Read tharaka NGÛGÎ 20 Bible Online

NGÛGÎ 20 - tharaka bible

NGÛGÎ 20

¹Gîtuma gîku gîkûthira, Paûrû eeta eetîgîri. Abeekîra wîru, rîru abatiga aathi Macendonia.

²Paûrû aagendeera Macendonia agîîkagîra eetîgîri wîru na mantû maingî, mwanka aaya gûkinya nthîgûrû ya Angiriki.

³Aakara ku mîeri îthatû. Warîra arî akubî kûthi nthîgûrû ya Sîîria, aamenya Ayaundi ibamûbangîrîte. Aabanga acookeere Macendonia kaîrî.

⁴Baathi na muntû wa kuuma Berea, eetagwa Sopeta wa Piras, antû bangî baîrî ba kuuma Thesaronike, beetagwa Arîstakas na Sekundas, na ûngî wa kuuma Ndabi, eetagwa Gayas. Ibaarî kinya na Timotheo na antû bangî baîrî ba kuuma Îcia, beetagwa Tikikas na Turobimas.

⁵Antû babu baathi gûtweteera Tiroas.

⁶Nyuma ya *kîatho kîa mîgaate îtaimbithîîtue, twathi taûni ya Piripi twatwa meeri. Twathi twakinya Tiroas ntugû ya itaano, twabeethîra oogo. Twakara oogo ntugû mûgwanja.

⁷Ntugû ya mbere ya kiumia tweethîrana amwe n'ûntû bwa kûrîyanîra mûgaate. Paûrû aarîria antû. Na n'ûntû aarî araûke kûthi rûûni rûkîîrî, aaria mwanka ûtugû mainda.

⁸Ikwarî na taa inyingî ciankanaga ngorobaani înu twarî.

⁹Ikwarî na mûthaka ûmwe eetagwa Yutikas aakari ndiricaani. Paûrû akwaria mûno, mûthaka ûyu aagwatwa i toro. Akûmaama aagwa nthîgûrû kuuma ngorobaani înu ya ithatû twarî. Antû bakûthi beethîra arî ûmûkuû.

¹⁰Paûrû eendama noogo, aathi amûkumbata. Eera antû, “Bûtikaamake arî mwoyo!”

¹¹Paûrû beetia ngorobaani kaîrî, baang'enyûra mûgaate baarîa. Paûrû aarîria antû kwa îgiita rîraaya mwanka kwereerûka, rîru aathi.

¹²Antû beenûka na Yutikas barî na ûûmîîria.

¹³Paûrû atwîra tûthiyage n'ûntû we aabangîîte kûûyaga na magûrû. Tiû twatwa meeri twathiyaga taûni ya Asos ara Paûrû aarî atwîthîre.

¹⁴Akûûya atwîthîra Asos aatwa meeriini twathi taûni ya Mitireni.

¹⁵Rûûni twauma Mitireni twakûrûkîîra akubî na gîcîgîîrio kîa îria gîetagwa Kios. Ntugû înu îngî yathingatîîte twakinya gîcîgîîrioni kîa îria gîetagwa Samos. Ntugû înu îngî twakinya taûni ya Miritos.

¹⁶Paûrû aabangîîte tûtikaathûkîre Ebeeso. Ateendaga tûta îgiita Îcia n'ûntû naarî na mpwî cia gûkinya Njerusaremu weegua gûkîûmbîka, mbere ya ntugû ya *Pentekosti îkinya.

¹⁷Tûrî Miritos, Paûrû aatûmana kîrî akûrû ba kanica ya Ebeeso auga bathi boonane.

¹⁸Bagûkinya abeera, “Biû bwingwa ibwiyî bûra ndaratûûranagia naabi kagiita kara konthe tûraarî amwe, kuuma ntugû ya mbere rîra ndaayire Îcia.

¹⁹Ndararutaga ngûgî ya Mwathani ndî na kwînyithia kûûnene mûno na meethori ndeetûûra, ndaûmîîria magerio mara marambûyagîîra kuumania na mîbango îmîthûûku îra Ayaundi barambangagîra.

²⁰Ibwiyî gûtirî ûntû bûrî gîtûmi ndaremwa kûbwîra. Ndarabûtûmagîîria na nkabûrutana mbere ya antû na bûrî mîciî yenu.

²¹Ndarakûûyagîîra kîrî bonthe, Ayaundi na bara batarî Ayaundi nkabeera beerire bagarûke kîrî Ngai, beetîgie Mwathani wetû Yiesû Kîrîstû.

²²“Îîndî ga nkûbwîra, nthiîte Njerusaremu ntongorereetue i Kîrundu. Ntiyî bûra gûgaakarîka kîrî niû ndathi noogo.

²³Bûra bunka nkûmenya n'atî, Kîrundu Ûmûtheru ambîîrîîte wakîra taûni nkaathi nceera na kûnyamaarua ibimbeteereete.

²⁴Ntionaga mwoyo wakwa ûrî gîtûmi. Îromba rîakwa i nthirie ngûgî îra Mwathani Yiesû aampeere nduta, ntûmîîrie ntheto îmbega ya ûtugi bwa Ngai.

²⁵“Ndarabûriûngagîra nkîbûtûmagîîria mantû ma ûnene bwa Ngai, îndî îîndî ndaramenyire gûtirî we wacienu akaambona kaîrî.

²⁶Kwoogu îmunthî ga nkûbwîra, wana kinya muntû akaûra îîndî ntiûrua.

²⁷N'ûntû gûtirî ûntû ndaremwa kûbwîra. Ndarabwîraga bûra bunthe Ngai eendaga.

²⁸Kwoogu îmenyeereeni bwingwa na menyeeraani bara Kîrundu Ûmûtheru athuurîîte bûbacûûbîra. Rîîthiani kanica ya Ngai îra atuîkithîîtie yake na nthakame ya Mwana wake.[13]

²⁹Imbiyî ndathi antû baathûûku ta ncûgi ing'etu bakaaya beethûngîrie gîkundiini kîenu babûthûûkie batarî na kîao.

³⁰Na kinya kîrî biû ûkeegua kûrî na antû bakaaragia ûrongo bakîenda kweneeria eetîgîri batuîka athingati baao.

³¹Kwoogu karagaani bwîmenyeereete. Na ririkanagaani mbîtûûrîîte meethori mîanka îthatû, mûthenya na ûtugû, ntakûnoga i gûkaania wakîra ûmwe wacienu.

³²“Îîndî ndîbûtiga bûrî ûmenyeeriini bwa Ngai bûrî na kiugo gîa ûtugi bwake. Kiugo gîake kîrî inya ya gûkûria wîtîgio bwenu na kîrî inya ya gûtûma bwewa rûgai amwe na bara bonthe bathereetue.

³³Gûtirî rîo ndeerirîria mbia kana nguo cia muntû.

³⁴Wana biû bwingwa ibwiyî ndararutaga ngûgî ningwa ngeecûîra bira ndareegagua ndî bata na bio na ngacûîra bara barantûmîkagîra bira bareegagua barî bata na bio.

³⁵Kîrî mara monthe ndararûthaga ndarabwonagia na njîra cionthe atî tûbatîîrue tûrutaga ngûgî na inya ta ûgu, kaingo tûteethagia bara batakwîûmba. Na tûririkanageeni biugo bia Mwathani Yiesû bira augire wengwa atî, ‘Ûra eeyanaga nathaarimagwa nkûrûki ya ûra eeyagwa.’ ”

³⁶Paûrû akûrîîkia kwaria, baaturia maru aaromba.

³⁷Bonthe baarîra mûno bakîmûkîragîra nkingo, bakamûcunca.

³⁸Kîra kîabeekîrîte kîeba mûno, i kwîgua Paûrû aabeerire batikooro bamwona kaîrî. Bamuumagaria bamûkinyithia meeriini.