Read tharaka NGÛGÎ 13 Bible Online

NGÛGÎ 13 - tharaka bible

NGÛGÎ 13

¹Kanica ya Antiokia ikwarî na iroria na bara baarutanaga bara bangî. Baarî Baranaba, Simioni (ûra kaîrî eetagwa ‘Muntû ûmûyirû’), Rusias wa kuuma Kureni, Manaeni ûra aakûranîîtie amwe na Eronde ûra eetagwa Antipas, na Saûrû.

²Kagiita kamwe antû babu batîîrîrîte kûrîa irio n'ûntû bwa maromba, Kîrundu Ûmûtheru abeera, “Ndekeriani Baranaba na Saûrû barute ngûgî îra mbeetîîte baruta.”

³Baathi na mbere na gûtîîrîra kûrîa irio, baaromba. Rîru babu bangî baigîîra Baranaba na Saûrû njara, babarekeeria baathi.

⁴Kwoogu Baranaba na Saûrû bagûtûmwa i Kîrundu Ûmûtheru, baathi taûni yeetagwa Serukia. Baatwa meeri baathi gîcîgîîrioni kîa îria gîetagwa Kupooro.

⁵Bagûkinya taûni yeetagwa Saramis, baatûmîîria kiugo kîa Ngai *masinagoogiini ma Ayaundi. Ibaarî na Njoana Maariko wa kûbatûmîkagîra.

⁶Baungurania Kupooro yonthe, baumîîra taûni yeetagwa Pabos. Beethîra muntû aaringaga biama eetagwa Bari-Yiesû. Aarî Mûyaundi na eebîtaga kîroria.

⁷Magiita na magiita muntû ûyu beegagua barî na ngabana wa gîcîgîîrio gîku kîa îria. Ngabana eetagwa Serigias Paûras na aarî muntû ûmûûme mûno. Eeta Baranaba na Saûrû n'ûntû neendaga kwîgua kiugo kîa Ngai.

⁸Îndî muntû ûyu aaringaga biama aakararia Baranaba na Paûrû akîenda ngabana ûyu atigeetîgie. (Eetagwa Erimas na Kîîngiriki.)

⁹Saûrû, kaîrî eetagwa Paûrû, aûyûrîîtwe i Kîrundu Ûmûtheru aacûûba muntû ûyu,

¹⁰amwîra, “Ûrî mwana wa Nkoma na mûnthû wa bûra bunthe bwega! Ûûyûri ûrongo bwa mîthemba yonthe na wenania. I rî ûgaatiga kûrutana kînyume kîa ûmma bwa Mwathani?

¹¹Îîndî ka ûûre na inya ya Mwathani. Ûrîûra meetho na ûtiona werû bwa riûa kwa îgiita rîgana ûna.” Nthûti weenu gîntû gîakari ta ngooki înjirû gîakunîka Erimas meetho. Aanjîîria kwondaondia agîcûa muntû amûgwata njara.

¹²Ngabana akwona ûgu gwakarîkire eetîgia arigarîîte mûno n'ûrutani bwa Mwathani.

¹³Paûrû na bara baarî na bo baatwa meeri. Bauma Pabos baathi taûni yeetagwa Periga, nthîgûrû ya Pamburia. Njoana Maariko aathûkana na bo, aacooka Njerusaremu.

¹⁴Paûrû na Baranaba bakuuma Periga baathi taûni yeetagwa Antiokia, nthîgûrû ya Pisindia. *Sabatû îgûkinya, baathi *sinagoogiini baakara nthîgûrû.

¹⁵Ithoomo bikûthoomwa kuuma mabukuuni ma watho bwa Musa na ma iroria, atongoria ba *sinagoogi înu baatûmana babeera weegua barî na mîgambo bakîûmba kûûmîîria antû n'yo, nwa babeere yo.

¹⁶Paûrû aarûngama aûkîîria njara, aanjîîria kwaria. Auga, “Antû ba Isiraeri na bara bûkuthûkaga Ngai, nthikîîriani!

¹⁷Ngai wa antû ba Isiraeri aathuurire biûyûûyû bietû, aingîyia antû beetû rîra baarî Miisiri, abaruta ku na inya yake înene.

¹⁸Na kwa bantû a mîanka ta mîrongo îna barî rwanda, Ngai naabamenyagîîra.[6]

¹⁹Ngai naathiriirie mîgongo mûgwanja îra yatûûraga nthîgûrû ya Kaanani aanenkera nthîgûrû yao antû baake yatuîka yao.

²⁰Mantû mamu monthe maathûkiirie bantû a mîanka ta magana mana ma mîrongo îtaano (450). “Ngai aacooka aatuîkithia agambithania atongoria mwanka îgiita rîa kîroria Samweri.

²¹Antû bauga barîenda mûnene wengwa. Rîru i rîo Ngai aatuîkithiirie Saûrû wa Kuci mûnene, aathana mîanka mîrongo îna. Aarî wa mwîrîga wa Benjameni.

²²Ngai akûruta Saûrû ûneneeni, aatuîkithia Ndaundi mûnene. Ngai auga, ‘Indaroonire Ndaundi wa Njesii n'we muntû arî nkoro îkari ta yakwa. Akaarûtha bunthe bûra nkeenda arûtha.’

²³“Na Ngai athuurîîte Yiesû, ûmwe wa rûrîîyo rwa Ndaundi, atuîka Mwonokia wa Isiraeri, wata bûra eeyanire wîrane auga.

²⁴Mbere ya Yiesû aanjîîria ngûgî yake, muntû eetagwa Njoana naatûmîîrie antû bonthe ba Isiraeri abeera beerire meeyia maao babaatithue.

²⁵Njoana arî akubî kûthiria ngûgî yake, aûria antû, ‘Bûrîthûgaania ndî ûû? Ti niû ûra bûkûthûgaanîria. Ûyu aayîîte nyuma yakwa ntiagîrîte ûntû kinya mmûtharia ndigi cia iraatû biake.’

²⁶“Antû beetû, tiû rûciaro rwa Îburaîmu, na bara bûtarî Ayaundi bûkuthûkaga Ngai, ntûmwa îno ya wonokio îtûmîîtwe kîrî tiû.

²⁷Antû ba Njerusaremu na anene baao bataamenyaga Yiesû aarî ûû. Rîra baamûgiitîîre îgamba aûragwe i baingiirie mîgambo ya iroria îra îthoomagwa wakîra mûthenya wa *Sabatû.

²⁸Wana bakwaga gîtûmi kîega gîa gûtûma aûragwa, beerire Piraatû arute watho Yiesû aûragwe.

²⁹Bakwingia ûroria bunthe kûringana na bûra kwandîkîîtwe *Maandîkooni Maatheru îgûrû rîa Yiesû, Yiesû aambûrwa mûtharabaani aigwa nthikooni.

³⁰Îndî Ngai amûriûkia

³¹oonwa kwa îgiita rîraaya i bara baathiyaniirie n'we rîra aumire Gariiri aathi Njerusaremu. Îîndî babu i bo akûûyî kîrî antû.

³²“Ntheto înu îmbega n'yo tûkûbwîra atî, wîrane bûra Ngai eere biûyûûyû bietû

³³îîndî i bu aingîîtie naati, rûrîîyo rwao. Na aingîîtie wîrane bûbu na njîra ya kûriûkia Yiesû, wata bûra kwandîkîîtwe gîcuncîîni kîa biîrî gîa Cabuurî atî, ‘Ûrî mwana wakwa, îmunthî ngûtuîka abaagu.’

³⁴Ngai aamûriûkiirie kaingo atoora. Na ûûgû i bu kwandîkîîtwe mantûûni ma kûriûka gwake, ‘Nkabûthaarima ithaarimo biitheru na bia gwîtîgîka wata bûra ndeerire Ndaundi.’

³⁵Na kûrî bantû angî augîîte, ‘Ûtiireka Mûtheru waku oora.’

³⁶“Ndaundi akûthiria gûtûmîka kûringana na wendi bwa Ngai, aakua. Aathikwa, aathi kîrî biûyûûyû biake, oora.

³⁷Îndî ûra we Ngai aariûkiirie atoora.

³⁸“Kwoogu, antû beetû, ndîenda bûmenya atî, muntû ûyu n'we atûmîîte bûtûmîîrua mantû ma kûrekerwa meeyia.

³⁹Ûra wonthe amwîtîgagia naagîrithagua agakûûrwa mantûûni monthe, ûntû watho bwa Musa bûtaûmba kûrûtha.

⁴⁰Kwoogu menyeeraani bûra iroria biaugire bûtigaatuîkîke kîrî biû. Atî,

⁴¹‘Thikîîriani, biaa bibi! Bûkaarigara, bûraûra! Kûrî bu nkûrûtha wabûrî mwoyo, ûntû bûtagîîtîgia kinya bûrî batarîîrie bwega.’ ”

⁴²Paûrû na Baranaba bakiumagarûka *sinagoogiini antû babeera baaye *Sabatû înu îngî babeere mantû mamu nkûrûki.

⁴³Antû bakuuma, Paûrû na Baranaba baathingatwa n'Ayaundi baingî na antû bataarî Ayaundi bara baarombaga Ngai. Atûmwa babu beekîra antû wîru babeera bakarage ûtugiini bwa Ngai.

⁴⁴Sabatû înu îngî îgûkinya, akubî antû ba taûni înu yonthe beethîrana kwîgua kiugo kîa Mwathani.

⁴⁵Ayaundi bakwona wingî bwa kîrîndî baagwatwa i rûriitho rwingî mûno. Baakararia bûra Paûrû augaga na bamûrumanga.

⁴⁶Paûrû na Baranaba baaria na ûcamba beera Ayaundi babu, “Ikwarî na gîtûmi gîa kiugo kîa Ngai gûtûmîîrua kîrî biû mbere. Îndî n'ûntû bûkûrega na bwona bûtiagîrîte kwewa mwoyo wa tene na tene, ga tûtûmîîrie bara batarî Ayaundi.

⁴⁷N'ûntû Mwathani aatwîrire, ‘Ngûtuîkithîîtie werû kîrî bara batarî Ayaundi ûtambia wonokio bûkinya nteere cionthe cia nthîgûrû.’ ”

⁴⁸Bara bataarî Ayaundi bakwîgua ûgu baakena. Baakumia Mwathani n'ûntû bwa ntûmwa yake. Na bara Ngai aathuurire bakoona mwoyo wa tene na tene, beetîgîra.

⁴⁹Kiugo kîa Mwathani gîatamba gûntû gûku kunthe.

⁵⁰Îndî Ayaundi beengîîra aka bangî baarî îgweta baarombaga Ngai, na arûme kinya bo baarî îgweta. Baatûma Paûrû na Baranaba banyamaarua. Babeengîîria bauma kwao.

⁵¹Paûrû na Baranaba baatiga babaturaturîra tîîri ya mbayo ciao, rûrî rwano rwa kûboonia batirî ngwatanîro na bo. Baathi taûni yeetagwa Ikoniamu.

⁵²Îndî eetîgîri baatigirwe bakeneete mûno na booyûrîîtwe i Kîrundu Ûmûtheru.