Read tharaka AROOMA 4 Bible Online

AROOMA 4 - tharaka bible

AROOMA 4

¹N'ata tûûmba kuuga îgûrû rîa Îburaîmu, îthe wa Ayaundi? N'ata tûûmba kûthooma kuumania n'we?

²Ûkeegua Îburaîmu aagîrithiirue i Ngai n'ûntû bwa mantû mara aarûthire, rîru nwa eekumie. Îndî Ngai ataamwagîrithia n'ûntû bwa mantû mara aarûthire.

³*Maandîko Maatheru maugîîte, “Îburaîmu neetîgîîtie Ngai. Na n'ûntû bwa wîtîgio bwake Ngai aamûthûkiirie arî muntû ûmwagîru.”

⁴Muntû arutîîte ngûgî, mûcaara wake ûtithûkagua ta kîewa akwewa. Mûcaara i gîntû gîa kûthithinîra.

⁵Îndî muntû atirîmia wagîru kuuma kîrî Ngai na kûruta ngûgî. Muntû ûra eetîgagia i Ngai aagîrithagia eeyia, Ngai athûkagia wîtîgio bûbu bwake bûrî wagîru.

⁶Ûgu nwa bu Ndaundi augîîte îbukuuni rîa Cabuurî. Augîîte muntû ûra mûthaarime n'ûra Ngai athûkagia arî ûmwagîru, na wagîru bwake bûtaumanîîtie na mantû mara arûthaga.

⁷“Kîthaarimo i kîrî bara barekeretwe kûrega kwathîka kwao, bara meeyia maao mathirîîtue.

⁸Kîthaarimo i kîrî muntû ûra Mwathani atatarîrîte meeyia maake.”

⁹Kîthaarimo gîkî i kîa bara bataane bonka, kana i gîa kinya bara batarî bataane? Twauga, “Îburaîmu neetîgîîtie Ngai. Na n'ûntû bwa wîtîgio bwake Ngai aamûthûkiirie arî muntû ûmwagîru.”

¹⁰Arîo rî, i rî rîru kwarî? Kwarî nyuma ya agûtaanwa kana i mbere? Kwarî mbere ya ataanwa.

¹¹Îburaîmu aataanirwe rûrî rwano rwa kwonania Ngai naamwagîrithîîtie mbere ya ataanwa, n'ûntû bwa wîtîgio bwake. Na kwoogu Îburaîmu n'we îthe wa bara bonthe barî na wîtîgio na batarî bataane. Wana bo Ngai abathûkagia barî baagîru.

¹²Îburaîmu nwa we îthe wa bara bataane, na t'ûntû na bûra barî bataane, îndî n'ûntû bwa bûra barî na wîtîgio ta bûra aarî na bu mbere ya ataanwa.

¹³Ngai akwa Îburaîmu na nciarwa ciake wîrane abeera akabaa nthîgûrû yonthe rûrî rûgai rwao, ataabaa wîrane bûbu n'ûntû bwa kwîgua Îburaîmu naathingataga watho. Aabeere bu n'ûntû bwa kwîgua Ngai aathûkiirie Îburaîmu arî muntû ûmwagîru kuumania na wîtîgio bwake.

¹⁴Ûkaaya kwîgua bara bathingataga watho i bo bakeewa rûgai, i ta kwonania wîtîgio bûtirî gîtûmi na wîrane bûbu i bwa mana.

¹⁵Watho ibûreetagîîra antû mûthûûro wa Ngai. Îndî rîra gûtarî watho gûtirî kuuna watho.

¹⁶Na kwoogu kîrî wîrane, wîtîgio i bu bûrî gîtûmi. Ngai oonanîîtie wîrane bwake i bwa mma kîrî nciarwa cia Îburaîmu cionthe n'ûntû Ngai arî ûtugi. Wîrane bwake ti kîrî nciarwa cia Îburaîmu cionka ira ithingataga watho, i kinya kîrî bara barî wîtîgio ta Îburaîmu. N'we baaba wetû twinthe.

¹⁷Wata bûra kwandîkîîtwe *Maandîkooni Maatheru, “Ngûtuîkithîîtie îthe wa mîgongo îmingî.” Îburaîmu eerirwe ûgu n'ûntû naarî na wîtîgio na Ngai ûra ariûkagia antû baakuû, ûra arûthaga mantû mateegua marî oogo kaîrî.

¹⁸Rîra Ngai eerire Îburaîmu nciarwa ciake ikeegua irî inyingî ta nthata, Îburaîmu neetîgiirie. Wana kinya ûkeegua ataarî na wîrîgîîro bwa kwîgua arî na aana, Îburaîmu naathiire na mbere kwîgua arî na wîrîgîîro. Na kwoogu aatuîka “îthe wa mîgongo îmingî.”

¹⁹Kagiitaani gaku Îburaîmu aarî na ûkûrû ta bwa mîanka îgana. Noonaga i taka aarî ûmûkuû, na Saara, mwekûrû wake, naakûrûkîîtie îgiita rîa kûgîa na mwana. Îndî amwe na ûgu wîtîgio bwake bûtaanyiia.

²⁰Ataaroogea nkanja na wîrane bwa Ngai. Wîtîgio bwake ibwaingîire nkûrûki, aakumia Ngai.

²¹Neetîgîîtie na mma Ngai akîûmba kwingia wîrane bwake.

²²Kwoogu n'ûntû bwa wîtîgio bwake “Ngai aamûthûkiirie arî muntû ûmwagîru.”

²³Mîgambo îno, “Ngai aamûthûkiirie arî muntû ûmwagîru,” îtaandîkwa n'ûntû bwa Îburaîmu wenka.

²⁴Yaandîkirwe n'ûntû bwetû wana tiû, bara twagîrithagua n'ûntû itwîtîgîîtie Ngai ûra aariûkiirie Mwathani wetû Yiesû.

²⁵Yiesû aarutirwe arî kîgongwana n'ûntû bwa meeyia meetû, na aariûkire kaingo twagîrithua i Ngai.