Read tharaka NGÛGÎ 6 Bible Online

NGÛGÎ 6 - tharaka bible

NGÛGÎ 6

¹Kagiitaani gaku eetîgîri bakûthi na mbere kwingîa, eetîgîri Angiriki na eetîgîri Aibirania îbaarî na îtheto. Angiriki baanung'unaga bakauga ntigwa ciao iteeyagwa ûteethio bwa kûgana irio bikîgaîwa kîra ntugû.

²Atûmwa babu îkûmi na baîrî beeta eetîgîri amwe bonthe. Babeera, “Gûtiagîrîte tûtiga gûtûmîîria kiugo kîa Ngai n'ûntû bwa kûgaa irio.

³Kwoogu, aruayia na aarayia, thuuraani antû arûme mûgwanja kîrî biû, bara bûkûmenya ibaûyûrîîtwe i Kîrundu Ûmûtheru na barî na ûûme bwingî. Antû babu mûgwanja i bo tûkaa ngûgî înu.

⁴Tiû tukeenenkanîra kûromba na kûruta ngûgî ya gûtûmîîria kiugo.”

⁵Eetîgîri bonthe baakeneera îthûgaanio rîru. Baathuura muntû eetagwa Stibini aarî na wîtîgio bûûnene mûno na aûyûrîîtwe i Kîrundu Ûmûtheru. Baacooka baathuura Piripû, Purokooras, Nikanoori, Timooni, Parimenas na Nikooraûs. (Nikooraûs aarî wa kuuma Antiokia, naagarûkîîte atuîka wa ndini ya kîîyaundi.)

⁶Antû babu bairwa mbere ya atûmwa. Atûmwa babarombera babaigîîrîîte njara.

⁷Kiugo kîa Ngai kîathi na mbere gûtamba, eetîgîri bongeereka mûno Njerusaremu. Na wana kinya *athînjîri ba Ngai baingî baagîa na wîtîgio.

⁸Stibini aarî muntû aûyûrîîtwe n'ûtugi na inya. Naaringaga biama biinene na akoonania magegania maanene.

⁹Kûrî antû baaturagia Stibini mbaara. Antû babu baarî ba *sinagoogi yeetagwa ‘Sinagoogi ya bara bathaûre,’ na baumîîte Kureni, Aregicandiria, Sirîsia na Îcia. Antû babu ibaakararagia Stibini,

¹⁰îndî batikîmûkîria ûûme n'ûntû Stibini aaragia na ûûme bûûnene mûno, na inya ya Kîrundu Ûmûtheru.

¹¹Antû babu baabangîra Stibini. Antû bamwe baakûûyîîra ûrongo bauga, “Tûreegiirue akîaria mantû maathûûku îgûrû rîa Musa na Ngai.”

¹²Beengîîra antû, akûrû, na aarimû ba watho baagwata Stibini bamwira kîrî akîama.

¹³Baareeta antû baatuîrîîra Stibini, bauga, “Muntû ûyû rîonthe agwetaga mantû maathûûku îgûrû rîa nyomba îno întheru ya Ngai na *watho bwa Musa.

¹⁴Tûreegiirue akiuga Yiesû ûyu wa kuuma Nasareethi akomborania nyomba îno ya Ngai na agarûre wîthîre bûra twaumaniirie na bu kîrî Musa!”

¹⁵Bara bonthe baarî gûku kîamaani nwaka boona ûthiû bwa Stibini bwagarûka. Baakara bamûkûnîrîîte meetho, boona bwakara ta bwa mûraîka.