Read tharaka NGÛGÎ 18 Bible Online

NGÛGÎ 18 - tharaka bible

NGÛGÎ 18

¹Nyuma ya mantû mamu Paûrû auma Athene, aathi taûni yeetagwa Korintho.

²Eethîra Mûyaundi eetagwa Akuira noogo. Akuira aaciarîrîtwe Pontas. We na mwekûrû wake, Pirisiira, îgiitaani warîru nwarîo baarî bagûkinya. Baumîîte nthîgûrû ya Itaaria naara baarî mbere mûnene Kiraundia aruta watho auga Ayaundi bonthe baume taûni ya Rooma. Paûrû aathi kûbariûngîra.

³Baakarakaranga na bo bagîtumaga marema n'ûntû baarî atumi marema ta we.

⁴Na wakîra ntugû ya *Sabatû, Paûrû eegagua arî *sinagoogiini akîaranîria na Ayaundi na bara bataarî Ayaundi agîcûûgia kûboonia ûmma.

⁵Sairas na Timotheo bakûûya baumîîte Macendonia, Paûrû eeruta kûrû gûtûmîîria kiugo agîkûûyagîîra kîrî Ayaundi atî Yiesû n'we *Mesia.

⁶Ayaundi baaregana n'we bamûrumanga. Paûrû ababuruncîra nguo ciake abeera, “Îîndî n'îgûrû rîenu, t'îgûrû rîakwa kaîrî. Kwanjîîria îîndî nthiîte gûtûmîîria bara batarî Ayaundi.”

⁷Paûrû auma sinagoogiini înu aarî. Aathi mûciî warî waagu akubî wa muntû aarombaga Ngai eetagwa Taitias Njastas.

⁸Mûtongoria wa sinagoogi înu eetagwa Kirispas na antû bonthe ba mûciî wake beetîgia Mwathani. Na Akorintho bangî baingî kinya bo bakwîgua ntûmwa beetîgia, baabaatithua.

⁹Ûtugû bûmwe Mwathani aaria na Paûrû na njîra ya kîoneki. Amwîra, “Ûtikaamake. Îthi mbere na gûtûmîîria ûtagûtiga

¹⁰n'ûntû ndî amwe naawe. Gûtirî we agaakûrûthîra ûntû bûûthûûku n'ûntû antû baingî taûni îno n'antû baakwa.”

¹¹Kwoogu Paûrû aakara mwanka na nucu akîrutanaga antû kiugo kîa Ngai.

¹²Gario agûtuîka ngabana wa gîteere gîa Akaaya, Ayaundi barî amwe baabanga baagwata Paûrû, bamwira kîrî ngabana agiitîrwa îgamba.

¹³Beera ngabana, “Muntû ûyû arîeneeria antû akabeera barombe Ngai na njîra îtakûgwatanîra na watho.”

¹⁴Warîra Paûrû akîenda kwaria, Gario eera Ayaundi babu, “Ûkaaya kwîgua, Ayaundi, muntû ûyû ka kûrî watho aunîîte kana ûthûûku arûthîîte, ndabûthikîîria.

¹⁵Îndî ûkeegua i mîgambo, mariîtwa, kana watho bwenu bûgûkararanîria, thiriani mantû mamu bûrî bwingwa. Niû ntienda kûgiita îgamba ta rîrî.”

¹⁶Gario aabeengatia agu.

¹⁷Kîrîndî gîku kîagwata Sosithenes, mûtongoria wa sinagoogi, bamûturîra waagu ome Gario akîonaga îndî ataatindanîra na bo.

¹⁸Paûrû baakara îgiita rîraaya na eetîgîri ba Korintho, rîru abatiga aathi taûni yeetagwa Kenkiria eenjwa ntundu kûringana na wîthîre bwa Ayaundi n'ûntû kûrî wîrane aarî na bu na Ngai. Paûrû akuuma agu baatwa meeri na Pirisiira na Akuira baanjîîria rûgendo rwa kûthi nthîgûrû ya Sîîria.

¹⁹Bagûkinya taûni yeetagwa Ebeeso, Paûrû baathûkana na Pirisiira na Akuira. Paûrû aathi sinagoogiini kwaranîria na Ayaundi.

²⁰Ayaundi babu beera Paûrû eenda akarakarange, îndî Paûrû ateenda.

²¹Akîthi aatiga abeera, “Weegua i kwenda kwa Ngai nkaaya kaîrî.” Paûrû aathi aatwa meeri, auma Ebeeso.

²²Agûkinya Kaisaria aathi gûkeethia eetîgîri. Auma agu aathi Antiokia.

²³Agûkarakaranga Antiokia, auma agu aagendeera gûntû na gûntû nthîgûrû cia Garatia na Burugia agîîkagîra eetîgîri wîru.

²⁴Mûyaundi ûmwe aaciarîrîtwe Aregicandiria aaya Ebeeso. Eetagwa Apooras na aarî muntû wa kanyua karî mûrîo,[11] na naiyî *Maandîko Maatheru bwega.

²⁵Naarî ûmûrutane mantû ma Mwathani. Aatûmagîîria na akarutana mantû ma Yiesû na inya yake yonthe atakûbîtia. Îndî bûra aiyî bunka n'ûbaatithio bûra Njoana aatûmagîîria.

²⁶Aatua gûtûmîîria *sinagoogiini na ûcamba. Pirisiira na Akuira bakûmwîgua bamûthookia kwao. Bamûrutana mantû ma Ngai bwega nkûrûki.

²⁷Apooras akwîra eetîgîri nakwenda kûthi Akaaya, bamwîkîra wîru. Baandîkîra eetîgîri ba noogo baarûa bakîbeeraga bagwate Apooras ûgeni. Apooras agûkinya, aateethia mûno bara beetîgîîtie n'ûntû bwa ûtugi bwa Mwathani.

²⁸Aaturania mbaara mûno na Ayaundi. Abacinda mbere ya antû, oonania kûringana na Maandîko Maatheru, Yiesû n'we *Mesia.