Read tharaka NGÛGÎ 7 Bible Online

NGÛGÎ 7 - tharaka bible

NGÛGÎ 7

¹Mûthînjîri ûra mûnene wa Ngai aûria Stibini, “Mantû mamu i ma mma?”

²Stibini aacookia auga, “Aruayia na babaaba, thikîîriani mbwîre! Ngai wa mwago eebonaniirie kîrî kîûyûyû gîetû, Îburaîmu, warî Mesopotamia mbere ya athaamîra Arani,

³amwîra, ‘Thaama kwenu ûtige antû beenu ûthi nthîgûrû îra ngaakwonia!’

⁴“Îburaîmu aathaama nthîgûrû îra baatûîre ya Karindea aathi aatûûra Arani. Îthe agûkua aathaama aaya aatûûra gûkû bûtûîre îîndî.

⁵Îndî Ngai ataamwaa nwa îkînya rîmwe rîa nthîgûrû îno rîtuîka rûgai rwake. I wîrane aamwere amwîra akamwaa îtuîke yake na rûrîîyo rwake, kinya weegua kagiita gaku Îburaîmu ataarî akûgîa na kaana.

⁶Ngai aamwîrire ûûgû, ‘Antû ba rûrîîyo rwaku bagaatuîkithua nkombo nthîgûrû îngeni barûthîrwe mantû maathûûku mîanka magana mana.

⁷Naani, Ngai, ingaakaanûkia babu bakaabatuîkithia nkombo. Rîru mbarute gûntû gûku baangonge barî aaga.’

⁸Ngai aarîîkanîîre na Îburaîmu, aatuîkithia rûtaano rwano rwa kîrîîkanîro gîku. Kwoogu Îburaîmu agûciara Isaka amûtaana arî na ûkûrû bwa ntugû inyanya. Nyumaani Isaka n'we aaciara Njakubu, Njakubu aaciara nthaka îkûmi na ciîrî, biûyûûyû bira bietû îkûmi na biîrî.

⁹“Biûyûûyû bibu bieegua Njosebu rûriitho. Bamwendia athi gûtuîka nkombo nthîgûrû ya Miisiri, îndî Ngai naarî amwe n'we.

¹⁰Amûruta kûnyamaaruani kûra kunthe aanyamaaragua. Amwaa ûûme na aatûma akenia Baraû, mûnene wa Miisiri. Mûnene amûtuîkithia ngabana wa Miisiri na mûrûngamîîri wa nyomba yake.

¹¹“Ikwarî na yûûra rîînene mûno gûku nthîgûrû ya Miisiri yonthe na ya Kaanani. Kwagîa kînyamaara kîînene mûno. Biûyûûyû bietû biaga irio.

¹²Njakubu akwîgua ikwarî na ngano Miisiri, aatûma biûyûûyû bietû bithi kûthûgûra rîrî îgiita rîa mbere kûthi Miisiri.

¹³Bakûthi kûthûgûra rîa maîrî Njosebu eemenyithania kîrî aruagina. Baraû aamenya aruagina babu ba Njosebu.

¹⁴Njosebu aatûmana kîrî îthe, Njakubu, na antû baao bara bangî baaya Miisiri. Bonthe baarî antû mîrongo mûgwanja na bataano.

¹⁵Kwoogu, Njakubu baathaamîra Miisiri. Naagu i noogo aakuîrîîre. Na wana kinya biûyûûyû bira bingî bietû nwa noogo biakuîrîîre. Îndî

¹⁶mîîrî yao yairirwe Cekemu, baathikwa nthikooni ira Îburaîmu aagûrîrîte aana ba Amoori mbia igana ûna.

¹⁷“Kagiita karî akubî kara Ngai augîîte akaingia wîrane bûra eerire Îburaîmu, weegua antû beetû bara baarî Miisiri ibaarî bakwingîa.

¹⁸Mûnene ûngî ataiyî Njosebu na antû baao aatuîka mûnene wa Miisiri.

¹⁹Mûnene ûyu aacegeera antû beetû abanyamaaria. Auga bateeyage tûgenke twao twaciarwa kaingo tûkua.

²⁰“Îgîîtaani rîru i rîo Musa aaciarirwe. Kaarî kaana kaathongi mûno meethooni ma Ngai. Agûciarwa, aciari baake bamwitha nyomba yao bantû a mîeri îthatû.

²¹Akwithûrwa nyomba, mwarî wa Baraû amûthûkia amûrera ta mwana wake.

²²Musa aathoomithua mantû mara monthe Amiisiri baathoomaga, aûmea. Aatuîka muntû wa îgweta kuumania na mîgambo îra aaragia na mantû mara aarûthaga.

²³“Musa arî na mîanka mîrongo îna, aathûgaania kûthi kûriûngîra antû baao ba Isiraeri.

²⁴Akûthi oona ûmwe wao agîturwa i Mûmiisiri. Musa aathi gûtunyûkia muntû wao. Akîrîithia aûraga Mûmiisiri.

²⁵Aathûgaanagia ûtakîîgua antû baao ibaamenyaga atî Ngai akîmûtûmîra akabakûûra, îndî na bo bataaciûkîrwa bamenya ûgu.

²⁶Rûûni rwa ntugû înu, Musa eethîra Aisiraeri baîrî bakîrûaga. Musa aacûûgia kûbeeguithania. Abaûria, ‘Anga bûtirî ta muntû na mûruagina, itû aba. I mbi bûkûrûîra?’

²⁷Ûra aacûîrîrîte ûra ûngî ûgîti aatindîka Musa. Amûûria, ‘N'ûû agûtuîkithîîtie mûnene wetû ûtûgambithia?

²⁸Nûbangîîte kûmbûraga ta bûra ûraûragire Mûmiisiri ûra îgoro?’

²⁹Musa akwîgua ûgu aatoorooka, auma nthîgûrû înu. Aathi gûtûûra nthîgûrû yeetagwa Mindiani. Arî noogo aagûrana aaciara nthaka ciîrî.

³⁰“Nyuma ya mîanka mîrongo îna, Musa arî rwanda rwa Kîrîma gîa Sinaî mûraîka aaria n'we rûrîrîmbî rwa mwanki rûgîakanaga gakandooni.

³¹Musa akwona ûgu, aarigara mûno. Athiîte akubî kwona bwega, eegua kayû ka Mwathani gakîaria n'we gakiugaga,

³²‘I niû Ngai wa biûyûûyû bienu, Ngai wa Îburaîmu, Isaka na Njakubu!’ Musa aatua kwinaina n'ûguaya, na ataûmîîria kinya kûraitha noogo.

³³Mwathani amwîra, ‘Ruta iraatû magûrû n'ûntû bantû agu ûrûngi i bantû aatheru.

³⁴Indîîkîîtie kwona bûra antû baakwa bakûnyamaarîra Miisiri na imbîgîîtue bûra bagûkaya bûgana. Ndauma îgûrû mbûyîîte kûbakûûra. Kwoogu ka ngûtûme Miisiri.’

³⁵“Musa wooyu nwa we ûra antû baao baarî bakûmûrega bakîmûûragia, ‘N'ûû agûtuîkithîîtie mûnene wetû ûtûgambithia?’ Musa n'we Ngai aatûmire kîrî antû baake atuîka mûtongoria na mûkûûri wao kuumania na ûteethio bwa mûraîka ûra aariirie n'we gakandooni.

³⁶N'we aarutire Aisiraeri ûkombooni bwa Miisiri akîonanagia magegania na akîringaga biama—barî Miisiri, bakîringa Îria Rîtuune, na bakûrûkîîrîîte rwanda kagiita ka mîanka mîrongo îna.

³⁷I Musa wooyu eerire Aisiraeri, ‘Ngai akabûthuurîra kîroria kuuma wakîrî biû, wata bûra aanthuurire.’

³⁸Na nwa Musa wooyu eethîranîrîtwe i biûyûûyû bietû rwanda. Na nwa we mûraîka aariirie n'we Kîrîmaani gîa Sinaî, rîra eerwe biugo bia mwoyo, bira aatwere.

³⁹“Îndî biûyûûyû bietû bateendaga kûmwathîkîra. Baamûregire bauga i kaaba bagacooka Miisiri.

⁴⁰Beera Arûni, ‘Tûrûthîre ngai ira igaatûtongoreeria rûgendooni n'ûntû tûtiiyî bûra Musa ûra aatûrutire Miisiri akarire.’

⁴¹Kwoogu beerûthîra ngai îkari ta kayaû bamîrutîra kîgongwana, baakeneera gîntû gîa kûrûtha na njara ciao.

⁴²Ngai aatigana na bo. Abarekeeria baromba nthata cia îgûrû, wata bûra kwandîkîîtwe mabukuuni ma iroria kwerwa, ‘Antû ba Isiraeri, ibwanthînjîîre nyamû na bwandutîra îgongwana rwanda kagiita ka mîanka mîrongo îna?

⁴³Bwakamatire îrema rîa ngai Moreki na mûbuanaano wa ngai wenu wa nthata, Rebani, birî ngai cienu cia mîbuanaano. N'ûntû bwa ûgu, inkaabûtuîkithia atae Mbabironi.’

⁴⁴“Biûyûûyû bietû bakûrûkîîrîîte rwanda ibaarî na îrema rîa kwonania Ngai arî amwe na bo. Îrema rîru rîarûngamagua wabûra Musa oonetue i Ngai.

⁴⁵Biûyûûyû bietû ibiarî na rîo bagûkinya Kaanani batongorereetue i Njocua. Mîgongo îra beethagîra, Ngai naamîngatagia bakathûkia nthîgûrû inu igatuîka ciao. Na wana kinya îgiita rîa Ndaundi nwa baarî na îrema rîru.

⁴⁶Ndaundi naakeniirie Ngai. Aûria Ngai wa Njakubu amwîtîgîîrie amwakîre bantû a gûkara.

⁴⁷Îndî i Soromoni aamwakîîre nyomba.

⁴⁸“Îndî Ngai ûra arî îgûrû mûno atikaraga nyomba cia gwakwa n'antû, wata bûra kîroria kîaugire,

⁴⁹‘Mwathani ariuga, “Îgûrû i gîtî gîakwa kîa ûnene na nthîgûrû n'ûkinyo bwa magûrû maakwa. I nyomba mbi bûûmbakîra, i kû bûkuuga nkarage?

⁵⁰Anga ti niû mbûmbîîte into bibi bionthe?” ’ ”

⁵¹“Biû bûûmîîtie biongo mûno. Nkoro cienu ciûyûri wîrirîîria na bûûrîrîtie matû mûno. Bûtuatîîtie biûyûûyû bienu, bûkararagia Kîrundu Ûmûtheru rîonthe.

⁵²Anga kûrî kîroria biûyûûyû bienu bitaanyamaaria? Biaûragire bara baaroririe tene babeera mantû ma kûûya kwa ûra mwagîru, naabi nyumaani bwamûnenkanîra aûragwa,

⁵³na ingî nwa biû bweerirwe watho gûkûrûkîîra kîrî araîka, îndî amwe na ûgu bûtaabuathîkîra.”

⁵⁴Akîama bakwîgua ûgu, baamuntwa i nkoro, baathûûra mûno.

⁵⁵Stibini naûyûrîîtwe i Kîrundu Ûmûtheru. Aacûûba îgûrû oona mwago wa Ngai na Yiesû arî rûteere rwa ûrîo rwa Ngai.

⁵⁶Eera akîama babu, “Cûûbaani bwone! Inkwona îgûrû rîrugûkîîte na Mwana wa Muntû arî rûteere rwa ûrîo rwa Ngai.”

⁵⁷Akîama baûkia gîtuma, bainga matû. Bonthe baumbuthûkania na Stibini

⁵⁸bamûruta taûni kaingo bamûûraga na maiga. Babu baarî bamûûrage baaruta nguo îra ndaaya[3] baiga bantû mûthaka eetagwa Saûrû aarûngi.

⁵⁹Bakîmûringangaga na maiga, Stibini aaromba auga, “Mwathani Yiesû, thûkia mwoyo wakwa!”

⁶⁰Aaturia maru auga na inya, “Mwathani, ûtikaabatarîre meeyia mama.” Stibini akuuga ûgu, aakua. Mûthaka ûyu eetagwa Saûrû naagwatanîîre na antû babu.