Read tharaka AROOMA 16 Bible Online

AROOMA 16 - tharaka bible

AROOMA 16

¹Ndeenda bwîtîgia Poebe, mwarayia ndeni ya wîtîgio, mûteetheeria wa ngûgî ya Ngai kanicaani ya Kenkiria.

²Ndeenda bûmûthûkia ta bûra bara barî ba Mwathani babatîîrue bathûkanagia. Na ndeenda bûmûteethagia na kîonthe kîra akeegagua arî na thîîna na kîo, n'ûntû wana we nateetheetie antû baingî. Wana niû ningwa aranteethia.

³Nkeetheriani Pirisiira na Akuira. Barutagîra Kîrîstû Yiesû ngûgî ta bûra mmûrutagîra.

⁴Bareethûngîria ûgwatiini bwa gîkuû n'ûntû bwakwa. Na ti niû ninka ncookagia nkaatho n'ûntû bwao. Wana kinya makanica monthe ma bara batarî Ayaundi i bacookagia nkaatho n'ûntû bwao.

⁵Nkeetheriani eetîgîri bara barîîkanaga kwao. Nkeetheriani mwendwa Epinitas. N'we aarî muntû wa mbere nthîgûrû ya Îcia gwîtîgia Kîrîstû.

⁶Nkeetheriani Maria. Nabûrutîrîte ngûgî mûno.

⁷Na nkeetheriani Andoronikas na Njunia. N'Ayaundi ta niû, na itwarî na bo nceera rîra ndathaîkîîtwe. Baatuîkire athingati ba Kîrîstû mbere yakwa na atûmwa bara bangî ibabatîîyîîte.

⁸Nkeetheriani kinya Ampiriatas, mwendwa ndeni ya Mwathani.

⁹Nkeetheriani Ubanas. Tûrutagîra Kîrîstû n'we ngûgî. Na nkeetheriani mwendwa Stakus.

¹⁰Nkeetheriani Apeeres. Noonanîîtie wendo bwake kîrî Kîrîstû i bwa mma. Na nkeetheriani antû ba mûciî wa Aristoburus.

¹¹Nkeetheriani Erondia. I Mûyaundi ta niû. Na nkeetheriani antû ba mûciî wa Nakisas, bara barî eetîgîri.

¹²Nkeetheriani aruti ngûgî ba Mwathani—Tiribena na Tiribosa. Na nkeetheriani Pasis, immwendeete mûno. Narutîrîte Mwathani ngûgî mûno.

¹³Nkeetheriani Rubas. Aathuurirwe i Mwathani. Na bûnkeetherie gina. Mmûthûkagia taka arî taata na niû.

¹⁴Nkeetheriani Asinkiritas, Biregoni, Amis, Patirobas, Amas, na aruayia bara bangî barî na bo.

¹⁵Na nkeetheriani Birorogas, Njuria, Nerias barî na mwaragina, Orimpia, na antû ba Ngai bara bangî bonthe bara barî na bo.

¹⁶Keethanagiani na wendo ta eetîgîri. Makanica ma Kîrîstû monthe makûbûkeethia.

¹⁷Aruayia na aarayia, ndîbwîra nkîbûkinyagîîria atî, bwîmenyeere kîrî bara batûmaga antû baathûkana na bagatûma wîtîgio bwao bûgîa thîîna kuumania na ûrutani bûra barutanaga, bûra bûtagwatanagîra na bûra bwarutanirwe. Bûtikaathengeere antû ta babu.

¹⁸Antû bara barûthaga mantû ta mamu ti Kîrîstû Mwathani wetû beegagua bagîtûmîkîra. I mawîrirîîria ma nda ciao beegagua bagîcûa kwingia. Batûmagîra mîgambo îmîega na îrî mûrîo kweneeria bara batamenyaga kana n'ûthûûku babeeraga.

¹⁹Gûtirî we ataiyî biû ibwathîkagîra Mwathani. Na gîku i kîo bûnkenagia na kîo. Ndîenda bwîgua bûrî na ûûme bwa mantû mara meega, gûtarî ûntû bûûthûûku bûkûmenya.

²⁰Ngai ûra atweyaga ûkiri eengeerie gûcinda Saitaani, bûmîcinde. Ûtugi bwa Mwathani wetû Yiesû Kîrîstû bûrookaraga naabi. Aameni.

²¹Bûgûkeethua i Timotheo ûra tûrutaga n'we ngûgî. Na kaîrî bûgûkeethia i Rukias, Njasoni, na Sospita, Ayaundi ta niû.

²²Na wana niû Teritias, nkûbûkeethia ndeni ya Mwathani. I niû mbaandîkîrîte Paûrû baarûa îno.

²³Bûgûkeethua i Gayas ûra nkaraga gwake. Twinthe tûrî kanica tûrîîkanaga gwake. Na bûgûkeethua i mwaigi wa kîgîîna gîa taûni, ta we Erastas. Na bûgûkeethua i mûruayia Kuaritas. [

²⁴Ûtugi bwa Mwathani wetû Yiesû kîrîstû bûrookaraga naabi bwinthe. Aameni.][5]

²⁵Tûkumagieni Ngai. Ngai arî na inya ya gûtûma bûrika wîtîgioni kwa inya ya ntheto îmbega. N'yo ntûmwa îra yugîîte mantû ma Yiesû Kîrîstû, îra yatûîre yithîîtwe îrî kîriga kwa îgiita rîîraaya mûno.

²⁶Îndî îîndî itûgwûrîrîtwe yo gûkûrûkîîra kîrî maandîko ma iroria. Na Ngai ûra atûûraga tene na tene augîîte îmenyithanue kîrî mîgongo yonthe, kaingo antû beetîgia Kîrîstû na bamwathîkîra.

²⁷Gûkûrûkîîra kîrî Yiesû Kîrîstû, Ngai arookumua tene na tene. Gûtirî ûngî mûûgî ta we! Aameni.