Read tharaka AROOMA 6 Bible Online

AROOMA 6 - tharaka bible

AROOMA 6

¹Kwoogu nwa tuuge tûthi na mbere na kwîyia kaingo Ngai oongeera ûtugi?

²Arî buru! Gûtirî ûntû ta bûbu! Anga ti taka tûrî baakuû kîrî meeyia. Kwoogu n'ata tûûmba gûcooka gûtûûra kîrî mo kaîrî?

³I mma ibwiyî rîra twabaatithiirue twagîa ngwatanîro na Kîrîstû, itwabaatithiirue twagîa ngwatanîro n'we gîkuûni gîake.

⁴Kwoogu i taka twathikanîîrue amwe na Kîrîstû kûbaatithuani gwetû na itûgwatanîrîte n'we gîkuûni gîake, kaingo na tiû tûtûûra ûtûûro bûngî bûûyerû ta bûra Kîrîstû aariûkiirue n'inya ya kûgegania ya Îthe.

⁵Ûkoona tûgwatithanîîtue na Kîrîstû gîkuûni gîake, wana kûriûkuani gwake ûkeegua tûgwatithanîîtue n'we.

⁶Itwiyî mûtugo wetû ûra twarî na uu wambanîîrue na Kîrîstû kaingo wîyia bûthirua mîîrîîni yetû, na kaingo tûtatuîka nkombo cia wîyia kaîrî.

⁷Ûra wonthe aarookua n'ûmûkûûre auma inyaani ya wîyia.

⁸Ûkoona twakuyanîîrie na Kîrîstû, itwîtîgîîtie wana gûtûûra tûgaatûûrania amwe n'we.

⁹Itwiyî Kîrîstû naariûkire na atiikua kaîrî. Gîkuû gîtimûûmba kaîrî.

¹⁰Rîra Kîrîstû aakuire, aakuire rîmwe na rîa mûthia kaingo athiria wîyia. Îîndî arî oogo n'ûntû bwa gûkenia Ngai.

¹¹Wana biû îthûkieni bûrî baakuû kîrî wîyia na îthûkieni bûrî mwoyo kîrî Ngai ndeni ya Kîrîstû Yiesû.

¹²Kwoogu bûtikaarekeeni wîyia bwatha mîîrî yenu bwathîkîra mawîrirîîria ma yo maathûûku.

¹³Bûtikaarûthe mantû maathûûku na gîcuncî kîa mîîrî yenu bûtûmîkîra wîyia na kîo. Îruteeni kûrû kîrî Ngai bûrî antû bara barutîîtwe gîkuûni baareetwa mwoyooni. Înenkeraani Ngai icuncî bienu bionthe bitûmîke kûrûtha mantû maagîru.

¹⁴Îîndî bûtiathagwa i wîyia n'ûntû ibûtiganîîte na watho bwagarûkîra ûtugi.

¹⁵Kwoogu nwa twîyie n'ûntû itûtiganîîte na watho twagarûkîra ûtugi? Arî buru!

¹⁶Ibwiyî ûkeeruta gûtuîka nkombo ya muntû nwa mwanka wathîkîre mûnene ûyu waku. Nwa ûthuure kwathîkîra meeyia kûra kûreetaga gîkuû, kana ûkathuura kwathîkîra Ngai kûra kûreetaga wagîru.

¹⁷Nkaatho i kîrî Ngai n'ûntû bwa bûra bûthingataga na nkoro cienu cionthe mara bwarutanirwe, bwauma ûkombooni bûra bwarî bwa meeyia.

¹⁸Îîndî ibûthaûrîîtwe bwauma meeyiani bwatuîka nkombo cia wagîru.

¹⁹Ndîtûmîra ngerekano îno n'ûntû n'îmbûthû kaingo bûmenya bûra nkûbwîra. Ta bûra bwanenkanîrîte icuncî bimwe bia mîîrî yenu biatuîka nkombo cia mantû mataagîrîte na kûrega kwathîka, îîndî nenkanîraani îcuncî bia mîîrî yenu bituîke nkombo cia wagîru, kaingo bûtûûraga ûtûûro bûûtheru.

²⁰Kagiitaani kara bwarî nkombo cia meeyia wagîru bûtikîûmba kûbûrigîîria kûrûtha bûra bûkwenda.

²¹I baita mbi bwoonire kuumania na mantû mara? Mantû mara matûmaga bwîgua nthoni bwaririkana ibwamarûthaga. Baita ya mo i gîkuû!

²²Îndî îîndî ibûthaûrîîtwe bwauma inyaani ya meeyia bwatuîka nkombo cia Ngai. Îîndî bûrûthaga mantû mara mareetaga ûtheru na baita ya mo i mwoyo wa tene na tene.

²³Mûcaara wa meeyia i gîkuû. Îndî kîewa kîa Ngai kîra atwete kîa mana i mwoyo wa tene na tene ndeni ya Kîrîstû Yiesû Mwathani wetû.