Read tharaka NGÛGÎ 12 Bible Online

NGÛGÎ 12 - tharaka bible

NGÛGÎ 12

¹Kagiitaani wagaku, mûnene Eronde ûra eetagwa Angripa, aanjîîria kûnyamaaria eetîgîri.

²Njakubu, mûruagina wa Njoana aûragwa na rûyiû.

³Eronde akwona Ayaundi bara bataarî eetîgîri baakeneera kûûragwa kwa Njakubu, aagendeeria. Aagwatithia Petûrû kagiita ga kûrîa *kîatho kîa mîgaate îtaimbithîîtue.

⁴Petûrû akûgwatwa aingîrwa nceera. Aakarua n'ikundi bina bia acikaarî bana, bana. Eronde aabangîîte Petûrû akaarutwa nceera îgiita rîa *Pasaka rîathira amûgiitîre îgamba antû bakîonaga.

⁵Kwoogu Petûrû aakara nceera. Îndî antû ba kanica ibaamûrombagîra mûno.

⁶Ûtugû, mbere ya ntugû îra Eronde aabangîîte kûgiitîra Petûrû îgamba, ta wîthîre Petûrû aamaami gatîgatî ga acikaarî baîrî athaîkîîtwe na nyororo ciîrî. Na ikwarî na acikaarî bangî mûrangooni.

⁷Nthûti îmwe mûraîka wa Mwathani aaya aarûngama gûku ndeni ya kanyomba kara Petûrû aingîrîtwe. Werû bwatharara gûku ndeni. Mûraîka ûyu aaringaringa Petûrû mbaru, amwîra, “Ûka na mpwî!” Nyororo ira Petûrû athaîkîîtwe na cio njara ciakandûkana warîru, ciagwa nthî.

⁸Mûraîka amwîra, “Îbîthîranie na wîkîre iraatû biaku.” Petûrû aarûtha ûgu. Mûraîka amwîra, “Îkîra nguo yaku îra ndaaya, ûnthingate.”

⁹Petûrû aathingata mûraîka atakûmenya weegua bûra mûraîka aarûthaga i bu wabu gwakarîkaga kana i kîoneki kîarî.

¹⁰Petûrû na mûraîka baakûrûka acikaarî ba mbere bara baamûkarîîtie na bangî kaîrî. Rîru baakinyîîra mûrango wa cuuma wa ome buru ûra warî wa kuumagarûka kûthi bwa taûni. Mûrango ûyu warugûka ungwa, bauma. Bakûthi na barabara îmwe mbere ya bakoomoka bagwata îngî mûraîka aathi, aatiga Petûrû wenka.

¹¹Petûrû aarîcûkwa. Auga, “Wabu îîndî nkûmenya i Mwathani agûtûmîîte mûraîka wake anduta kîrî Eronde, kaingo bûra Ayaundi bareerîgîîrîîte bûtakarîka.”

¹²Petûrû akûmenya ûgu aathi nyomba ya Maria, kûra antû baingî beethîreene bakîrombaga. Maria aarî gina wa Njoana ûra kaîrî eetagwa Maariko.

¹³Petûrû aaringaringa mwîrîga. Mwarî ûmwe, mûruti ngûgî, eetagwa Ronda aathi kwona n'ûû aarî.

¹⁴Akûthi eegua kanyua ga Petûrû. Aakena mûno aacooka na rwîro atamûrugûrîrîte i gîkeno. Eera antû, “Petûrû arî mwîrîgaani.”

¹⁵Antû bamwîra, “I nkoma ûrî na cio!” Îndî mwarî ûyu abeera wabu n'ûmma. Antû bauga, “Nwanga ûkeegua i mûraîka wake.”[5]

¹⁶Petûrû nwa aarî ome akîringaringaga mûrango. Bakûrugûra bamwona baarigara mûno.

¹⁷Petûrû aboonia na njara bakire. Abeera bûra Mwathani amûruta nceera, na abeera beere Njakubu na eetîgîri bara bangî mantû mamu. Auma aathi gûntû kûngî.

¹⁸Rûûni gûgûkea acikaarî baarigicana mûno. Bataiyî bûra ûkîûmba kwîgua gwakarîkîîte kîrî Petûrû.

¹⁹Eronde aaruta watho auga Petûrû acûîwe, îndî atooneka. Aûria acikaarî bara baamûkarîîtie mantû mamu. Aaruta watho auga baûrawe. Eronde auma Njundea, aathi aakara Kaisaria îgiita rîgana ûna.

²⁰Eronde aathûûra n'antû ba Turo na Sindoni. Kwoogu antû babu baabanga kûthi kûmwona. Îndî mbere, baamba baûria muntû eetagwa Burastas abateetheerie. Burastas aarî mûrûngamîîri wa kambî ya mûnene, Eronde. Bakûmwona, rîru baabanga kûthi gûcûa bagwatanîra na Eronde, n'ûntû nthîgûrû yao yeegwatagia kwona irio kuumania na nthîgûrû yake.

²¹Ntugû îra baagwatanîîre îgûkinya, Eronde eekîrîte nguo cia ûnene aakarîra gîtî kîa ûnene, abaarîria.

²²Antû bauga na inya, “Gaku i kayû ka ngai, ti ka muntû.”

²³Warîo mûraîka wa Mwathani aakaanûkia Eronde n'ûntû ataatîîya Ngai. Aarîwa i maginyo, aakua.

²⁴Kiugo kîa Mwathani kîathi na mbere gûtamba, eetîgîri boongeereka.

²⁵Baranaba na Saûrû bakûrîîkia ngûgî yao bauma Njerusaremu, baacooka Antiokia. Baathi na Njoana ûra kaîrî eetagwa Maariko.