Read tharaka NGÛGÎ 24 Bible Online

NGÛGÎ 24 - tharaka bible

NGÛGÎ 24

¹Nyuma ya ntugû itaano, mûthînjîri ûra mûnene wa Ngai eetagwa Anania aaya Kaisaria barî na akûrû bagana ûna na mûgambi ûmwe eetagwa Teetaras. Baathi kîrî ngabana Berîksi bamwîra kîra baathitangîrîte Paûrû.

²Paûrû aareetwa. Teetaras aanjîîria gûtarania kîra baathitangîrîte Paûrû. Auga, “Mûkaathe Berîksi, ûtongoria bwaku bwega ibûtwete ûkiri îgiita rîîraaya na mantû meega maareetwa maateethia nthîgûrû yetû.

³Rîonthe itûgûcookagîria nkaatho inyingî mûno n'ûntû bwa mantû mamu monthe.

⁴Tûtagûgûteera îgiita, itûgûkûûria wenda ûtûthikîîrie îgiita rîîkai.

⁵“Muntû ûyû ti mwega. Arîriûnga nthîgûrû yonthe agîtûmaga Ayaundi baûkia gîtuma. N'we mûtongoria wa gîkundi kîra gîkwîbîta Anasarini.

⁶Na kinya naracûûgagia gwaka nyomba ya Ngai mûgiro. Tûkûmwîthîîria akîrûtha ûgu i rîo tûramûgwatire.[15]

⁸Wana woû wamûûria ûkaamenya tûtikûmûtuîrîîra.”

⁹Ayaundi beetîgîîria bauga mantû mamu i ma mma.

¹⁰Ngabana oonia Paûrû na njara aarie. Paûrû auga, “Inkwîgua nkeneete nkîîtheteera ndî mbere yaku n'ûntû imbiyî ûtûîre ûrî mûgambi wa nthîgûrû îno mîanka îmingî.

¹¹Ntugû îkûmi na ciîrî ti nthiru kuuma nkûthi Njerusaremu kûromba. Na ûkeenda kûmenya mantû mama nwa ûmenye.

¹²Tika antû baba baambîthîîre nyomba ya Ngai ngîturania mbaara. Na tika baambîthîra *sinagoogiini kana taûni nkîngîîra antû baûkia gîtuma.

¹³Na wana bationa ûkûûyî bwa kwonania wabu indûthîîte mantû mama bakuuga.

¹⁴Bûra mbûmba gwîtîgîîria ntagûkwitha n'atî, ndombaga Ngai ûra biûyûûyû beetû baarombaga nkîthingataga ûrutani bûra antû baba baugaga i bwa ûrongo. Kaîrî imbîtîgîîtie bûra bunthe bwandîkîîtwe mabukuuni ma watho na ma iroria.

¹⁵Na ndî na wîrîgîîro kîrî Ngai wata antû baba atî antû bakaariûkua, bara baagîru na bara batarî baagîru.

¹⁶Kwoogu rîonthe ncûûgagia kwîgua atî, nkorooni yakwa ntikwîgua ndî na mabîtia kîrî Ngai kana kîrî muntû.

¹⁷“Nyuma ya mîanka îmingî indacookire Njerusaremu mbirîrîte antû beetû bara nkîa ûteethio na nkîrutîra Ngai kîgongwana.

¹⁸Rîru bambîthîîre nyomba ya Ngai, i mantû ma kûtherua ndarûthaga. Gûtirî kîrîndî ndaaragîîria na gûtirî gîtuma kîarî oogo.

¹⁹Îndî kûrî Ayaundi bamwe ba kuuma nthîgûrû ya Îcia twarî na bo gûku nyomba ya Ngai. Na babu i bo babatîîrue wîgua barî aaga bakauga mbere yaku kana weegua kûrî bu bûûthûûku ndarûtha.

²⁰Kana tatiga antû baba barî aaga bakwîre weegua kûrî mabîtia boona ndî na mo nkûgambithua i kîama.

²¹Twanga mîgambo îra ndaugîîrie na inya ndî mbere yao, ndabeera, ‘Bûrîngambithia îmunthî n'ûntû bwa bûra mbîtîgîîtie antû bakaariûkua!’ ”

²²Berîksi naiyî bwega mantû ma ûrutani bwa bara baathingatîîte Yiesû. Aarûngamia îgamba. Auga, “Nkaagiita îgamba rîrî rîra Rucias, mûnene wa acikaarî, akaaya.”

²³Berîksi aaruta watho eera mûrûngamîîri ûmwe wa acikaarî akarie Paûrû. Îndî auga eeyagwe kaanya ga kwanganga na acoore baake beetîgagîîrue bakaaya bakamûreetera kîra ûkeegua arî na ûbatu bwa kîo.

²⁴Nyuma ya ntugû igana ûna, Berîksi aaya na mwekûrû wake. Mwekûrû wake eetagwa Ndurusiira na aarî Mûyaundi. Berîksi aaruta watho auga Paûrû areetwe. Akûreetwa, amûthikîîria akîarîîria mantû ma wîtîgio kîrî Kîrîstû Yiesû.

²⁵Paûrû akûthi na mbere akîaragîîria mantû ma wagîru, kûrega kwathwa i mwîrî, na mantû ma ntugû îra îkaaya rîra antû bakaagiitîrwa îgamba, Berîksi aagwatwa n'ûguaya. Amwîra, “N'ûûgu îîndî. Îthi, ngagwîta kaîrî rîra ûkeegua ndî na kaanya.”

²⁶Na kaîrî, Berîksi neerîgagîîra Paûrû akamûgukuma. Kwoogu i kîo gîatûmaga akara agîtûmanangaga aaria n'we.

²⁷Mîanka îîrî îkûthira, Pokias Bestas aatuîka ngabana bantû a Berîksi. Na n'ûntû Berîksi neendaga gûkenia Ayaundi, akîthi aatiga Paûrû waarî nceera.