Read tharaka NGÛGÎ 14 Bible Online

NGÛGÎ 14 - tharaka bible

NGÛGÎ 14

¹Paûrû na Baranaba baathi *sinagoogiini naagu Ikoniamu ta wîthîre. Baaria rwaria rwatûma Ayaundi baingî na antû baingî bataarî Ayaundi beetîgia.

²Îndî Ayaundi bara baaregire gwîtîgia beengîîra bara bataarî Ayaundi, bara bateetîgia, baatûma bamena bara beetîgiirie.

³Paûrû na Baranaba baakarakaranga naagu kagiita kaaraaya bagîtûmagîîria na ûcamba mantû ma Mwathani. Na Mwathani noonanagia wabu ntûmîîri înu Paûrû na Baranaba baatûmagîîria îgûrû rîa ûtugi bwake yarî ya mma. Oonanagia na biama bira aaringaga na magegania mara oonanagia gûkûrûkîîra kîrî bo.

⁴Antû ba taûni înu bataarî kîmwe. Kûrî bara baagwatanagîra na Ayaundi, na bara baagwatanagîra na atûmwa.

⁵Gîkundi gîa antû bamwe bataarî Ayaundi, Ayaundi bamwe, na atongoria baao baabanga bathîînie Paûrû na Baranaba na babaringange na maiga.

⁶Paûrû na Baranaba bakûmenya mûbango ûyu, baakuthûka. Baakûrûkîîra taûni yeetagwa Rîstira na îngî yeetagwa Ndabi, na gûntû kûra kwarî akubî na cio. Taûni inu ciarî gûntû gweetagwa Rikonia.

⁷Na baathiyaga bagîtûmagîîria gûntû gûku kunthe baakûrûkagîîra.

⁸Taûni ya Rîstira, ikwarî na muntû aarî ûmwonju mbayo. Aacierwe atakûûmba kûthi.

⁹Muntû ûyu aathikîîria Paûrû agîtûmîîria. Paûrû amûcûûba oona naarî na wîtîgio bwa gûtûma oorua.

¹⁰Paûrû amwîra na inya, “Rûngama ûkinye nthîgûrû na magûrû maaku!” Muntû ûyu aûka na mpwî, aatua kûthi.

¹¹Kîrîndî gîkwona ûgu Paûrû aarûthire kîanjîîria kûringa gîtuma na rwaria rwao rwa Kîîrikonia. Bauga, “Ngai ikûûya ikari ta antû!”

¹²Beeta Baranaba Cus. Paûrû n'we bamwîta Amis n'ûntû n'we aarî mwaria ûra mûnene.[7]

¹³Ikwarî na mûthînjîri wa ngai Cus taûni înu. Aatûmîkaga kîromberooni kîa ngai yake. Kîrombero kîarî ome ya taûni. Mûthînjîri ûyu akwîgua ûgu gwakarîkire aaya na ndeegwa na maûa mwanka mwîrîgaani wa taûni înu. We na kîrîndî ibeendaga kûrutîra Paûrû na Baranaba igongwana.

¹⁴Paûrû na Baranaba bakûmenya ûgu, baatembûranga nguo ciao. Baugia rwîro baathûngîra kîrîndîîni bakiugaga na inya,

¹⁵“I kî n'ûntû bûkûrûtha ûûgû? Anga tûtirî antû ta biû. Tûrî aaga tûbwîra bûtigane na mantû ma ûtheri bûrombage Ngai ûra atûûraga mwoyo. N'we Mûûmbi wa îgûrû, nthîgûrû, maria, na bionthe bira birî ku.

¹⁶Tene, Ngai neetîgîîrîîtie mîgongo yonthe îrûtha wabûra îkeenda.

¹⁷Îndî rîonthe Ngai noonanagia arî oogo kuumania na mantû meega mara abûrûthagîra ta kuurithia mbura kuuma îgûrû, gûkûria imera kagiita ka bio, kûbwaa biakûrîa, na kûbûûyûria gîkeno nkorooni cienu.”

¹⁸Ikwarî na inya Paûrû na Baranaba kûgiria antû babu babarutîra kîgongwana. I mantû mamu baugire baabagiriirie na mo batirarûtha ûgu baabangîîte.

¹⁹Ayaundi bamwe baaya baumîîte taûni ya Antiokia na bangî baumîîte Ikoniamu. Beengîîra antû baaringanga Paûrû na maiga. Bamûkururia bamuumagarûkia ome ya taûni bakîthûgaanagia bakûmûûraga.

²⁰Îndî eetîgîri bakwîthîrana bamûthiûrûka, Paûrû aûkîîra aacooka taûni kaîrî. Rûûni rûkîîrî baathi na Baranaba bwa taûni ya Ndabi.

²¹Paûrû na Baranaba baatûmîîria ntheto îmbega Ndabi. Baatûma antû baingî batuîka eetîgîri. Bauma agu baacooka baakûrûkîîra Rîstira na Ikoniamu mwanka Antiokia ya Pisindia.

²²Na gûku kunthe baakûrûkagîîra beekîra eetîgîri wîru, babaûmîîria wîtîgio. Babarutana babeera, “Nwa mwanka tûnyamaare mûno tûkîîya gûkinya ûneneeni bwa Ngai.”

²³Paûrû na Baranaba baathuura akûrû ba wakîra kanica. Baatîîrîra kûrîa irio bakîbarombera. Babanenkanîra ûmenyeeriini bwa ûra beetîgîîtie.

²⁴Paûrû na Baranaba baageendeera nthîgûrû ya Pisindia, baakinya Pamburia.

²⁵Bagûtûmîîria taûni yeetagwa Periga, baakûrûka baathi Ataria.

²⁶Bauma agu baatwa meeri baacooka Antiokia ya Sîîria. Aaga naara eetîgîri baabanenkanîîre ûmenyeeriini bwa ûtugi bwa Ngai mwanjîîrioni wa ngûgî înu baarîîkiirie.

²⁷Bagûkinya agu Antiokia, beeta antû ba kanica amwe. Babeera mantû mara Ngai aarûthîîte gûkûrûkîîra kîrî bo, na bûra eere antû batarî Ayaundi kaanya ga gwîtîgia.

²⁸Paûrû na Baranaba baakara na eetîgîri babu îgiita rîraaya mûno.