Read tharaka NGÛGÎ 19 Bible Online

NGÛGÎ 19 - tharaka bible

NGÛGÎ 19

¹Apooras arî Korintho, Paûrû i rîo aakûrûkîîrîîte gûntû na gûntû, aaya kuumîîra Ebeeso. Eethîra eetîgîri bamwe oogo.

²Paûrû abaûria, “Anga bûreendamîîrwa i Kîrundu Ûmûtheru rîra bweetîgiirie?” Bamwîra, “Arî. Wana kwîgua tûteegua gîntû gîgwîtwa Kîrundu Ûmûtheru.”

³Paûrû abaûria, “Aabu n'ûbaatithio bûbi bwabaatithiirue?” Bamwîra, “Twabaatithiirue ûbaatithio bûra Njoana aabaatithanagia.”

⁴Paûrû abeera, “Njoana aabaatithagia antû kwonania bakwîrira meeyia maao. Eerire antû beetîgie ûra aayîîte nyuma yake, ta we Yiesû.”

⁵Bakwîgua ûgu baabaatithua kwa riîtwa rîa Mwathani Yiesû.

⁶Paûrû akûbaigîîra njara, Kîrundu Ûmûtheru abeendamîîra. Baanjîîria kwaria na nthiomi mwanya mwanya, na baatua kûroria.

⁷Bonthe baarî antû arûme ta îkûmi na baîrî.

⁸Bantû a kagiita ka mîeri îthatû, Paûrû aathiyaga *sinagoogiini agatûmîîria na ûcamba, akaaranîria na antû agîcûûgagia kûbakuuyia beetîgia mantû ma ûnene bwa Ngai.

⁹Îndî bamwe ba antû babu baûmia biongo, baarega gwîtîgia. Baaria mantû maathûûku îgûrû rîa ûrutani bwa Mwathani mbere ya antû. Paûrû aarekana na bo. Aathûkia bara beetîgagia bonka. Wakîra ntugû baakomanaga cukuru ya Tairanas,

¹⁰bantû a mîanka îîrî. Antû ba Îcia bonthe beegua kiugo kîa Mwathani, Ayaundi na bara bataarî Ayaundi.

¹¹Ngai naaringaga biama bia kûrigaria gûkûrûkîîra kîrî Paûrû.

¹²Antû baathûkagia itambaa Paûrû atongeete bakairîra aayie bio mbayua ciao ikathira, na bara beegagua barî na irundu biithûûku bikauma.

¹³Ikwarî na Ayaundi bamwe baariûngaga bagîcûûgagia kwa riîtwa rîa Mwathani Yiesû kwîngatia irundu biithûûku biuma kîrî bara beegagua barî na bio. Baabiîraga, “Ndîbwatha buuma ngîtûmagîra riîtwa rîa Yiesû ûra Paûrû atûmagîîria mantû maake.”

¹⁴Ikwarî na Mûyaundi aarî mûthînjîri ûra mûnene wa Ngai, eetagwa Sikeba. Naarî na nthaka mûgwanja ciarutaga ngûgî înu.

¹⁵Îgiita rîmwe bakîrûtha ûgu, kîrundu kîîthûûku kîabeera, “Yiesû imwiyî, na Paûrû imwiyî. Îndî biû i biû ba ûû?”

¹⁶Muntû ûyu aarî na kîrundu gîku aumbuthûkania na bo. Abakîria inya bonthe. Bauma nyomba înu na rwîro abatembûrangîrîte nguo baatigwa ûtheri na abatonyangîîte mîîrî.

¹⁷Mantû mamu maamenyekana Ebeeso n'Ayaundi bonthe na bara bataarî Ayaundi. Bonthe baagwatwa n'ûguaya mûno. Baatîîya riîtwa rîa Mwathani Yiesû.

¹⁸Baingî ba bara beetîgiirie baumbûra mbere ya antû mantû maathûûku monthe mara baarûthîîte.

¹⁹Na baingî ba bara baarutaga ngûgî ya kûringia baareeta mabuku mara baatûmagîra bamabîîthia antû bakîonaga. Baatara ûgûri bwa mabuku mamu monthe boona ciarî fetha ngiri mîrongo îtaano.[12]

²⁰Kiugo kîa Mwathani gîatamba na kîagîa inya nkûrûki na njîra ta înu.

²¹Nyuma ya mantû mamu, Paûrû aabanga kûgendeera Macendonia na Akaaya, acookeete Njerusaremu. Auga, “Nkaaya gûkinya noogo nwa mwanka nthi Rooma n'yo.”

²²Aatûma ateetheeria baake baîrî, Timotheo na Erastas. Abeera bathiyage Macendonia, we aatigangîîrwa Îcia.

²³Kagiitaani gaku ikwarî na thîîna înene mûno Ebeeso îgûrû rîa ûrutani bwa Mwathani.

²⁴Ikwarî mûturi eetagwa Ndemeterias aaturaga into bia îthaga rîa fetha. Aaturaga mûbuanaano wa kîrombero kîa ngai wa mûka eetagwa Aritemas. Biacaara înu yake nîatûmaga antû baingî boona ngûgî.

²⁵Ndemeterias eeta antû babu amwe na bara bangî ta bo. Abeera, “Akûrû, ibwiyî baita îra twonaga na ngûgî îno.

²⁶Îîndî ibwoneete na bweegua bûra muntû agwîtwa Paûrû akûrûtha. Arîîra antû atî, ngai ba kûrûthwa n'antû ti ngai ba mma. Na naûmbîîte gûtûma antû baingî boona ta ûmma. Na ti gûkû Ebeeso gunka, n'Îcia yonthe.

²⁷Biacaara yetû îrî ûgwatiini bwa kûgwetanîrua na ûthûûku. Na nkûrûki ya ûgu, kîrombero kîa ngai wetû, Aritemas, ûra mûnene, gîtionwa kîrî na gîtûmi kaîrî. Ngai ûra arombagwa Îcia na nthîgûrû yonthe nakaagîrua gîtûmi.”

²⁸Antû bakwîgua mantû mamu baagwatwa i mûthûûro. Baanjîîria kûringa gîtuma bakiugaga, “Aritemas wa Ebeeso i mûnene.”

²⁹Taûni yaûyûra gîtuma. Kîrîndî kîengana na muntû eetagwa Gayas na ûngî eetagwa Arîstakas, kîabagwata. Baarî Amacendonia na baathiyeenie na Paûrû. Kîrîndî kîabaira na taka kîeniini kîra baarûthagîra mîceemanio.

³⁰Paûrû neendaga kûthi boonana na antû babu, îndî eetîgîri bamûkaania.

³¹Na wana anene bamwe ba nthîgûrû înu ya Îcia, n'ûntû baarî acoore baake, baatûmana bamûkaania bamwîra atikaathi naagu kîeniini gîku.

³²Antû babu beethîreene kîeniini gîku ibaarigiceene. Bamwe bakiuga ûûgû, bangî ibakuuga bwao na bo, bakîyogaga. Baingî baao bataiyî kîra gîatûmîîte beethîrana.

³³Ayaundi baatindîka muntû eetagwa Aregisanda athi mbere bakîendaga aarîria antû. Aregisanda oonia antû na njara bakire akîenda kwaria îgûrû rîa Ayaundi.

³⁴Antû bakûmenya Aregisanda aarî Mûyaundi, baaringa gîtuma bonthe bantû ta a mathaa maîrî bakiugaga, “Aritemas wa Ebeeso i mûnene!”

³⁵Mûthiani mwandîki wa taûni aûmba gûkiria kîrîndî. Abeera, “Antû beetû ba Ebeeso, n'ûû ataiyî taûni ya Ebeeso n'yo îmenyagîîra kîrombero kîa Aritemas, ûra mûnene, ûra mûbuanaano wake waarûkire kuuma îgûrû?

³⁶N'ûntû gûtirî we akararia mantû mamu, kirîîriani na bûtikaarûthe nwa ata na mpwî mpwî.

³⁷Bûreetire antû baba aaga na tika baiyîîte iromberooni kana barumîîte ngai wetû.

³⁸Kwoogu, ûkaaya kwîgua Ndemeterias na bara bangî bagwatanîrîte n'we ngûgîîni barî na ûntû bakwîgua bathitangîra antû baba, kooti irî oogo na agiiti magamba barî oogo. Ibathi babathitange noogo.

³⁹Îndî ûkeegua n'ûntû bûngî, ûntû bûbu bûbatîîrue bwarîîrua na njîra yagîrîte.

⁴⁰Kûringana na bûra gûkari aaga îmunthî, tûrî ûgwatiini twaûmba kûthitangîrwa gîtuma gîkî. Gûtirî gîtûmi kîega tweyana twîtheteera n'ûntû bwa gîtuma gîkî.”

⁴¹Mwandîki ûyu akuuga ûgu eera antû baaragane bathi.