Read tharaka NGÛGÎ 25 Bible Online

NGÛGÎ 25 - tharaka bible

NGÛGÎ 25

¹Nyuma ya ntugû ithatû kuuma Bestas akûûya, auma Kaisaria aathi Njerusaremu. Akûthi noogo

²*athînjîri bara banene ba Ngai na atongoria ba Ayaundi bamwîra mantû mara baugaga Paûrû naarûthîîte. Bamûûria

³abarûthanîrie mantû, Paûrû areetwe Njerusaremu. Mûbango wao warî bamûûragîre njîraani.

⁴Bestas abeera, “Paûrû agaakara Kaisaria na nkaathi noogo nyuma ya îgiita rîtarî rîraaya.

⁵Kwoogu îtîgîîriani nkîthi tûthiyanie na atongoria bamwe beenu bakauge kîra bûkûmûthitangîra, weegua kûrî mabîtia muntû ûyu arûthîîte.”

⁶Nyuma ya ntugû ta inyanya ûgu kana îkûmi, Bestas aacooka Kaisaria. Rûûni rwa ntugû înu aakinyire, aathi aakara nthîgûrû gîtîîni kîra aakaragîra akîgiita magamba. Aaruta watho auga Paûrû areetwe.

⁷Paûrû akûreetwa Ayaundi bara baumîîte Njerusaremu bamwirigîra. Baatarania mantû maingî maathûûku mûno mara baugaga narûthîîte, îndî bataûmba kwonania ûmma bwa mo.

⁸Paûrû eetheteera. Auga, “Gûtirî mabîtia ndûthîîte ta kuuna watho bwa Kîîyaundi, gwîkîra nyomba ya Ngai mûgiro, kana kûrega kwathîkîra Kaisaarî.”

⁹Bestas akîenda gûkenia Ayaundi, aûria Paûrû, “Wenda kwirwa Njerusaremu nkagiitîre îgamba rîaku noogo?”

¹⁰Paûrû amwîra, “Ndûngi mbere ya kooti ya Kaisaarî. Na aaga noogo mbatîîrue ngiitîrwa îgamba ndî. Gûtirî mabîtia ndûthîrîte Ayaundi. Wana woû nûkûmenya ûgu bwega mûno.

¹¹Îndî nkaaya kwonwa ndûthîîte ûntû bwagîrîte ntuirwa kûûragwa, ntiuga ntikaûragwe. Îndî ûkaaya kwîgua mantû mama antû baba bakûnthitangîra i ma ûrongo, gûtirî we abatîîrue aanenkanîra kîrî bo. Kwoogu inkûromba ngiitîrwe îgamba i Kaisaarî wengwa!”

¹²Nyuma ya Bestas akwaranîria na bara baamweyaga ûkûrû, eera Paûrû, “N'ûntû wauga ûrîenda kûgiitîrwa îgamba i Kaisaarî, îîndî nwa kîrî Kaisaarî ûkairwa.”

¹³Nyuma ya ntugû igana ûna, mûnene Angiripa na mwaragina eetagwa Mbanis baaya Kaisaria gûkeethia Bestas.

¹⁴Bagûkaranga ntugû inyingî, Bestas eera mûnene mantû ma îgamba rîa Paûrû. Abeera, “Kûrî muntû arî aaga aatigirwe nceera i Berîksi.

¹⁵Rîra ndarî Njerusaremu, *athînjîri bara banene ba Ngai, na akûrû ba Ayaundi baamûthitangire kîrî niû, bambîîra ngiite îgamba rîake mbuge nabîtîîtie.

¹⁶“Ndabeera ti wîthîre bwa Arooma kûgiitîra muntû îgamba mbere ya eewa kaanya ga kûgambana na bara bamûthitangîîte, eetheteera.

¹⁷Bakûûya aaga ntaata thaa. Gwakeere rûûni rûkîîrî ndakara gîtîîni kîra ndakaragîra nkîgiita magamba ndauga muntû ûyu areetwe.

¹⁸Babu baamûthitangîîte bakûrûngama kwaria, nteegua ûntû bûûthûûku kîrî mara ndeerîgîîrîîte kwîgua.

¹⁹Bûra ndeegiirue, i mbaara baaturanagia n'we îgûrû rîa ndini yao na îgûrû rîa muntû aakuire eetagwa Yiesû, îndî Paûrû augaga arî mwoyo.

²⁰Nkwaga bwa kuuga îgûrû rîa mantû mamu, kwoogu ndaûria Paûrû kana weegua akîenda akairwa Njerusaremu nkathikîîria îgamba rîake noogo.

²¹Îndî Paûrû aûria agiitîrwe îgamba i Kaisaarî. Kwoogu ndaruta watho ndauga akarue bwega mwanka rîra nkoona kaanya ga kûmûtûmanîra kîrî Kaisaarî.”

²²Angiripa eera Bestas, “Niû ndeenda kûthikîîria muntû ûyu akîaria.” Bestas amwîra, “Ûkamûthikîîria rûû.”

²³Rûûni Angiripa na Mbenike baakinya beekîrîte nguo bwega mûno, beethîra beeteereetwe na gîtîîyo kîînene. Baakûrûka kûra magamba maagiitagîrwa. Baayanîîtie na atongoria ba ndûa na antû ba taûni înu bara baarî îgweta. Bestas aaruta watho auga Paûrû areetwe.

²⁴Bestas auga, “Mûnene Angiripa na bara bwinthe bûrî aaga amwe naati. Aaga mbere yenu kûrî na muntû ûyû. Ayaundi bonthe bara barî Njerusaremu na bara barî gûkû bamûthitangîîte kîrî niû bakîringaga gîtuma bakauga atibatîîrue eegua arî mwoyo.

²⁵Gûtirî mabîtia ndoona arûthîîte matûma atuîrwa kûûragwa. Îndî akuuga arîenda kûgiitîrwa îgamba i Kaisaarî, mbangîîte kûmûtûmanîra kîrî we.

²⁶Ntirî na ûntû bwa kwandîkîra mûnene wakwa mmwîra îgûrû rîake. Kwoogu gîku i kîo gîtûmîîte mbuga areetwe mbere yenu bwinthe, na mûno mûno, kîrî woû, mûnene Angiripa, kaingo ndathikîîria bûkîmûûria biûria mbona kana kûrî bu nkeegua bwa kwandîkîra mûnene mmwîre.

²⁷Ndîona n'ûtaku mûno kuuga mûgwate airwe ntakuuga kîra athitangîrîtwe.”