Read tharaka AROOMA 3 Bible Online

AROOMA 3 - tharaka bible

AROOMA 3

¹Kwoogu îîndî rî, kwîgua ûrî Mûyaundi kûrîkûguna na mbi? Kana gûtaanwa kûrî na gîtûmi kîrîkû?

²Yîî bu kûrî na baita na njîra inyingî. Na bwa mbere, n'Ayaundi Ngai eetîgiirie na mîgambo yake.

³Îndî rî, ûkaaya kwîgua bamwe baao bataatûîka eetîgua, ka gûtuîka Ngai agaatiga kwîgua arî mwîtîgua?

⁴Arî buru! Ngai aaragia ûmma wana kinya ûkeegua muntû wonthe nthîgûrû i mûûrongo. *Maandîkooni Maatheru kwandîkîîtwe ûûgû îgûrû rîa Ngai, “Ûkoonekana waragia ûmma, na wathitangwa ûgaacinda îgamba.”

⁵Ûkaaya kwîgua mantû maathûûku mara tûrûthaga moonanagia bûra Ngai aagîrîte bûgana, Ngai tika agûtûbîtîria rîra akûthûûra i tiû agatwa îkaanûkia? (Aaga ndîaria ta muntû wa kîînthîgûrû.)

⁶Bûbu n'ûrongo. Ûkeegua ûgu n'ûmma rî, n'ata îndî Ngai akaagambithangia antû?

⁷Waûmba kwîgua muntû akiuga, “Ûkaaya kwîgua ndarongoa ingûtûma Ngai atîîywa n'ûntû bwa kwonania aaragia ûmma rî, i kî îndî n'ûntû nkaagiitîrwa îgamba bûûthûûku, mbîtwe mwîyia?”

⁸Kûthûgaania ûntû ta bûbu i ta bûmwe na kuuga, “Ga tûrûthe mantû maathûûku kaingo mantû meega maaya.” Na wabu kûrî antû bagûtûtuîrîîra bakauga ûgu i bu tûrutanaga antû. Antû ta babu baagîrîtwe bagiitîrwa îgamba bûûthûûku.

⁹Kwoogu Ayaundi twaûmba kuuga tûrî gîtûmi nkûrûki ya antû bara bangî? Arî, gûtirî gîntû ta gîku! Itûbwoniirie atî, Ayaundi na bara batarî Ayaundi bonthe baathagwa n'inya ya wîyia.

¹⁰Na wata bûra kwandîkîîtwe *Maandîkooni Maatheru, “Gûtirî we mwagîru, kinya nwa ûmwe ûgu.

¹¹Gûtirî we aciûkagîrwa, gûtirî we eendaga kûmenya Ngai.

¹²Antû bonthe barî aaraaya na Ngai, bonthe ibabîtîîtie. Gûtirî muntû arûthaga mantû meega, kinya nwa ûmwe”

¹³“Mîgambo yao n'ûgwati, nîtûmaga antû bakua. Batûmagîra ndîmî ciao kwaria ûrongo.” “Mîgambo yao îkari ta cûmû ya njoka.”

¹⁴“Tûnyua twao i twa kûrîrîkana na ntheto cia rûmena.”

¹⁵“Barî mpwî cia gûtonyana na kûûragana.

¹⁶Wanaara barathi batigaga wînyangia na kînyamaara.

¹⁷Batiendaga ûkiri.”

¹⁸“Batikuthûkaga Ngai nwa aniini.”

¹⁹Itwiyî atî, ûntû bunthe bwandîke *wathooni bwaandîkirwe n'ûntû bwa bara baathagwa i watho. Na watho buugîîte mantû mamu kaingo antû bonthe batoona bwa kwîgwatia na kaingo gûtuîka kîrîndî kîa nthîgûrû kîonthe gîkaagiitîrwa îgamba i Ngai.

²⁰Na kwoogu gûtirî muntû aûmba kwagîrithua i Ngai kuumania na kûthingata watho. Watho ibûtûmaga tûmenya meeyia meetû.

²¹Îgiitaani rîrî tûrî, itûgwûrîrîtwe wagîru bûra Ngai atwete atagûtûmîra *watho. Mabuku ma watho na ma iroria imakûûyîîrîîte ûntû bûbû.

²²Ngai atweyaga wagîru bûbû n'ûntû bwa gwîtîgia Yiesû Kîrîstû. Na bu i bwa kîrî muntû wonthe ûra eetîgagia. Antû bonthe i bûmwe,

²³n'ûntû antû bonthe n'eeyia na tûrî aaraaya na wagîru bwa Ngai.

²⁴Gûtwagîrithia kûra Ngai atwagîrithagia i kîewa kuumania na ûtugi bwake. Atwagîrithagia gûkûrûkîîra kîrî Kîrîstû Yiesû ûra atûthaûraga tûkauma meeyiani meetû.

²⁵Ngai aatûmire Kîrîstû eeruta arî kîgongwana n'ûntû bwa meeyia meetû. Twagîrithagua rîra twetîgia atî Kîrîstû eetûûrire nthakame yake n'ûntû bwetû. Na ûgu ikwonania bûra Ngai aagîrîte bûgana, n'ûntû mbereeni ateeyaga bara beeyagia îkaanûkia na mpwî.

²⁶Îndî îgiitaani rîrî tûrî oonanagia wagîru bwake. Na kaîrî Ngai aatûmire Kîrîstû kwonania n'ûmwagîru na naagîrithagia bara beetîgagia Yiesû.

²⁷Kwoogu rî, kûrî gîtûmi gîetû gwîkumia? Gûtirî kîo. Na i kî? Gîtûmi i kwîgua tûtituîkaga baagîru n'ûntû bwa kûthingata watho, îndî i kuumania na wîtîgio bwetû.

²⁸Kwoogu itwiyî muntû aagîrithagua i Ngai n'ûntû bwa wîtîgio na t'ûntû bwa kûthingata watho.

²⁹Ka Ngai arî Ngai wa Ayaundi bonka akî? Anga t'wa we Ngai wa bara batarî Ayaundi kinya bo?

³⁰Ngai n'ûmwe. Aagîrithagia Ayaundi n'ûntû bwa wîtîgio bwao na akaagîrithia bara batarî Ayaundi kuumania na wîtîgio bwao.

³¹Ûkeegua twagîrithagua i wîtîgio rî, ga tûkwenda kwonania watho bûtirî na gîtûmi? Arî buru! Ûmma n'atî, nwa rîra rîonka tûrî na wîtîgio twingagia gîtûmi kîa watho.