Read tharaka NGÛGÎ 9 Bible Online

NGÛGÎ 9 - tharaka bible

NGÛGÎ 9

¹Mantû mamu magîtuîkîka, Saûrû nwa aathiîtagia kûûraga athingati ba Mwathani. Aathi kîrî mûthînjîri ûra mûnene wa Ngai

²amûûria amwe baarûa ciakûmûmenyithania *sinagoogiini cia Ndamasiki. Eendaga baarûa inu kaingo oona muntû arî mûthingati wa njîra ya Mwathani naagu Ndamasiki, amûreeta Njerusaremu arî ûmûthaîke, nwîgue i mûka aarî kana i muntû mûrûme.

³Athiîte arî akubî gûkinya Ndamasiki, nthûti îmwe werû bwauma îgûrû bwamûthararîra nteere cionthe.

⁴Saûrû aagwa nthîgûrû. Eegua kayû kaaria n'we kauga, “Saûrû, Saûrû, i kî n'ûntû ûkûnnyamaaria?”

⁵Saûrû aûria, “I woû ûû, mûnene?” Kayû gaku kamwîra, “Ndî Yiesû ûra ûkûnyamaaria.

⁶Îndî amwe na ûgu, ûka ûthi taûni. Wakinya ûkeerwa bûra ûbatîîrue ûrûtha.”

⁷Antû bara baathiyanîîtie na Saûrû baarûngi batarî na bwa kuuga. Ibeegiirue kayû, îndî gûtirî we boona.

⁸Saûrû aûka, aarancûkia îndî ataûmba kwona. Antû babu baarî na bo bamûgwata njara bamûtongoreeria baakinya Ndamasiki.

⁹Saûrû aakara ntugû ithatû atakwona. Na ntugû inu ithatû ataarîa kana anyua nwa mbi.

¹⁰Gûku Ndamasiki ikwarî na mûthingati wa Mwathani eetagwa Anania. Mwathani amwîta na njîra ya kîoneki, “Anania!” Anania eetîga auga, “Yîî, Mwathani!”

¹¹Mwathani amwîra, “Îthi na barabara îra yîtagwa ‘Îndûngaru,’ ûthi kwa Njundas ûûrithîrie oogo muntû wa kuuma Taarisas, eetagwa Saûrû. Îîndî ûgu nakûromba na

¹²nkûmwonia na njîra ya kîoneki muntû eetagwa Anania aayîîte amwaigîîra njara kaingo atua kwona.”

¹³Anania eera Mwathani, “Mwathani, imbîgîîtue mantû ma muntû ûyu kuumania na antû baingî, bûra athîînîîtie antû baaku Njerusaremu.

¹⁴Aayîîte naaga arî na watho kuuma kîrî *athînjîri bara banene ba Ngai eetîgîîrîîtue kûgwata bara bonthe barî athingati baaku.”

¹⁵Mwathani eera Anania, “Îthi. Nthuurîîte muntû ûyu atambia riîtwa rîakwa kîrî bara batarî Ayaundi, anene, na antû ba Isiraeri.

¹⁶Nwa mwanka anyamaare n'ûntû bwakwa na nkamwonia bûra akaanyamaara.”

¹⁷Anania aathi aakinya kwa Njundas. Aigîîra Saûrû njara auga, “Mûruayia Saûrû, Mwathani, ta we Yiesû, ûra eebonaniirie kîrî woû ûrî njîraani, n'we aantûmîîte kaingo ûtua kwona kaîrî na ûûyûrwa i Kîrundu Ûmûtheru.”

¹⁸Warîru gîntû gîkari ta magoko ma îkûyû mauma meetho ma Saûrû. Aatua kwona kaîrî, aabaatithua.

¹⁹Aarîa irio aagwata inya. Saûrû aakarakaranga ntugû igana ûna na athingati ba Yiesû naagu Ndamasiki.

²⁰Aanjîîria gûtûmîîria *masinagoogiini akîonanagia atî Yiesû i Mwana wa Ngai.

²¹Bonthe bara beegagua agîtûmîîria ibaarigaraga. Baûranagia, “Anga muntû ûyû t'ûra aranyamaaragia bara beetîgîîtie Yiesû Njerusaremu? Anga akîîya ûûgû tika araayîîte kûbagwatithia bairwa Njerusaremu kîrî *athînjîri bara banene ba Ngai?”

²²Îndî amwe noogu, Saûrû aathi na mbere gûtûmîîria, ûcamba bûkîongeerekaga. Noonaniirie bwega atî Yiesû n'we *Mesia, mwanka Ayaundi bara baatûîre Ndamasiki baaga kîûria gîa kûmûûria.

²³Nyuma ya ntugû igana ûna, Ayaundi baarûtha mûceemanio baabanga kûmûûraga.

²⁴Îndî Saûrû aamenya mûbango wao. Mûthenya na ûtugû, Ayaundi babu baamûgiitagîra mîîrîgaani ya rûthingo rûra rwathiûrûkîrîte taûni kaingo bamûûraga.

²⁵Kwoogu ûtugû bûmwe eetîgîri baatûrithîîria Saûrû bantû kwarî na mwanya rûthingooni, bamwîndamîîrîa oogo bamwîkîrîte gîkabûûni.

²⁶Saûrû aacooka Njerusaremu, aageria kûgwatanîra na eetîgîri bara bangî. Îndî bonthe ibaamûkuthûkaga n'ûntû bateetîgagia kana wabu naarî agûtuîka mûthingati wa Yiesû.

²⁷Baranaba amûthûkia amwira kîrî atûmwa. Abeera bûra Mwathani eebonaniirie kîrî Saûrû na bûra aariirie n'we arî njîraani. Baranaba eera atûmwa bûra Saûrû aatûmîîrie Ndamasiki kwa riîtwa rîa Yiesû arî na ûcamba.

²⁸I rîo eetîgîri baagwatanîîre na Saûrû. Saûrû aariûnga Njerusaremu agîtûmagîîria na ûcamba kwa riîtwa rîa Mwathani.

²⁹Saûrû naatûmîîrie kinya Ayaundi bara baaragia Kîîngiriki. Aakararania na bo mwanka beenda kûmûûraga.

³⁰Eetîgîri bakûmenya ûgu baakuthûkia Saûrû bamwira Kaisaria. Bakûmûkinyithia Kaisaria bamwîra acooke kwao Taarisas.

³¹Eetîgîri ba Njundea, Gariiri, na Samaria ibaarî na ûkiri. Baathiire bakîongeerekaga na bakîgîîyaga ûûmîîria, bakîîgagua baganîrîtwe i Kîrundu Ûmûtheru na bagîkuthûkaga Mwathani.

³²Petûrû waakîriûngaga gûntû na gûntû, aariûngîra eetîgîri ba taûni yeetagwa Runda.

³³Eethîra muntû taûni înu eetagwa Ainias. Ainias aarî kîonje na aatûîre amaami mûkondorooni mîanka înana.

³⁴Petûrû amwîra, “Ainias, Yiesû Kîrîstû nagûkworia. Ûkîîra ûûmbie mûkondoro waku.” Warîru Ainias aarûngama.

³⁵Antû ba taûni înu na ba taûni ya Caroni bakwona ûgu baagarûka kîrî Mwathani.

³⁶Kûrî mwekûrû ûmwe wa taûni yeetagwa Njopa aarî mwîtîgîri, eetagwa Tabiitha. (Na Kîîngiriki i bûmwe na Ndorokas. Ndorokas i ‘Nthia’.) Aarî mwekûrû aarûthaga mantû meega na aateethagia nkîa rîonthe.

³⁷Îndî kagiitaani gaku aayua, aakua. Antû baathambia kiimba gîake, beetithia ngorobaani baiga ku.

³⁸Taûni înu ya Njopa îtirî kûraaya na ya Runda. Kwogû eetîgîri bakûmenye Petûrû naarî Runda baatûma antû baîrî. Antû babu baathi bamwîra, “Tûthi Njopa na mpwî.”

³⁹Petûrû aacookania na bo warîru. Petûrû bagûkinya, beetia ngoroba. Eethîra eekûrû ntigwa bakîrîraga. Bamwonia nguo ira Ndorokas aatumaga arî mwoyo.

⁴⁰Petûrû abaruta nja bonthe. Aaturia maru aaromba. Rîru aacooka eera kiimba, “Tabiitha, ûka!” Tabiitha aarancûkia oona Petûrû, aakara nthîgûrû.

⁴¹Petûrû amûgwata njara amûrûngamia. Eeta eetîgîri na eekûrû bara ntigwa abanenkera Ndorokas arî mwoyo.

⁴²Mantû mamu maamenyekana Njopa yonthe. Antû baingî beetîgia Mwathani.

⁴³Petûrû aakarakara Njopa kwa muntû aatagutaga njûo eetagwa Simioni.