Read tharaka AROOMA 7 Bible Online

AROOMA 7 - tharaka bible

AROOMA 7

¹Biû, aruayia na aarayia, bara bwiyî *watho, ibwiyî bûra nthiîte kûgweta i bwa mma. Watho bûtûmîkaga kwatha muntû rîra arî mwoyo rîonka.

²Kwa ngerekano, watho buugîîte mûka agwatithanîîtue na ûra amûgûrîîte rîra muntû ûyu arî mwoyo. Îndî mwene agakua, mûka nathaûragwa i watho bwa mantû ma kûgûrana.

³Îndî mûka akeenenkanîra kîrî muntû ûngî na mwene arî mwoyo, mûka ûyu atuîkaga i mûthûngîîri. Îndî mwene agakua, mûka ûyu nathaûragwa i watho. Rîru wana akagûrwa i muntû ûngî atiîgua arî mûthûngîîri.

⁴Na wata ûgu, aruayia na aarayia, bûrî baakuû kîrî watho n'ûntû îîndî bûrî gîcuncî kîa mwîrî wa Kîrîstû. Îîndî bûrî ba muntû ûngî, ûra aariûkire auma kîrî bara bakuû, kaingo bûtûmîkîra Ngai na kûrûthaga mantû meega.

⁵Rîra twarî ba mûtugo wa kîîmuntû, ta uu wa wîyia, mawîrirîîria maarutaga ngûgî ndeni yetû magatûma tûrûtha mantû mara mareetaga gîkuû. Na i watho bwatûmaga mawîrirîîria mamu magîa inya ya kûruta ngûgî.

⁶Îndî îîndî itûthaûrîîtwe twauma wathooni n'ûntû i taka tûrî baakuû na tûtirî agwate ba watho kaîrî. Kwoogu tûtûmîkagîra Ngai na njîra îngî ya gîîkîrundu, ti na njîra îra nkûrû ya kûthingataga watho bûra bwandîke.

⁷Twaûmba kuuga *watho i wîyia? Arî buru! I watho bwatûmire mmenya wîyia i mbi. Ntikîmenya kana i wîyia kwîrirîîria gîntû kîa muntû ûra ûngî ûkeegua watho bûtiugîîte, “Ûtikeerirîîrie gîntû kîa muntû ûra ûngî.”

⁸Yathana rîru i rîo rîere wîyia mwanya wa gûtûma mbîgua ndî na mawîrirîîria ma mîthemba yonthe ndeni yakwa. Ûkeegua ti watho, wîyia ûtiîgua bûrî na inya îgana ûgu.

⁹Niû kûrî rîo ndatûîre ntakûmenya bûra watho buugîîte. Îndî nkûmenya maathana, rîru i rîo ndamenyire wîyia bûrî inya, ndakua.

¹⁰Atî maathana mara magîntûûria mwoyo i mo maatûma nkua.

¹¹Wîyia bwonire ibûtûmîre kaanya gaku ga kwîgua maathana marî oogo, bûmbenie. Bwatûmîîre maathana kûmbûraga.

¹²Kwoogu watho i bûûtheru. Na wana maathana i maatheru, i maagîrîte, na i meega.

¹³Twaûmba kuuga gîntû kîega ta gîku i kîo gîatûmire nkua? Arî buru! Wîyia i bu bwatûmîîre gîntû kîega kîmbûraga. Kwoogu itûkwona bûra wîyia bûkarakarangi. Maathana imakwonania wîyia bûrî ûrito bwa kûrûtha wîyia mûno nkûrûki ya kîthimi.

¹⁴Itwiyî watho buugîîte mantû ma gîîkîrundu, îndî ndî niû na bwakwa ntirî mantû ma gîîkîrundu. Mbendeetue ndatuîka nkombo ya wîyia.

¹⁵Ntimenyaga i kî n'ûntû ndûthaga mantû mara ndûthaga. Ntirûthaga bûra mbendaga kûrûtha, ndûthaga bûra nteendeete.

¹⁶Kwoogu ûkoona ndûthaga bûra nteendeete kûrûtha, i ta kwonania inkûgwatanîra na kuuga atî watho i bwega.

¹⁷Îndî ti niû ndûthaga mantû mama, i wîyia bûra bûkaraga ndeni yakwa.

¹⁸Imbiyî gûtirî ûntû bwega bûrî ndeni ya mûtugo wakwa wa kîîmuntû, ta uu wa wîyia. N'ûntû wana nkîendaga kûrûtha ûntû bwega ntiûmba kûburûtha.

¹⁹Ntirûthaga mantû meega mara mbendaga kûrûtha, ndûthaga mantû maathûûku mara nteendeete kûrûtha.

²⁰Kwoogu ûkoona ndûthaga bûra nteendaga kûrûtha, ti niû ndûthaga bu. I wîyia bûra bûkaraga ndeni yakwa.

²¹Kwoogu mboneete gûtuîkaga atî, rîra mbendaga kûrûtha ûntû bwega, ûthûûku bûtindekaga.

²²Mathûgaaniani maakwa mbîgagua nkîgwatanîra na watho bwa Ngai.

²³Îndî ndathikîîria nkeegua kûrî na watho bûngî bûkûrûa na bûra bûrî mathûgaaniani maakwa. Na watho bûbu i bu bûnkîragia inya bûgaantuîkithia mûgwate wa wîyia bûra bûûyûri mwîrî wakwa unthe.

²⁴Gîku na ti kînyamaara ndî na kîo! N'ûû agaantunyûkia mwîrî ûyû ûgiitîrîtwe îgamba werwa n'ûgaakua kûringana na bûra ûkari?

²⁵I Ngai agaantunyûkia! Inkûmûcookeria nkaatho n'ûntû bwa kûmbonokia na bûra Mwathani wetû Yiesû Kîrîstû aarûthire. Kwoogu mathûgaaniani maakwa ntûmîkagîra watho bwa Ngai. Îndî mûtugo wakwa wa kîîmuntû, ta uu wa wîyia, ûtûmîkagîra watho bwa wîyia.