Read tharaka AROOMA 13 Bible Online

AROOMA 13 - tharaka bible

AROOMA 13

¹Muntû wonthe nabatîîrue aathîkîra thirikaarî, n'ûntû gûtirî mûnene aathana Ngai atamwete inya ya kwathana. I mûbango wa Ngai thirikaarî cionthe kwîgua irî oogo.

²Na kwoogu ûra areganaga na thirikaarî eegagua akîregana na kîra Ngai abangîîte wîgua kîrî oogo. Na muntû ta ûyu nagaakaanûkua.

³Anene batibatîîrue bakuthûkagwa i bara barûthaga mantû meega. Bara barûthaga mantû maathûûku i bo babakuthûkaga. Weegua wenda ûkara ûtakûbakuthûka, rûthaga mantû meega wone bagagûkumia.

⁴Mûnene i mûruti ngûgî wa Ngai wa gûgûteethia. Ûkarûtha mantû maathûûku nûbatîîrue ûkuthûka n'ûntû arî na watho bwa gûgûkaanûkia. We i mûruti ngûgî wa Ngai wa gûkaanûkagia bara barûthaga mantû maathûûku.

⁵Kwoogu nwa mwanka bwathîkagîre anene. Na t'ûntû bwa gûkuthûka babûkaanûkia bunka, îndî i kinya n'ûntû nkoro cienu nikûbwîra ûgu i bu kwagîrîte.

⁶Na gîtûmi gîa kûrûngaga ûgooti, i kwîgua anene i Ngai barutagîra ngûgî n'ûntû bwa kwîgua gîku i kîo gîtûmîîte beegua barî oogo.

⁷Eyanagaani kîra bûbatîîrue bweyana. Weegua n'ûgooti, îrûngagaani kîrî bara babatîîrue babuîrîgîîra. Kana weegua i gîtîîyo, tîîyagaani bara babatîîrue beerîgîîra gûtîîywa.

⁸Îrandû rîra rîonka bûbatîîrue bwîgagua bûrî na rîo, n'îrandû rîa wendo. Bûkeendanaga bûkwingia *watho bwa Ngai bunthe.

⁹Maathana mara maugîîte, “Ûtikaathûngîîre,” “Ûtikaûragane,” “Ûtikaiye,” “Ûtigaatuuyanîîre,” “Ûtikeerirîîrie gîntû kîa muntû,” na maathana mara mangî monthe makamatîîtwe i yathana rîrî rîmwe rîra rîkuuga, “Enda mûtûûri waku ta bûra wîbendeete.”

¹⁰Wendo bûtithûûkagia muntû ûra ûngî. Wendo ibwingagia bûra bunthe watho buugîîte.

¹¹Kwoogu rûthagaani ûgu n'ûntû bûkûmenya i kagiita karîkû gaka tûrî. I kagiita keenu ga gûûka torooni, n'ûntû îîndî kwonokua gwetû kûrî akubî nkûrûki ya rîra twetîgiirie rîa mbere.

¹²Ûtugû bûrî akubî kûthira, kûrî akubî gûkea. Kwoogu tûtigeeni kûrûtha mantû ma mwindu, ga tûthûkieni mîrigo ya werû ya ndûa.

¹³Tûtûûrageeni bûra tûbatîîrue tûtûûra tûrî antû ba mûthenya. Tûtiagîrîtwe tûthiyaga biathooni birî na mantû maathûûku, kana tûtuîka atogooni. Tûtibatîîrue tûrûtha wîyia bwa ûmaramari nwa bûrîkû, kana tûthetania, kana twîgagua antû bara bangî rûriitho.

¹⁴Karagaani ta bûra Mwathani Yiesû Kîrîstû akari. Bûtikaathûgaanie kwingia mawîrirîîria meenu maathûûku ma mwîrî.