Read tharaka NGÛGÎ 5 Bible Online

NGÛGÎ 5 - tharaka bible

NGÛGÎ 5

¹Muntû ûngî eetagwa Anania barî na mwekûrû wake, Sabira, beendia kîthaka kîao.

²Mwekûrû wake akîmenyaga, Anania aathûkia mbia imwe kîrî ira kîthaka kîaumire aiga irî cia gûtûmîra barî bonka, airîra atûmwa inu ingî.

³Petûrû amûûria, “Anania, i mbi îtûmîîte Saitaani aûyûra nkoro yakû? Ûkûrongoia Kîrundu Ûmûtheru. Kûrî mbia imwe cia kîthaka waigîîte ûgaitûmîra ûrî wenka.

⁴Mbere ya wendia kîthaka gîku kîraarî gîaku. Na ûgûkîendia mbia nwa ciaku iraarî. I kî îîndî n'ûntû ûrûthîîte ûûgû? T'antû warongoia, i Ngai.”

⁵Anania akwîgua mîgambo înu aagwa nthîgûrû, aakua. Muntû wonthe ûra eegagua mantû mamu naamakaga mûno.

⁶Nthaka ciaya cioga mwîrî wa Anania baumagarûkia, baathi bamûthika.

⁷Nyuma ya mathaa ta mathatû ûgu, mwekûrû wa Anania aaya gûku atûmwa baarî. Ataiyî bûra gwakarîkîîte.

⁸Petûrû amûûria, “Ingûkûûria, ino i cio mbia ira kîthaka kîenu kîraumire?” Sabira amwîra, “Yîî, i cio.”

⁹Petûrû amûûria, “I kî n'ûntû bûrabangire kûgeria Kîrundu wa Mwathani? Makinya mamu ûkwîgua maayîîte i ma bara bauma kûthika mûkûrû waku. Kinya woû ibagûgûkamata bagakûthike.”

¹⁰Warîo, Sabira aagwa nthîgûrû magûrûûni ma Petûrû, aakua. Nthaka ira ciaya ciethîra arî ûmûkuû. Bamûkamata bamûruta nja, baathi bamûthika rûteere, waagu akubî na ara baarî bakûthika mwene.

¹¹Eetîgîri bonthe na antû bonthe bakwîgua mantû mamu baamaka mûno.

¹²Atûmwa baaringa biama biingî na boonania magegania maingî kîrî antû. Eetîgîri bonthe baarîîkanaga nyomba ya Ngai, rwembeani rwa Soromoni.

¹³Bara bangî batikîûmîîria beengîrana na bo amwe na kwîgua iboonaga baarî antû beega.

¹⁴Antû bangî, arûme na aka, bara beetîgiirie Mwathani boongeereka kîrî eetîgîri.

¹⁵N'ûntû bwa biama bira atûmwa baaringaga, antû baumagaragia aayie baao bakabakamata bakathi bakabamaamia mîgekaani kana mîkondorooni rûteere rwa barabara kaingo Petûrû akûrûkîîte kîrundu gîake kîringithia nwa bamwe.

¹⁶Na ikwarî na antû baingî mûno baayaga baumîîte taûni ira ciarî akubî na Njerusaremu bareeteete aayie na bara baarî na irundu biithûûku. Na bonthe boorua.

¹⁷Mûthînjîri ûra mûnene wa Ngai na antû baake bonthe, *Asandukai, baatua kwîgua atûmwa rûriitho.

¹⁸Babagwatithia baingîrwa nceera.

¹⁹Îndî ûtugû bûbu mûraîka wa Mwathani aaya abarugûrîra. Abeera,

²⁰“Îthiini nyomba ya Ngai bûtûmîîrie antû bûbeere mantû monthe ma mwoyo ûmûyerû.”

²¹Atûmwa baathîkîra ûgu mûraîka aabeerire, baaraûka nyomba ya Ngai baanjîîria kûrutana antû. Mûthînjîri ûra mûnene wa Ngai na antû baake beeta akîama na akûrû bonthe ba Isiraeri amwe. Rîru baatûmana atûmwa bagîîrwa nceera.

²²Îndî acikaarî babu baatûmîîtwe bagîîra atûmwa, bagûkinya bataabeethîra nceera. Baacooka kîrî kîama.

²³Bauga, “Tûthiire twethîra mîrango îrî îminge bwega mûno na akaria bakarîîtie. Tûkûrugûra twathûngîra ndeni gûtirî we tûreethîra ku!”

²⁴*Athînjîri bara banene ba Ngai na mûnene wa akaria ba nyomba ya Ngai bakwîgua ûgu baarigicana mûno n'ûntû bataiyî bûra gwakarîkaga.

²⁵Muntû ûmwe i rîo aayire abeera, “Antû bara bûrathaîkithîîtie barî nyomba ya Ngai. I ku barî bakîrutanaga antû.”

²⁶Mûnene wa akaria ba nyomba ya Ngai aathi na antû baake, baaya na atûmwa. Bataatûmîra inya n'ûntû ibaakuthûkaga antû babaringanga na maiga.

²⁷Bakûbareeta, atûmwa baarûngamua mbere ya akîama. Mûthînjîri ûra mûnene wa Ngai abaûria,

²⁸“Anga tûtaabûkaaniirie twabwîra bûtikaarutane antû mantû ma muntû ûyû? Teeneeni îîndî bûra bûûyûrîîtie ûrutani bwenu Njerusaremu yonthe. Ka bûkwenda nthakame yake îtûcookera?”

²⁹Petûrû na atûmwa bara bangî babeera, “Nwa mwanka twathîkîre Ngai bantû a twathîkîra muntû.

³⁰Ngai wa biûyûûyû bietû naariûkiirie Yiesû ûra bwaûragithiirie na njîra ya kwamba mûtharabaani.

³¹Ngai aamwîtithiirie îgûrû amwaiga njaraani yake ya ûrîo, amûtuîkithia Mûnene na Mwonokia kaingo apa antû ba Isiraeri kaanya ga kwîrira na ga kûrekerwa meeyia maao.

³²Tiû, atûmwa, na Kîrundu Ûmûtheru ûra Ngai eeyaga bara bamwathîkagira, tûrî akûûyî ba mantû mama.”

³³Akîama babu bakwîgua ûgu baamuntwa i nkoro, beenda kûbaûraga.

³⁴*Mûbarisai ûmwe, mûkîama, eetagwa Gamarieri aarûngama. Aarî mwarimû wa watho na naatîîyîîtwe mûno n'antû. Akûrûngama auga atûmwa barutwe nja aniini.

³⁵Eera akîama babu bangî, “Antû ba Isiraeri, thûgaanîriani bwega ûntû bûbû bûkwenda kûrûtha antû baba.

³⁶Kagiita kamwe ikwarî na muntû eetagwa Theunda. Eetuîte muntû wa gîtûmi, antû ta magana mana baatuîka athingati baake. Theunda akûûragwa, athingati baake bonthe ibaanyagaaraniirie. Na ûyu n'uu warî mûthia.

³⁷Nyumaani ikwarî na muntû ûngî eetagwa Njundas kagiita kara antû baataragwa. Aarî wa kuuma Gariiri. Wana we aakuuyia kîrîndî kiingî gîa antû, gîatuîka athingati baake. Îndî wana we naûragirwe, athingati baake wana bo baanyagaarania.

³⁸Kwoogu îîndî bûra nkwenda kûbwîra n'atî, tiganaani na antû baba. Ûkaaya kwîgua mworooto wao na ngûgî yao n'ya kîîmuntû, îkaathira.

³⁹Îndî ûkeegua n'ya Ngai bûtiûmba kûbarigîîria bamîruta. Îmenyeereeni waûmba kwîgua i Ngai bûkûrûa n'we.”

⁴⁰Akîama baathingata mataaro ma Gamarieri. Bauga atûmwa bathûngîre. Bakûthûngîra babaringithia ibooko. Babakaania babeera batikeere antû mantû ma Yiesû, rîru babarekia.

⁴¹Atûmwa bauma gûku bakeneete mûno n'ûntû bwa kwîgua boonirwe baagîrîte ba kûnyamaarua n'ûntû bwa riîtwa rîa Yiesû.

⁴²Ntugû cionthe bataatiga kûrutana na gûtûmîîria gûku nyomba ya Ngai na mîciî ya antû atî, Yiesû n'we *Mesia.