Read tharaka NGÛGÎ 28 Bible Online

NGÛGÎ 28 - tharaka bible

NGÛGÎ 28

¹Tûgûkinya rûteere tûrî mwoyo twinthe twaya kûmenya gîcîgîîrio gîku gîetagwa Mûrita.

²Antû ba Mûrita batûgwata ûgeni twinthe bwega mûno. Batûbuîra mwanki n'ûntû ikwauraga na ikwarî na mpîo.

³Paûrû aarûma nkû. Agîîkîra mwankiini njoka yamongooroka ku n'ûntû bwa mûrugutîra, yamûrûma njara yakara îcuncuuri.

⁴Antû ba gîcîgîîrio gîku bakwona njoka îcuncuuri njara ya Paûrû, beerana, “Na mma muntû ûyû i mûûragani. Wana weegua noonokire kûûra na îria, ngai itireetîgîîria atûûra mwoyo.”

⁵Paûrû aaburunca njoka înu yamûrûmûka, yagwa mwankiini, na gûtirî bu aakara.

⁶Antû babu baakara beeteereete boona Paûrû akiimba kana agîturana nthîgûrû akua. Bagweteera îgiita mma wabatoona agîkara nwa ata, baagarûka mathûgaanio. Bauga, “Arî, muntû ûyû i ngai.”

⁷Akubî na agu twarî ikwarî na mûnda wa mûnene wa gîcîgîîrio gîku. Mûnene ûyu eetagwa Pubirias. Atûgwata ûgeni twakara gwake ntugû ithatû tûkîmenyagîîrwa bwega mûno.

⁸Îthe wa mûnene ûyu naamaami ûrîrî aayîîtue kûbîîyanîra kwa mwîrî na rwaro rwa nthakame. Paûrû aathi gûku aamaami amûrombera amwaigîîrîîte njara, amworia.

⁹Gûgûkarîka ûgu, bara bangî baayîîtue gîcîgîîrioni gîku baaya kîrî Paûrû abooria.

¹⁰Antû ba gîcîgîîrio gîku ibaatûtîîyîîte mûno. Kagiita geetû ga kûthi gagûkinya, batwaa into biingî bira twarî na ûbatu bwa bio.

¹¹Nyuma ya mîeri îthatû twatwa meeri îngî ya kuuma Aregicandiria. Yarî na mîbuanaano ya ngai ba maatha beetagwa Kastas na Poraksi. Yakarîîte agu yeteereete kagiita ga mpîo gakûrûka.

¹²Tûkuuma agu twathi twakinya taûni yeetagwa Sairakius, twakara oogo ntugû ithatû.

¹³Twauma agu twathi mbere na rûgendo twakinya taûni yeetagwa Regiamu. Rûûni rwa ntugû înu, ikwarî na ruuo rwabuutanaga ruumîîte bwa njara ya ûmotho. Twaûmba kûthi mwanka aûkeeni twakinya taûni yeetagwa Putiori.

¹⁴Tweethîra eetîgîri oogo batwîra tûkarakarange na bo kiumia kîmwe. Rîru twathi twakinya Rooma.

¹⁵Eetîgîri ba Rooma ibeegîîtue tûkaaya. Kwoogu ibaatûthagaanîîte. Bamwe baatweteereete bantû antû baarîîkanaga eetagwa Boromu ya Apiûs. Na bara bangî baatweteereete bantû eetagwa ‘Nyomba Ithatû cia Ageni.’ Paûrû akwona eetîgîri babu aacookeria Ngai nkaatho. Eegua aagîa wîru.

¹⁶Tûgûkinya Rooma, Paûrû eetîgîîrua akara nyomba yake wenka. Îndî naarî na mûcikaarî wa kûmûkaria.

¹⁷Nyuma ya ntugû ithatû, Paûrû eeta atongoria ba Kîyaundi mûceemanio. Bakwîthîrana abeera, “Antû beetû, amwe na kwîgua gûtirî mabîtia ndarûthîrîte antû beetû kana mbuna kîîwîthîre kîa biûyûûyû bietû, ndagwatirwe ndathaîkwa Njerusaremu ndanenkanîrwa kîrî Arooma.

¹⁸Arooma bakûngambithia ibeendaga kûndekia n'ûntû batoona ndî na mabîtia makîûmba gûtûma ntuîrwa kûûragwa.

¹⁹Îndî Ayaundi bamwe baarega ndekua. I rîo ndoonire i kaaba îgamba rîakwa rîgiitwe i Kaisaarî. Îndî ntikwenda kûgarûka antû beetû mbathitanga.

²⁰Kwoogu gîku i kîo gîtûmîîte mbwîta mbûmenyithia atî, nthaîkîîtwe na nyororo ino n'ûntû bwa wîrîgîîro bûra Aisiraeri barî na bu.”

²¹Bamwîra, “Gûtirî baarûa twagwata kuuma Njundea îkîgwetaga mantû maaku, kana muntû aaya atwîra ntheto ciaku inthûûku.

²²Îndî kaaba ûgatwîra tûkamenya bûra ûkûthûgaania n'ûntû bûra twiyî n'atî gûntû kunthe antû barîaria mantû maathûûku îgûrû rîa gîkundi kîenu.”

²³Baatua kîatho rîra bagaakomana kaîrî. Ntugû îgûkinya, antû baaya agu Paûrû aakaraga kwa wingî, na gûkûrûkîîria baakûrûkîîria. Paûrû abatûmîîria mantû ma ûnene bwa Ngai kuuma rûkîîrî mwanka riûa rîathûa. Aacûûgagia boona ûmma bûra bûgweteetwe bûgîkonagia Yiesû kûringana na bûra *watho bwa Musa buugîîte na bûra mabuku ma iroria maugîîte.

²⁴Bamwe baao ibeetîgiirie mantû mamu Paûrû aabeeraga. Îndî kûrî bara baaregire gwîtîgia.

²⁵Baariganwa baanjîîria kwaragana bathi. Paûrû abeera ûntû bûmwe, atî, “Wabu n'ûmma bûra Kîrundu Ûmûtheru aatûmire kîroria Isaaya eera biûyûûyû biao.

²⁶Aabeerire, ‘Îthi wîre antû baba, “Bûkeegua kaîrî na kaîrî, îndî bûtiiciûkîrwa. Bûgaacûûba kaîrî na kaîrî, îndî bûtiona.”

²⁷N'ûntû antû baba i baûmo biongo. Bakunîkîîte matû na baincia. Ûkeegua ti bu, wîgua meetho maao makîonaga, matû maao makîîgagua, na mathûgaania maao magîciûraga mantû, bakagarûka kîrî niû nkabooria.’ ”

²⁸Paûrû akîthiria, aarîîkia na kûbeera, “Kwoogu ndîenda bûmenya atî bara batarî Ayaundi ibareerirwe ntûmwa ya Ngai ya wonokio, bo bakeegua.” [

²⁹Paûrû akuuga ûgu Ayaundi baathi bagîturanagia mbaara mûno.][17]

³⁰Paûrû aakara agu aakomboreete wengwa mîanka îîrî yûyûri, akîgwataga ûgeni muntû wonthe ûra aayaga kûmûriûngîra.

³¹Aatûmagîîria antû mantû ma ûnene bwa Ngai na akîbarutanaga mantû ma Mwathani Yiesû Kîrîstû arî na ûcamba mûno, gûtarî kîrigîîria.