Read tharaka AROOMA 10 Bible Online

AROOMA 10 - tharaka bible

AROOMA 10

¹Aruayia na aarayia, ndombaga Ngai na nkoro yakwa yonthe Ayaundi boonokua.

²Nwa nkûûyîîre nkauga Ayaundi barî wîru bûûnene mûno kîrî Ngai, kîra baagaga n'ûmenyo bwa mma.

³Batiiyî bûra Ngai aagîrithagia antû. Bacûûgagia gûtua njîra ciao cia kwîbagîrithia, bakarega gwîtîgîîria kwagîrithua kûra Ngai aagîrithanagia.

⁴Kîrîstû we naingiirie *watho. Kwoogu ûra amwîtîgagia naagîrithagua i Ngai.

⁵Musa aandîkire auga kwagîrithua kûra kûreetagwa i kûthingata watho, i gûkû, “Ûra akaathîkîra maathana magaatûma atûûra mwoyo.”

⁶Îndî *Maandîko Maatheru maugaga îgûrû rîa kwagîrithua kûra kuumanagia na wîtîgio, “Ûtikeebûûrie ‘N'ûû akaathi îgûrû?’ ” (Athi akeere Kîrîstû aaye.)

⁷“Kana ‘N'ûû akaathi kûra bara bakuû barî?’ ” (Akeere Kîrîstû aume kûra bara bakuû barî.)

⁸Maandîko Maatheru maugîîte, “Kiugo kîa Ngai kîrî agu ûrî. Kîrî kanyuani gaaku, na kîrî nkorooni yaku.” Kiugo gîku i kîo tûtûmagîîria. I kîo gîtûmaga muntû oonokua agîîtîgia.

⁹Ûkauga na kanyua gaaku Kîrîstû i Mwathani, na ûgeetîgia nkorooni yaku Ngai naamûriûkiirie auma kîrî bara bakuû, ûkoonokua.

¹⁰Gwîtîgia kûra muntû eetîgagia na nkoro yake i ku gûtûmaga aagîrithua. Na mîgambo îra muntû augaga na kanyua gaake n'yo îtûmaga oonokua.

¹¹Wata bûra Maandîko Maatheru maugîîte îgûrû rîa Kîrîstû arî ta iiga, “Ûra akaarîîtîgia rîtimwîkîrithia nthoni.”

¹²Na ûgu i bu kûrî kîrî Ayaundi na kîrî bara batarî Ayaundi, n'ûntû Ngai ûyu ûmwe n'we Mwathani wa bonthe. Nathaarimaga na ithaarimo biingî bara bonthe bamwîtaga aboonokia.

¹³Wata bûra kwandîkîîtwe Maandîkooni Maatheru, “Ûra wonthe eetaga Mwathani amwonokia, Mwathani akamwonokia.”

¹⁴Îndî n'ata antû baûmba kûmwîta aboonokia batamwîtîgîîtie? Na n'ata baûmba kûmwîtîgia bateegîîtue ntûmwa yake? Na n'ata baûmba kwîgua muntû akûmûgweta gûtarî na muntû wa kûbatûmîîria?

¹⁵Na n'ata muntû aûmba kûbatûmîîria Ngai atamûtûmîîte? Antû babu i bo Maandîko Maatheru maaragîîria îgûrû rîao ara maugîîte, “N'ata bara bareetaga ntheto îmbega bareetaga mantû maathongi?”

¹⁶T'antû bonthe beetîgîîtie ntheto îmbega. Kîroria Isaaya augîîte, “N'ûû eetîgîîtie ntûmwa yetû?”

¹⁷Kwoogu, muntû eetîgagia kuumania na kwîgua, na antû beegagua kûrî na muntû wa kûbatûmîîria Kîrîstû.

¹⁸Ka antû bateegua? I mma bareegua n'ûntû Maandîko Maatheru maugîîte, “Kayû ga tûnyua twao ikaîguîkîîte bantû onthe nthîgûrû. Mîgambo yao nîkinyîîte gûntû kunthe.”

¹⁹Ka Aciraeri bo bataamenya? I mma ibaiyî. Mbere Musa aandîkire auga, Mwathani augîîte, “Ngaatûma bwîgua rûriitho na mûgongo ûtarî na gîtûmi, ngaatûma bûthûûra na antû batarî na ûmenyo.”

²⁰Na Isaaya n'we augîîte atakwitha, Mwathani augîîte, “Bara baambonire i bara bataancûaga, ndeebonaniirie kîrî bara bataûranagia naani.”

²¹Îndî îgûrû rîa Isiraeri, Ngai augîîte, “Rîonthe nthagaanaga antû batakwathîka, antû baûmo biongo.”