Read tharaka AROOMA 5 Bible Online

AROOMA 5 - tharaka bible

AROOMA 5

¹Kwoogu n'ûntû itwagîrithîîtue i Ngai kuumania na wîtîgio bwetû, tûrî na ûkiri na Ngai gûkûrûkîîra kîrî Mwathani wetû Yiesû Kîrîstû.

²Gûkûrûkîîra kîrî Kîrîstû itûthaarimîîtwe na ûtugi bûra tûrî na bu bwa Ngai n'ûntû bwa wîtîgio bwetû. Na kwoogu tûbukenagîîra tûrî na wîrîgîîro bwa kûthi mwagooni wa Ngai.

³Na t'ûgu bunka, itûkenaga kinya tûrî mathîînaani n'ûntû itwiyî mathîîna mara twonaga imatûmaga tûkagîa na kûûmîîria.

⁴Kûûmîîria igûtûmaga muntû eegua arî wa mûkarîre ûmwega. Na kwîgua muntû arî wa mûkarîre ûmwega igûtûmaga agîa wîrîgîîro.

⁵Gûtirî rîo wîrîgîîro bwetû bûgaatûringa nthî, n'ûntû Ngai atûûyûrîîtie wendo bwake nkorooni cietû gûkûrûkîîra kîrî Kîrundu wake Ûmûtheru ûra atwete.

⁶Rîra twarî eeyia tûtaûmba kwîbonokia, i rîo Kîrîstû aakuire kagiita kara Ngai aabangîîte n'ûntû bwetû, tiû eeyia.

⁷N'ûntû bwarî inya kwona muntû agîkua n'ûntû bwa muntû ûmwagîru, îndî muntû nwa akue n'ûntû bwa muntû ûmwega.

⁸Îndî Ngai noonaniirie bûra atwendeete bûgana rîra aatûmire Kîrîstû aaya gûkua n'ûntû bwetû amwe na kwîgua rîru twarî eeyia.

⁹Wona Kîrîstû aatûmire twagîrithua i Ngai na gîkuû gîake, twagûtwonokia atagîtwonokia kuuma kîrî mûthûûro wa Ngai!

¹⁰Rîra twarî anthû ba Ngai, Ngai aatumire ûcoore naati na gîkuû kîa Mwana wake. Îîndî tûrî acoore baake rî, n'ata tûtakîonokua i Kîrîstû îîndî arî mwoyo?

¹¹Na t'ûgu bunka, itûkenagîîra kwîgua tûrî ndeni ya Ngai n'ûntû bwa bûra Mwathani wetû Yiesû Kîrîstû aarûthire, aatûma tûtuîka acoore ba Ngai.

¹²Wîyia nthîgûrû bwaumaniirie na bûra muntû ûmwe aarûthire. Na i wîyia bwa muntû ûyu bwatûmire kwîgua kûrî na gîkuû. Gîku i kîo n'ûntû gîkuû gîatambire gwatuîka muntû wonthe nwa agaakua, n'ûntû antû bonthe n'eeyia.

¹³Antû nwa beeyagia kinya mbere ya Musa eewa *watho, îndî antû bataataragîrwa meeyia mara baarûthaga n'ûntû gûtaarî watho.

¹⁴Îndî kuuma kagiita ka Andamu mwanka ka Musa, bara bonthe baatûûraga kagiitaani gaku baathagwa n'inya ya gîkuû, wana kinya ûkeegua bateeyia bûmwe na Andamu. Nwa tûbuanaanie Andamu na Kîrîstû ûra aarî mûûyi,

¹⁵îndî tûtibuanaania wîyia bwa Andamu na kîewa kîa mana kîa ûrekeri, kîra Ngai eeyanire n'ûntû bwa ûtugi bwake. Kuumania na Andamu arî ûmwe ûgu, n'we aareeteere mwingî gîkuû na wîyia bwake, îndî Yiesû Kîrîstû arî ûmwe naareeteere antû kîewa kîa Ngai kîa mana, kîra gîkûrûkîîte wîyia bwa Andamu na kûraaya.

¹⁶Bûra bwaumaniirie na wîyia bwa muntû ûyu arî ûmwe bûrî mûkûûraani mûno na kîewa kîa mana, kîra Ngai aatwere. Wîyia bwa Andamu ibwatûmire antû bonthe bagiitîrwa îgamba bûûthûûku. Îndî kîewa kîra Ngai aatwere, kîo igîatûmire twagîrithua amwe na kwîgua tûrarûtha meeyia maingî.

¹⁷Wîyia bwa muntû ûmwe, ta we Andamu, ibwatûmire antû bonthe baathagwa n'inya ya gîkuû. Îndî bûra muntû ûmwe aarûthire, ta we Yiesû Kîrîstû, ibûkûrûkîîte ûgu Andamu aarûthire na kûraaya. Bara beeyagwa kîewa kîa wagîru na ûtugi bûbu bwingîîte bûgana ûgu, bakaathanaga ûtûûrooni tene na tene n'ûntû bwa muntû ûyu ûmwe, Yiesû Kîrîstû.

¹⁸Kwoogu, wata bûra wîyia bwa muntû ûmwe bwatûmire antû bonthe bagiitîrwa îgamba bûûthûûku, nwa ta bu wagîru bwa muntû ûmwe bûtûmaga antû bonthe batuîka baagîru na boona mwoyo.

¹⁹Na wata bûra kûrega kwathîka kwa muntû ûmwe gwatûmire Ngai athûkia antû baingî barî eeyia, nwa ta bu kwathîka kwa muntû ûmwe gûgaatûma Ngai athûkia antû baingî barî baagîru.

²⁰Watho bwanenkanîîrwe kaingo bwonania nkûrûki bûra antû bateendeete kwathîka. Îndî amwe na kwîgua kûrega kwathîka gwa antû ikwoonekanire kûrî kûûnene, ûtugi bwa Ngai i bu bwarî bwingî nkûrûki ya ku na kûraaya.

²¹Kwoogu wata bûra wîyia bwathire antû bwabareetera gîkuû, nwa ta bu ûtugi bwa Ngai bwathaga antû na njîra ya kûbaagîrithia bakoona mwoyo wa tene na tene, gûkûrûkîîra kîrî Yiesû Kîrîstû Mwathani wetû.