Read tharaka NGÛGÎ 4 Bible Online

NGÛGÎ 4 - tharaka bible

NGÛGÎ 4

¹Petûrû na Njoana wabakîaragia na antû, *athînjîri ba Ngai, mûnene wa akaria ba nyomba ya Ngai na *Asandukai baaya.

²Ibaathûûri n'ûntû Petûrû baarutanaga antû bakabeera atî Yiesû naariûkire.

³Baagwata Petûrû na Njoana. Na n'ûntû mwindu nwarî akubî kûruma, babaingîra nceera mwanka rûûni babagaambithia.

⁴Îndî amwe na ûgu, antû baingî ba bara beegiirue mantû mamu Petûrû na Njoana baaragia beetîgia. Kîrî bo arûme baarî ta ngiri itaano.

⁵Gûgûkea rûûni atongoria ba Ayaundi, akûrû, na aarimû ba watho beethîrana Njerusaremu.

⁶Mûthînjîri ûra mûnene wa Ngai eetagwa Anas naarî oogo. Na kinya Kayabas, Njoana, Aregisanda na antû ba mûciî wa mûthînjîri ûra mûnene wa Ngai ibaarî oogo.

⁷Petûrû na Njoana baareetwa. Baarûngamua mbere yao. Kîama kîa Ayaundi kîabaûria, “N'inya mbi bûratûmîîre kûrûtha bûra bûrarûthire na n'ûû arabwete watho?”

⁸Petûrû aûyûrîîtwe i Kîrundu Ûmûtheru abacookeria abeera, “Atongoria ba antû na akûrû,

⁹i kî n'ûntû îmunthî bûgûtûgambithia n'ûntû bwa kûrûtha ûntû bwega kîrî muntû ûyû araarî kîonje? Na i kî n'ûntû bûgûtûgambithîria bûra arabuuyangire?

¹⁰Biû na antû ba Isiraeri bwinthe bûbatîîrue bûmenya muntû ûyû araarî kîonje abuîte n'ûntû bwa riîtwa rîa Yiesû Kîrîstû wa Nasareethi! Yiesû ûra bwambithiirie mûtharabaani, îndî Ngai amûriûkia.

¹¹Kwandîkîîtwe *Maandîkooni Maatheru, ‘Iiga rîra rîaregirwe i biû aaki, îîndî i rîo rîtuîkîîte rîa koona.’

¹²Wonokio bûtioneka kîrî muntû ûngî, n'ûntû nthîgûrû îno yonthe gûtirî muntû arî riîtwa rîûmba kwonokania tatiga Yiesû.”

¹³Akîama babu bakwona bûra Petûrû na Njoana baaragia na ûcamba baarigara mûno i bo n'ûntû baaboonaga barî antû woogu, batarî bathoomu. Baarîcûkwa baamenya antû babu ibaakaranagia na Yiesû.

¹⁴Boona muntû ûyu Petûrû na Njoana booreetie arûngi amwe na bo, baaga kîra babaûria.

¹⁵Bauga barutwe nja batigwe baaranîrie. Akîama babu bagûtigwa baûrania,

¹⁶“N'ata tûkûrûtha antû baba n'ûntû kwaria mma kîama kîra bararingire îkîmenyekanîîte n'antû ba Njerusaremu bonthe na tûtikaana?

¹⁷Bûra tûkaarûtha kaingo tûrigîîria mantû mamu matamba nkûrûki, itûkaabamakia kaingo gûtarî we bagwetera kaîrî mantû ma Yiesû.”

¹⁸Rîru beeta Petûrû na Njoana babakaania babeera batikaarie nwa rî kana barutana nwa ata îgûrû rîa Yiesû.

¹⁹Petûrû na Njoana babeera, “Tagiitaani bwingwa bûra kwagîrîte meethooni ma Ngai—tûbwathîkîre kana twathîkîre Ngai?

²⁰Tûtitigana na mantû twoneete na tweegua.”

²¹Akîama babu babamakia nkûrûki, rîru babarekia. Baaga gîtûmi gîa kûbaa îkaanûkia n'ûntû antû bonthe ibaakumagia Ngai n'ûntû bwa ûgu Petûrû na Njoana baarûthîîte.

²²Muntû ûyu Petûrû na Njoana booreetie aarî wa mîanka nkûrûki ya mîrongo îna.

²³Petûrû na Njoana bakûrekeerua, baathi beera bara bangî baciao bûra *athînjîri bara banene ba Ngai na akûrû ba kîama baabeerîîte batige kûrûtha.

²⁴Bara bangî bakwîgua ûgu, bonthe barî amwe na Petûrû na Njoana baaromba Ngai bakîmwîraga, “Mwathani, i woû Mûûmbi wa îgûrû, nthîgûrû, îria, na bionthe bira birî gûntû gûku.

²⁵Waariirie na njîra ya Kîrundu Ûmûtheru gûkûrûkîîra kanyuani ka mûruti ngûgî waku, ta we kîûyûûyû gîetû, Ndaundi, wauga, ‘I kî n'ûntû mîgongo îngî îgwetwe i mûthûûro? I kî n'ûntû antû barûthîîte mîbango ya ûtheri?

²⁶Anene ba nthîgûrû beethuuranîîre, aathani beethîrana amwe kaingo baregana na Mwathani na *Mesia wake.’

²⁷“Wabu Eronde, Pontio Piraatû, antû batarî Ayaundi, na antû ba Isiraeri beethîrana amwe aaga taûni îno baregana na mûruti ngûgî waku ûmûtheru, Yiesû, ûra wathuurire atuîka *Mesia.

²⁸Ûgu baarûthire, woû wengwa nwarî ûkûbanga bûkarîke woogu kwa inya yaku na kwa wendi bwaku.

²⁹Îîndî, Mwathani, teegua bûra bakuuga bagîtûmakia! Tûma tûgîe ûcamba, tiû aruti ngûgî baaku, tûtûmîîrie kiugo gîaku.

³⁰Tûma inya yaku ya kworania, tûma biama na magegania bioneke kwa riîtwa rîa mûruti ngûgî waku ûmûtheru, Yiesû.”

³¹Bakûrîîkia kûromba ûgu, bantû agu baarî ainaina. Booyûrwa i Kîrundu Ûmûtheru bonthe. Baatûmîîria kiugo kîa Ngai barî na ûcamba.

³²Eetîgîri bonthe beegagua barî na nkoro îmwe na mwoyo ûmwe. Gûtirî we kîrî bo akiuga gîntû nwa kîrîkû kîa bira aarî na bio i gîake wenka. Baatûmagîra into biao bonthe barî amwe.

³³Atûmwa baathi na mbere gûkûûyîîra mantû ma kûriûka kwa Mwathani Yiesû na inya nkûrûki na Ngai abathaarima mûno bonthe.

³⁴Gûtirî we waciao aagaga gîntû n'ûntû bara baarî na ithaka kana nyomba beendagia bakareeta mbia

³⁵kîrî atûmwa, atûmwa bakagaîra cio ûra wonthe aarî na ûbatu.

³⁶Ikwarî na muntû ûmwe wa mwîrîga wa Araawî wa kuuma nthîgûrû ya Kupooro eetagwa Njosebu. Atûmwa baamwîtaga Baranaba (i ta kuuga ‘Mûûmanîîria’).

³⁷Njosebu eendiirie kîthaka gîake aareetera atûmwa mbia cionthe ira kîaumire.