agu taûni ya Antiokia noogo eetîgîri beetîîrwe rîa mbere ‘Akîrîstû’.

²⁷Kagiitaani wagaku iroria bimwe bia kuuma Njerusaremu biaya Antiokia.

²⁸Ûmwe wa iroria bibu eetagwa Agabas, aarûngama. Kwa inya ya Kîrundu Ûmûtheru aaroria auga yûûra rîînene mûno rîkaaya nthîgûrû yonthe (na wabu yûûra rîru irîayire kagiita kara mûnene ûra eetagwa Kîraundia aathanaga Rooma).

²⁹Eetîgîri ba Antiokia baagwatanîra bauga wakîra muntû arute gîntû kûringana na bûra inya yake îgana batûme ûteethio kîrî eetîgîri ba Njundea.

³⁰Beethîrania baatûma Baranaba na Saûrû bairîra akûrû ba kanica, Njerusaremu.