Read tharaka NGÛGÎ 21 Bible Online

NGÛGÎ 21 - tharaka bible

NGÛGÎ 21

¹Tûgûtigana na bo twatwa meeri twathi tûtakwathûkîra mwanka twakinya gîcîgîîrioni kîa îria gîetagwa Kos. Rûûni twakinya gîcigîîrioni gîetagwa Rondes. Twathi twakinya taûni yeetagwa Patara.

²Twethîra meeri oogo îthiîte Boinîcia. Twatwa yo twathi.

³Tûgûkinya bantû amwe twanjîîria kwona gîcîgîîrio gîa Kupooro. Twakûrûka Kupooro tûkîmîonaga mbarî ya ûmotho, twathi twakinya nthîgûrû ya Sîîria. Twarûngama taûni ya Turo n'ûntû kûrî mîrigo yarutagîrwa oogo.

⁴Tweethîra eetîgîri oogo, twakara na bo ntugû mûgwanja. Eetîgîri babu baakaania Paûrû kwa inya ya Kîrundu bamwîra atikaathi Njerusaremu.

⁵Kagiita geetû ga kûthi gagûkinya, bonthe amwe na eekûrû baao na twana batuumagaria twauma taûni batûkinyia rûteere rwa îria. Twaturia maru twinthe twaromba.

⁶Twatiganîra na bo agu, tiû twatwa meeri na bo beenûka.

⁷Twathi mbere na rûgendo kuuma agu Turo, mwanka twakinya Piteromeas. Twakeethia eetîgîri ba noogo na twakara na bo ntugû îmwe.

⁸Rûûni twathi kaîrî mwanka twankinya Kaisaria, twakara kwa mûtûmîîria ûmwe eetagwa Piripû. Aarî ûmwe wa antû mûgwanja bara baathûrîîtwe gûteetheeria atûmwa Njerusaremu.

⁹Piripû naarî na aarî bana beetwe kîewa kîa ûroria.

¹⁰Tûgûkaranga ntugû igana ûna, kîroria gîetagwa Agabas kîaya kiumîîte Njundea.

¹¹Aathûkia mûcibi wa Paûrû eeboga na uu magûrû na njara. Auga, “Kîrundu Ûmûtheru ariuga ûûgû, ‘Mwene mûcibi ûyû aathi Njerusaremu i bu akoogwa ûûgû n'Ayaundi, anenkanîrwe kîrî antû batarî Ayaundi.’ ”

¹²Twinthe amwe na bara bangî baarî agu tûkwîgua ûgu twereka Paûrû twamwîra atikaathi Njerusaremu.

¹³Paûrû atwîra, “Ibûkûndîthia kîeba bûkîndîrîra! Indîthuuranîrîte gûkuîra Njerusaremu n'ûntû bwa Mwathani Yiesû, tatiga kûthaîkwa akî.”

¹⁴Tûkwona gûtirî bu tûkîrûtha agarûra mathûgaania maake, twarekana n'we twauga, “Kwenda kwa Mwathani ikûrûthîke!”

¹⁵Tûgûkaranga agu bantû a ntugû igana ûna, twebîthîrania kûthi Njerusaremu.

¹⁶Twathiyania na bamwe ba eetîgîri ba Kaisaria, batwira kwa muntû eetagwa Mûnaaconi, wa kuuma gîcîgîîriooni gîa Kupooro, twakara agu gwake. Mûnaaconi aarî ûmwe wa eetîgîri ba mbere.

¹⁷Tûkûthi Njerusaremu, eetîgîri bara tweethîîre batûgwata ûgeni bwega mûno.

¹⁸Rûûni twathiyania na Paûrû kûriûngîra Njakubu. Twethîra kinya akûrû ba kanica bonthe oogo.

¹⁹Paûrû abakeethia. Abeera bunthe bûra Ngai aarûthîîte kîrî bara bataarî Ayaundi gûkûrûkîîra ngûgîîni yake.

²⁰Bakwîgua mantû mamu baakumia Ngai. Beera Paûrû, “Mûruayia, ûtikwona kinya magiri mama ma Ayaundi beetîgîîtie na barî na wîru bwa kûthingata *watho bwa Musa?

²¹Ibeegîîtue ûrutanaga Ayaundi bonthe bara batûîre nthîgûrû ingî ûkîbeeraga batige kûthingata watho bwa Musa, batige gûtaanaga aana baao na batigane na wîthîre bwetû bwa Kîîyaundi.

²²N'ata tûkûrûtha n'ûntû nwa mwanka bamenye ûrî gûkû?

²³Rûtha bûra tûgaakwîra. Aaga kûrî na antû bana barî na wîrane na Ngai.

²⁴Îthiyania na bo bakîthi kûtherua ûtherue na woû na ûbarîîrîîre mbia beenjwe ntundu kîongo. Ûkarûtha ûgu antû bonthe bakaamenya mantû mara bareegagua i ma gûtuîrîîrwa, boone wabu woû wengwa nûthingataga watho bwa Musa.

²⁵Îgûrû rîa eetîgîri bara batarî Ayaundi, itwabaandîkîîre baarûa twabeera bûra twatuire. Twabeerire batikaarîe irio bia kûrutîra ngai cia ûrongo, batikaarîe nyama irî na nthakame, batikaarîe nyama cia nyamû îrî îmbite, na batikaarute ngûgî cia ûmaramari.”

²⁶Kwoogu rûûni Paûrû aathûkia antû babu bana aathi na bo, baatherua barî amwe. Rîru Paûrû aathi nyomba ya Ngai kûmenyithia antû i kagiita kagana ata kûtherua kwao gûkaathûkia, na irî mûthînjîri wa Ngai akaarutîra woora ûmwe waciao kîgongwana.

²⁷Ntugû mûgwanja cia kûtherua kwao irî akubî kûthira, Ayaundi bamwe ba kuuma nthîgûrû ya Îcia boona Paûrû nyomba ya Ngai. Beengîîra kîrîndî kîamûgwata

²⁸bakîringaga gîtuma bakiugaga, “Antû beetû ba Isiraeri, tûteethieni! Muntû ûyû n'we akûthi akîrutanaga antû gûntû kunthe mantû maathûûku îgûrû rîetû, tiû Ayaundi, watho bwetû, na bantû aaga atheru.” (

²⁹Baugire ûgu n'ûntû ibooneete Tirobimas wa kuuma Ebeeso barî na Paûrû taûni, baathûgaania Paûrû naamûthûngîîrie nyomba ya Ngai.)

³⁰Gîtuma kîaûyûra taûni yonthe. Antû bauma nteere cionthe baugîîtie, baaya baagwata Paûrû bamûkururia bamûruta ome ya nyomba ya Ngai, mîrango yaingwa.

³¹Kîrîndî kîabangîîte kûûraga Paûrû. Mûnene wa acikaarî ba Rooma aamenyithua. Eerwa Njerusaremu yonthe i gîtuma kîtheri.

³²Warîo mûnene ûyu aathûkia acikaarî na aniini baake baathi noogo na mpwî. Kîrîndî gîkwona mûnene aayîîte na acikaarî, baatiga kûringanga Paûrû.

³³Mûnene aathi ara Paûrû aarî. Aaruta watho auga agwatwe athaîkwe na nyororo ciîrî. Rîru aûria, “Muntû ûyû n'ûû na n'ata arûthîîte?”

³⁴Antû baanjîîria kûyoga. Bamwe bakiuga ûûgû, bangî ibakuuga bwao na bo, mwanka gwatuîka mûnene atikîûmba kûmenya n'ata gwakarîkîîte. Kwoogu aaruta watho auga Paûrû airwe kambîîni.

³⁵Bagûkinya ngaatiini cia gwîtia kambîîni, kîrîndî gîatua gûtindîkana mûno mwanka gwatuîka acikaarî nwa bakamatire Paûrû.

³⁶Kîrîndî kîamûthingata gîkiugaga na inya, “Naûragwe!”

³⁷Acikaarî barî akubî gûkûrûkia Paûrû kambîîni, Paûrû aaromba mûnene rûûtha amwîra, “Waûmba kûmbîtîgîîria ngakwîra?” Mûnene ûyu amûûria, “Îka nthî nwiyî Kîîngiriki?

³⁸I woû Mûmiisiri ûra aatongoreerie antû ngiri inya baaregana na watho baathi bwa rwanda baatua kûrûa na thirikaarî?”

³⁹Paûrû amûcookeria amwîra, “Arî, niû ndî Mûyaundi. Nciarîrîtwe Taarisas gîteere gîa Sirîsia, taûni îrî îgweta rîînene mûno. Itû, mbîtîgîîria mbarie na antû baba.”

⁴⁰Mûnene eetîgîîria Paûrû. Arûngi waagu ngatiini aûkîîria njara. Antû bagûkira, aaria na bo na Kîîyaundi. Abeera,