Read tharaka NGÛGÎ 16 Bible Online

NGÛGÎ 16 - tharaka bible

NGÛGÎ 16

¹Paûrû baathi taûni ya Ndabi. Bauma agu baathi Rîstira, beethîra mwîtîgîri eetagwa Timotheo. Gina aarî mwîtîgîri Mûyaundi, na îthe aarî Mûngiriki.

²Timotheo naatîîyîîtwe n'eetîgîri ba Rîstira na ba Ikoniamu.

³Paûrû neendaga Timotheo athiyania n'we. Amûtaana n'ûntû Ayaundi bonthe bara baatûîre naagu ibaiyî îthe aarî Mûngiriki.

⁴Rîru baathi kuuma taûni kûthi îra îngî bakîîraga eetîgîri bûra atûmwa na akûrû baatuire barî Njerusaremu. Babeera bathingate mantû mamu.

⁵Makanica mamu moongeerwa wîtîgio inya na eetîgîri baathi bakîongeerekaga kîra ntugû.

⁶Bakuuma agu baathi baagendeera nthîgûrû ya Burugia na ya Garatia, n'ûntû Kîrundu Ûmûtheru ateendaga batûmîîria kiugo nthîgûrû ya Îcia.

⁷Bagûkinya mwankaani wa Mîsia, baacûûgia kûthi Bethania, îndî Kîrundu wa Yiesû abaregeera.

⁸Baakûrûkîîra Mîsia baakinya taûni yeetagwa Tiroas.

⁹Ûtugû Paûrû oonua kîoneki. Oona Mûmacendonia ûmwe aaya aarûngama mbere yake. Amwîra, “Ringanîria ûûye wetû ûtûteethie!”

¹⁰Akwona kîoneki gîku, warîo twethuuranîra kûthi Macendonia. Itwarî na mma atî, i Ngai aatwîtîîte Macendonia tûthi gûtûmîîria ntheto îmbega kîrî antû ba noogo.

¹¹Twauma Tiroas na meeri twathi tûtakwathûkîra twakinya Samothirike. Rûûni twathi twakinya Neoporis.

¹²Twauma agu twathi Piripi. Piripi n'yo yarî taûni îra nene gîteere kîa Macendonia na yathagwa kîîrooma. Twakarakara oogo ntugû igana ûna.

¹³*Sabatû îgûkinya, twaumagarûka taûni înu twatamba na îkumbo rîa muuro twathi ara twathûgaanagia noogo Ayaundi beethîranaga kûromba. Twakara nthîgûrû twaria na eekûrû bara baayîîte marombaani mamu.

¹⁴Ûmwe wao eetagwa Rîndia, wa kuuma gûntû gweetagwa Thiatira. Aarî mûbiacaara wa gîtambaa kîa rangi ya ûkûyû. Na aarî mwekûrû aarombaga Ngai. Paûrû agîtûmagîîria, Mwathani aarugûra nkoro yake eetîgîra ntûmwa ya Paûrû.

¹⁵Aabaatithua amwe na antû ba mûciî wake. Atûthookia gwake. Atwîra, “Weegua ibûkwona ndî mwîtîgîri wa Mwathani, ncûûni tûthi gwakwa.” Mwekûrû ûyu atûkinyîîria mwanka tweegua tûtirega.

¹⁶Kagiita kamwe tûthiîte maromba twarîîkana na kamwarî kamwe nkombo karî na kîrundu gîatûmaga karingîria antû. Ikoonagîra eene ko mbia mûno n'ûntû bwa kûringîria antû.

¹⁷Kaarî gaku gatûthingata gakiugaga na inya, “Antû baba n'aruti ngûgî ba Ngai ûra mûnene mûno. Barîbûtûmîîria bûmenya bûra bûûmba kwonoka!”

¹⁸Ntugû cionthe i bu kaarûthaga ûgu. Paûrû eegua gakîmûtanga. Aûndûkania na ko eera kîrundu gîku, “Kwa riîtwa rîa Yiesû Kîrîstû ndîkwatha uume kîrî kaarî gaka weendî!” Kîrundu gîku kîauma kîrî kaarî gaku nthûti weenu.

¹⁹Eene kaarî gaku bakwona wîrîgîîro bwao bûkûthira bwa kwona mbia na ko, beengana na Paûrû na Sairas babakururia babaira ara anene baakaraga bakîgiita magamba.

²⁰Antû babu beera anene, “Antû baba n'Ayaundi na ibakûreeta thîîna taûni.

²¹Wîthîre bûra bakûrutana bûtikûgwatanîra na watho bwetû. Tiû tûrî Arooma, tûtiîtîgîra mantû mamu na tûtimarûtha!”

²²Kîrîndî kîaregana na Paûrû na Sairas. Anene babu baaruta watho Paûrû na Sairas baatembûrangîrwa nguo na baaringwa ibooko.

²³Paûrû na Sairas baaturwa mûno, rîru baingîrwa nceera. Mûnene wa nceera eerwa abacûûbîre bwega.

²⁴Mûnene ûyu akwewa watho bûbu aingîra Paûrû na Sairas kanyomba kaarî ndeni mûno gûku nceera. Abathaîka magûrû mbaaûni ciîrî indito mûno bûra bataûmba kuuma oogo.

²⁵Ûtugû gatî kanene, Paûrû na Sairas ibaarombaga na ibainagîra Ngai nyîmbo, agwate bara bangî bathikîîrîîtie.

²⁶Nthûti îmwe, nthîgûrû yainaina na inya mûno, mûcingi wa nceera wainaina. Na warîo mîrango yonthe yarugûka na nyororo cionthe ira agwate baathaîkîîtwe na cio ciakandûkana.

²⁷Mûnene ûyu aabakarîîtie aumbuthûka torooni. Akwona mîrango îrî mîrugûku aathûgaania agwate bagûtoorooka. Aacomoora rûyiû akîenda kwîbûraga.

²⁸Paûrû amuugîîria na inya, amwîra, “Ûtikeebûrage! Twinthe tûrî gûkû!”

²⁹Mûnene ûyu wa nceera eetia rûmonjo. Augia rwîro aathûngîra nceera ndeni. Eeturania nthîgûrû magûrûûni ma Paûrû na Sairas akiinainaga n'ûguaya.

³⁰Aûkîîra auma na bo nja. Abaûria, “Ntikûbûûria aba, n'ata mbûmba kûrûtha nkoonoka?”

³¹Paûrû bamwîra, “Îtîgia Mwathani Yiesû, nookoonokua. Na wana antû baaku bakamwîtîgia aboonokia.”

³²Paûrû na Sairas beera mûnene ûyu na antû baake bonthe ntûmwa ya Mwathani.

³³Amwe na gûtuga kwene, mûnene ûyu aathi na Paûrû na Sairas abathambia ironda. Paûrû bamûbaatithia amwe na antû baake bonthe.

³⁴Aacooka na baPaûrû nyomba yake, abaa irio. Mûnene ûyu na antû baake bonthe baakeneera gwîtîgia Ngai.

³⁵Rûûni rûkîîrî, anene ba taûni baatûma acikaarî, babeera bathi beere mûnene wa nceera bauga, “Antû bara ibarekue bathi.”

³⁶Mûnene ûyu eera Paûrû, “Anene baatûmana bauga woû na Sairas bûrekue bûthi. Kwoogu nwa bûthi. Na îthiini na ûkiri!”

³⁷Paûrû beera acikaarî babu baareetire ntûmwa, “Gûtirî mabîtia tûreerwa itûrûthîîte îndî itûraringirwe ibooko mbere ya antû, na tûrî Arooma na tiû! Baraugire twingîrwe nceera, îndî îîndî barîenda tuuma taûni îno na witho. Arî buru! Anene babu ibaaye barî bo batwîre na batuumagarie.”

³⁸Acikaarî babu baatûmîîtwe baacooka beera anene mantû mamu. Anene bakwîgua Paûrû na Sairas baarî Arooma, baamaka.

³⁹Baathi babaromba ûrekeri. Babaumagaria babaruta nceera babeera beenda baume taûni.

⁴⁰Paûrû na Sairas bakuuma nceera baathi kwa Rîndia. Baathi beekîra eetîgîri wîru. Rîru bauma taûni baathi.