Read tharaka AROOMA 11 Bible Online

AROOMA 11 - tharaka bible

AROOMA 11

¹Kwoogu i ta kwonania Ngai naarekanire na antû baake kana? Arî buru! Niû ningwa ndî Mwisiraeri wa rûrîîyo rwa Îburaîmu, wa mwîrîga wa Benjameni.

²Ngai atirekanîîte na antû baake ba Isiraeri, bara aathuurire kuuma kîambîrîria. Ka bûtaiyî bûra Eriya eerire Ngai rîra aathetaga n'antû ba Isiraeri? *Maandîkooni Maatheru kwandîkîîtwe augire,

³“Iroria biaku i biûrage na ithînjîro bienyangua, Mwathani. I niû ninka ntigeere, îndî wana niû ibakwenda kûmbûraga.”

⁴N'ata Ngai aamûcookeerie amwîra? Aamwîrire, “Ndî na antû ngiri mûgwanja Isiraeri bara bataaromba ngai ya ûrongo, Mbaari.”

⁵Na kwoogu, kinya îîndî i bu gûkari. Kûrî na antû baakai bara Ngai athuurîîte kuumania na ûtugi bwake.

⁶Ngai abathuurîîte n'ûntû bwa ûtugi bwake, t'ûntû bwa ûntû bwega bûra baarûtha. Ûkeegua n'ûntû bwa ûntû bwega, ûtugi bûtiîtwa ûtugi.

⁷Na kuuga ûgu i ta kwonania ata? I ta kwonania Aisiraeri batoona kîra baacûaga. Bara baakîonire i baakai, bara Ngai aathuurire. Îndî bara bangî ibaûmiirue biongo,

⁸wata bûra kwandîkîîtwe Maandîkooni Maatheru, “Wana îmunthî Ngai nabaindiganîîtie mathûgaania, abaingîîte meetho kaingo batoona. Abaingîîte matû kaingo bateegua.”

⁹Na Ndaundi n'we augîîte, “Biatho biao birootuîka mûtego bikabarîîkîîria, bikabathiria, birootûma bagwa meeyiani bakeewa îkaanûkia rîra baagîrîtwe kwewa.

¹⁰Barootuîkithua ntûngi bagatiga kwona, barootûûraga bagunkuîte i gûkamata mathîîna.”

¹¹Rîra Ayaundi baagwîre wîyiani bwa kwaga wîtîgio ka gwatuîkire gûtirî kîo kîbaruta ku kaîrî? Arî buru! Kûgwa kwao kwarî mûbango wa Ngai, kaingo bara batarî Ayaundi boonokua. Na i kaingo Ayaundi bacooka kwîgua rûriitho, beenda kwonokua wana bo.

¹²Woona bara batarî Ayaundi baathaarimirwe mûno gîîkîrundu gûgûtuîka Ayaundi bakûgwa, n'ata antû bonthe bakaathaarimwa bûgana rîra Ayaundi bagaacooka kîrî Ngai?

¹³Ndaaria mantû mamu n'ûntû bwenu biû bûtarî Ayaundi. Ndî mûtûmwa kîrî bara batarî Ayaundi. Na kagiita gaka ndî na ngûgî înu, kammîthûkie îrî ya gîtûmi mûno.

¹⁴Ndaûmba gûtûma antû beetû ba Ayaundi beegua rûriitho, kwaûmbîka bamwe baao boonokue.

¹⁵Ngai agûtiganîria Ayaundi aatumire ûcoore na bara batarî Ayaundi. Bara bakuû bakeewa mwoyo rîra Ayaundi bagaacooka kîrî Ngai.

¹⁶Woona biûyûûyû bia Ayaundi biarî biitheru, wana nciarwa ciao n'intheru. Ûkeegua mîri ya mûtî îrî mîtheru, wana mpong'i cia uu ciîgua irî intheru.

¹⁷Tathûkia ngerekano ya mûtî wa mûceituuni ûtemetwe mpong'i imwe, rwong'i rwa mûceituuni wa kîthaka rûkagwatithanua na uu. Woû ûtarî Mûyaundi ûkari ta rwong'i rûru. Mûceituuni ûra mûteme mpongi n'Ayaundi. Woû ka ûgwatithanîîtue na uu. Ûteethekaga kuumania na inya na mwoyo wa uu.

¹⁸Îmenyeera ûtigeekumîrie kwîgua woû ûrî ûmûgwatithanie na uu îîndî îra mpong'i imwe itemetwe kuuma kîrî uu. Ririkana woû ka ûrî rwong'i. Ti woû ûreraga mîri, i mîri îkûreraga.

¹⁹Îndî naawe waûmba kuuga, “Mpong'i inu ciatemirwe kaingo ngwatithanua.”

²⁰Bûbu n'ûmma. Mpong'i inu ciatemirwe n'ûntû bwa kûrega gwîtîgia. Ûrikîîtue kîrî mûceituuni ûyu n'ûntû bwa wîtîgio bwaku. Kwoogu ûtigeekumie, ûbatîîrue ûkaraga wînyiîtie.

²¹Weegua Ngai ataacaamîra mpong'i ira ciarî cia mûceituuni ûyu ciongwa rî, nûkwona taka woû agaagûcaamîra?

²²Raitha wone bûra Ngai atarî mathee na bûra arî ûmwega. Ataarî na mathee na mpong'i ira aatemire. Îndî kîrî woû, n'ûmwega. N'ûmwega kîrî woû weegua ûkaathingataga mantû maake meega. Weegua t'ûgu, wana woû nagaagûtema.

²³Na mpong'i ira, ta cio Ayaundi, ikaaya gwîtîgia, Ngai agacicookia kaîrî mûtîîni kûra ciarî, n'ûntû nwa aûmbe kûrûtha ûgu.

²⁴Woona Ngai aûmbire kûrûtha kîînyume kîa wîthîre akûthûkia akûgwatithania na mûceituuni wa kwandwa na warî wa mûceituuni wa kîthaka kûringana na wîthîre, n'ata ataûmba kûgwatithania kaîrî mpong'i cia mûceituuni ûyu na mûceituuni mwene cio?

²⁵Ndîenda, aruayia na aarayia, bûmenya kîriga kîra kîrî oogo, n'ûntû kûmenya gûkabûteetheeria bûtikeethûkie taka bûrî na gîtûmi mûno. Kîriga kîra kîrî oogo i kwîgua baingî ba Aisiraeri ibaûmîîtue biongo. Na kûûma biongo kwao gûkaathira rîra bara Ngai athuurîîte batarî Ayaundi bageetîgia Kîrîstû na ûtari bwao bûra bûkwendekana bwagana.

²⁶Na rîru i rîo Isiraeri îkoonokua yonthe. Wata bûra kwandîkîîtwe *Maandîkooni Maatheru, “Mwonokia akauma Cayûni athirie ûthûûku bunthe bûra bûrî na nciarwa cia Njakubu.

²⁷Na rîru i rîo nkaabathiria wîyia bwao wata bûra ndarîîkanîîre na bo.”

²⁸Kagiitaani gaka tûrî Aisiraeri bakari taka barî anthû ba Ngai, kaingo ntheto îmbega îbûkinyîîra biû bûtarî Ayaundi. Îndî wana îîndî bo n'eendwa baake bara athuurîîte n'ûntû bwa mawîrane mara eere biûyûûyû biao.

²⁹Ngai ageeta muntû, we atigarûkaga. Kana weegua i kîewa kîna eete muntû, we aticookaga kûmûtunya kîo kaîrî.

³⁰Kûrî rîra biû bara bûtarî Ayaundi bûtaathîkagîra Ngai. Îndî îîndî n'Ayaundi batamwathîkagîra îîndî îra biû abwîgîîtue kîao.

³¹Îîndî n'Ayaundi bataathîkagîra Ngai. Îndî i kaingo Ngai acooka kûbeegua kîao, ta bûra îîndî kaanya karî keenu.

³²Ngai atuîkithagia antû agwate ba wîyia bwa kûrega kwathîka kaingo eegua antû bonthe kîao.

³³N'ata Ngai arî ithaarimo biingîîte bûgana! N'ata arî ûûme na ûmenyo bwingîîte bûgana! N'ûû wacietû aûmba kûmenya mîbango yake? Kana n'ûû wacietû aûmba kûmenya bûra arutangaga ngûgî?

³⁴N'ûû aiyî bûra mathûgaania ma Mwathani makari? N'ûû aûmba kûmwatha?

³⁵N'ûû aûmba kuuga Mwathani arî na îrandû rîake rîra abatîîrue amûrîa?

³⁶Bionthe biumaga kîrî Ngai, na bionthe bitwîrue n'inya yake, na birî oogo bitûmîka na njîra ya gûtûma akumua. Mwathani arookumagua tene na tene! Aameni.