Read tharaka AROOMA 2 Bible Online

AROOMA 2 - tharaka bible

AROOMA 2

¹Kwoogu woû ûgiitagîra bara bangî îgamba ûtirî na rûûtha rwa kûrûtha ûgu. Rîra ûkûgiitîra bara bangî îgamba, na wana woû nûrûthaga mantû maathûûku, i ta woû wengwa ûkwîgiitîra îgamba.

²Twiyî Ngai agiitaga îgamba rîa bara barûthaga mantû ta mamu n'ûntû ikwagîrîte.

³Nûkwona taka Ngai atagîkûgiitîra îgamba oone ûrî mwîyia n'ûntû bwa kûgiitîra bara beeyagia îgamba na woû wîyagia meeyia ta maao?

⁴Ngai nakwoneetie bûra arî kîao kîgana. Atikweyaga îkaanûkia nthûti îmwe na ainyîkagîria mara ûrûthaga kwa îgiita rîraaya, îndî ûtionaga bûbu ta ûntû. Ka ûtaiyî Ngai i kîao akwîgagua n'ûntû neendaga wîrira?

⁵Îndî naawe ûûmîîtie kîongo warega kwîrira. Kwoogu nwa ka ûkwîbongeera ûrito bwa îkaanûkia rîra ûkeewa ntugû îra Ngai akoonania bûra mûthûûro wake ûgana na bûra agiitaga magamba bûra kwagîrîte.

⁶Ntugû înu Ngai akaa woora muntû kîewa gîake kûringana na bûra ûkeegua arûthîîte.

⁷Akaa kîewa kîa mwoyo wa tene na tene bara baûmagîîria bagakara bakîrûthaga mantû meega, bara beendaga kwona mwago wake, bara beendaga abatîîya, na beendaga gûtûûra batagîkua.

⁸Îndî bara beenganaga na mantû maao na barûthaga mantû maathûûku bantû a barûthaga bûra bûrî bwa mma, Ngai akaboonia bûra mûthûûro wake kîrî bo ûgana.

⁹Muntû wonthe ûra atatigaga kûrûtha mantû maathûûku akoonua thîîna na kînyamaara. Ayaundi i bo bakeegua barî ba mbere, rîru antû bara bangî batarî Ayaundi.

¹⁰Bara barûthaga mantû meega Ngai akaboonia mwago, akabatîîya na akabaa ûkiri. Na Ayaundi i bo bakaambia, rîru antû bara bangî batarî Ayaundi.

¹¹Gûtirî we Ngai eendagîîra

¹²Bara batarî Ayaundi beeyia batarî na watho bakaathirua gûtarî na watho woogu. Na Ayaundi n'ûntû barî na *watho bwa Musa i bu bakaagambithua na bu beeyia n'ûntû bwa kûbuuna.

¹³Muntû atituîka ûmwagîru n'ûntû bwa kwîgua watho. Îndî akûrûtha bûra watho buugaga naagîrithagua.

¹⁴Bara batarî Ayaundi batirî na watho, îndî rîra barûthaga bûra watho buugîîte kuumania na bûra baiyî i bu kwagîrîte, bo bongwa i bo watho, wana kinya ûkeegua batirî na watho bwa Musa.

¹⁵Rîra barûthaga ûgu, boonanagia watho bwandîkîîtwe nkorooni ciao. Na wana mathûgaania maao imoonanagia wabu ûgu i bu gûkari, n'ûntû mathûgaania maao kûrî rîra maboonagia ibabîtîîtie na kagiita kangî makaboonia barûthîîte bûra kwagîrîte.

¹⁶Na kûringana na ntheto îmbega îra ntûmagîîria, mantû mamu magaatuîkîka ntugû îra Ngai akaagiita îgamba rîa mathûgaania monthe ma witho ma antû bonthe, gûkûrûkîîra kîrî Kîrîstû Yiesû.

¹⁷Na woû naawe uugaga ûrî Mûyaundi na wîgwatagia *watho, wîkumagia nwiyî Ngai

¹⁸na bûra eendaga kûrûthwa. Uugaga wîrutanîîte na watho kwathûrana wega na ûthûûku,

¹⁹na wîthûkagia i woû ûgwete ntûngi mûtî na i woû werû bwa bara barî mwinduuni.

²⁰Wîthûkagia i woû wonagia bara bataku na i woû mwarimû wa bara gûtarî bu baiyî. Ûthûgaanagia ûrî na ûmenyo bunthe na nwiyî ûmma bunthe n'ûntû nwiyî watho.

²¹Woû ûrutanaga bara bangî rî, i mbi îgiragia wîrutana ûrî woû? Î woû uugaga wamba i meeyia rî, nwiyaga?

²²Î woû uugaga ûthûngîîri i meeyia rî, nûthûngagîîra? Î woû ûmeneete ngai cia mîbuanaano rî, nwiyaga kûra ngai inu irombagîrwa?

²³Î woû naawe wîkumagia nwiyî watho bwa Ngai rî, ûtiagagîra Ngai gîtîîyo rîra uunaga watho bwake?

²⁴Wata bûra kwandîkîîtwe *Maandîkooni Maatheru, “I biû bûgiragia riîtwa rîa Ngai rîtîîywa i bara batarî Ayaundi.”

²⁵Ûkeegua wathîkagîra watho, gûtaanwa gwaku kûrî na gîtûmi. Îndî ûkeegua uunaga watho i bûmwe na ûtagîtaanirwe.

²⁶Ûkeegua muntû ûngî atarî Mûyaundi, ûra we atarî ûmûtaane naathîkagîra maathana mara marî wathooni rî, nûkwona taka Ngai atakîmûthûkia arî ta muntû ûmûtaane?

²⁷Kwoogu muntû ûra aathîkagîra watho atarî ûmûtaane akabûgiitîra îgamba biû bara bataane na bûrî na maandîko ma watho îndî bûtimaathîkagîra.

²⁸Ûtiûmba kuuga ûrî Mûyaundi wa mma n'ûntû bwa akî kwîgua aciari baaku n'Ayaundi, na atî, ûrî ûmûtaane.

²⁹Mûyaundi wa mma n'ûra ataanîîtwe nkoro yake. Rûtaano rwa mma i rwa gîîkîrundu, ti rûra rungwa. Ûra ataanîîtwe nkoro akumagua i Ngai îndî t'antû.