Read tharaka NGÛGÎ 17 Bible Online

NGÛGÎ 17 - tharaka bible

NGÛGÎ 17

¹Paûrû baagendeera Ambiporis na Aporonia, baakinya taûni ya Thesaronike. Ikwarî na *sinagoogi ya Ayaundi taûni înu.

²Wata wîthîre Paûrû aathi sinagoogiini. *Sabatû waithatû ithingateene Paûrû aaranîria na bara baayaga ku bûra *Maandîko Maatheru maugîîte.

³Aboonia *Mesia naagîrîtwe aûragwa na ariûka. Paûrû abeera, “Yiesû ûyû nkûbûtûmîîria n'we Mesia.”

⁴Bamwe ba bara baathikîîrîîtie beetîgia, baagwatanîra na Paûrû na Sairas. Kîrî bo ikwarî na antû bataarî Ayaundi baarombaga Ngai, na ikwarî na aka ba îgweta baingî ba taûni înu.

⁵Ayaundi bara bateetîgia baatua kwîgua rûriitho. Beethîrania ntûrîka thokooni. Baûkia gîtuma taûni yonthe barî mûkondo. Baathi gûcûa Paûrû na Sairas nyomba ya muntû eetagwa Njasoni. Baabangîîte babeethîra ku babarute nja kîrî antû.

⁶Bakûbaaga baakuruthûra Njasoni na eetîgîri bara baarî gwake babaruta ome, babaira kîrî anene ba taûni. Baugîîria na inya beera anene, “Antû bara bakûthi bagîûkagia thîîna gûntû kunthe nthîgûrû, îîndî ibaraayire gûkû gwetû.

⁷Njasoni n'we abagwete ûgeni. Bonthe barîrûtha mantû marî kînyume na mawatho ma mûnene wetû, Kaisaarî. Bariuga kûrî mûnene ûngî eetagwa Yiesû.”

⁸Kîrîndî na anene bakwîgua ûgu kwagîa na gîtuma kîînene mûno.

⁹Anene bauga Njasoni na babu bangî baarî na bo barute baini. Bakûruta baarekua.

¹⁰Gûgûtuga eetîgîri beera Paûrû na Sairas bathi Berea. Bagûkinya noogo baathi *sinagoogiini.

¹¹Antû ba Berea ibaarî beega nkûrûki ya ba Thesaronike. Beetîgîra kiugo na wîru mûno. Baathoomaga *Maandîko Maatheru kîra ntugû bagîcûa kwona kana wabu bûra Paûrû na Sairas baabeeraga n'ûmma.

¹²Antû baingî ibeetîgiirie. Bamwe baao baarî aka baarî îgweta bataarî Ayaundi. Na kinya arûme baingî bataarî Ayaundi ibeetîgiirie.

¹³Ayaundi ba Thesaronike bakwîgua Paûrû naatûmîîrie kiugo kîa Ngai Berea, baathi noogo beengîîra antû.

¹⁴Eetîgîri bara Paûrû baarî na bo bamuumagaria na mpwî, baathi bantû rûteere rwa îria. Îndî Sairas na Timotheo bo baatigirwe Berea.

¹⁵Eetîgîri babu baakinyithia Paûrû taûni yeetagwa Athene. Bagîcooka Paûrû abatûma abeera beere Sairas na Timotheo batigaakarange ibamûthingate na mpwî bûra gûkîûmbîka.

¹⁶Paûrû arî taûni ya Athene eeteereete Sairas na Timotheo, ateegua bwega nkorooni akwona bûra antû baarombaga ngai cia ûrongo bûgana.

¹⁷Aathiyaga *sinagoogiini akaaranîria na Ayaundi na bara bataarî Ayaundi, bara baarombaga Ngai. Na thokooni naathiyaga kîra ntugû akaaranîria na bara eethagîra.

¹⁸Gîkundi gîa antû baûme mûno beetagwa Epekurio[9] na kîîngî gîetagwa Stoiki[10] baanjîîria gûturia Paûrû mbaara. Bamwe baao baûragia, “N'ata kîthege gîkî îîndî gîgûtûringîra gîtuma aaga gîkiuga?” Bangî bauga, “Arîkara ta mantû ma ngai ingî ingeni agûtûmîîria.” Babu baugire ûgu n'ûntû Paûrû aatûmagîîria mantû ma Yiesû na kûriûka gwake.

¹⁹Baira Paûrû kîamaani gîetagwa Ariopagas. Bauga, “Tûrîenda kûmenya n'ûrutani bûbi bûbû bûûgeni ûkwaragîîria.

²⁰Mantû mamwe ma mara twîgiirue i maageni mûno kîrî tiû. Twenda mûno kûmenya i mantû mabi?” (

²¹Antû bonthe ba Athene na ageni bara baatûîre ku baakaraga woogu gûtarî bu bakûrûtha. Kîra beendeete i kwaranîria mantû kana kwîrwa mara maayaga maageni.)

²²Paûrû aarûngama mbere ya kîama gîku kîa Ariopagas. Auga, “Antû ba Athene, inkwona bûrî antû ba ndini mûno,

²³n'ûntû ndiûngîîte taûni yenu indaroonire bira bûrombaga. Kûrî kîthînjîro kîmwe ndaroonire kîandîkîîtwe, ‘Kîrî Ngai ûra ataiyîkeene.’ Ûyu bûrombaga bûtaiyî n'ûû, n'we nkûbûtûmîîria bûmûmenya.

²⁴“Ngai ûra aûmbire nthîgûrû na bionthe bira birî ku, n'we Mwathani wa îgûrû na nthîgûrû na atikaraga iromberooni bia gwakwa n'antû.

²⁵Gûtirî gîntû muntû amweyaga arî ûbatu na kîo, n'ûntû n'we eeyaga antû bonthe mwoyo, mîruke ya gûkuuyia na bionthe.

²⁶Aûmbire antû ba mîgongo yonthe kuuma kîrî muntû ûmwe, aatûma batûûra nthîgûrû yonthe. N'we aatuire magiita mara antû bagaatûûra na gûntû kûra bagaatûûra.

²⁷Aûmbire muntû kaingo amûcûa akîondaondagia amwona. Îndî ûmma n'atî atirî kûraaya na woora ûmwe wacietû,

²⁸n'ûntû ûkeegua t'we ûtiîgua tûrî mwoyo, tûtiûmba kwanganga na ûtiîgua tûrî oogo. Wata bûra aini bamwe beenu baugire, ‘Wana tiû tûrî nciarwa ciake.’

²⁹“Kwoogu n'ûntû tûrî nciarwa ciake, tûtibatîîrue tûbuanaania Ngai na yûmba rîa kûrûthwa na thaabu, fetha, kana iiga rîcaîtwe na njara cia muntû kûringana na îthûgaanio rîake.

³⁰Kagiita kara antû bataiyî, Ngai ataabataragîra îbîtia rîru. Îndî îîndî augîîte nwa mwanka antû bonthe beerire,

³¹n'ûntû kûrî ntugû îra abangîîte kûgiitîra antû îgamba gûkûrûkîîra kîrî muntû ûmwe ûra aathuurire agîtûmagîra wagîru. Na noonanîîtie wabu i bu akaarûtha ûgu n'ûntû naariûkiirie muntû ûyu.”

³²Antû bakwîgua Paûrû aagweta mantû ma antû kûriûka, bamûthekeera. Îndî antû bamwe bamwîra, “Twenda kwîgua kaîrî ûgîtwîra mantû mama.”

³³Paûrû aathi aatiga akîama babu.

³⁴Kûrî antû bamwe baagwatanîîre na Paûrû, baatuîka eetîgîri. Ûmwe aarî mûkîama, eetagwa Ndionisias. Ûngî aarî mûka eetagwa Ndamaaris na bangî.