Read tharaka AROOMA 8 Bible Online

AROOMA 8 - tharaka bible

AROOMA 8

¹Ûra arî ndeni ya Kîrîstû Yiesû atiigiitîrwa îgamba bûûthûûku.

²Watho bwa Kîrundu bûra bûtûmaga twîgua tûrî mwoyo n'ûntû tûrî ndeni ya Kîrîstû Yiesû ibûnthaûrîîte ndauma wathooni bûra bûreetaga wîyia na gîkuû.

³Watho ibwaremirwe gûtwonokia n'ûntû bwa mûtugo wetû wa wîyia. Îndî Ngai aatûmire Mwana wake eegua arî muntû ta tiû, eeyia, kaingo amûruta arî kîgongwana n'ûntû bwa meeyia meetû na kaingo athiria inya îra maarî kîrî tiû.

⁴Ngai aarûthire ûgu kaingo tiû tûtûûraga tûrî na inya ya gîîkîrundu twathîkîra bûra watho bûtwîrîîte, tiû bara tûtaathagwa n'inya ya mûtugo wa kîîmuntû, ta uu wa wîyia.

⁵Bara baathagwa n'inya ya mûtugo wa kîîmuntû bathûgaanagîria meeyia. Îndî bara baathagwa i Kîrundu bathûgaanagîria mantû ma gîîkîrundu.

⁶Mathûgaania mara maathagwa n'inya ya mûtugo wa kîîmuntû imatûmaga muntû akua. Îndî mathûgaania mara maathagwa i Kîrundu matûmaga muntû eegua arî mwoyo na arî na ûkiri.

⁷Mathûgaania mara maathagwa n'inya ya mûtugo wa kîîmuntû matigwatanagîra na Ngai. Bara barî mathûgaania ta mamu batiendaga kwathîkîra watho bwa Ngai. Na kwaria mma, ibaremagwa kûbuathîkîra.

⁸Bara baathagwa n'inya ya mûtugo wa kîîmuntû batiûmba gûkenia Ngai.

⁹Îndî biû bûtiathagwa n'inya ya mûtugo wa kîîmuntû. Woona Kîrundû wa Ngai atûûraga kîrî biû, biû bwathagwa i Kîrundu. Ûra atarî na Kîrundu wa Kîrîstû, ûyu t'wake.

¹⁰Wana weegua mîîrî yenu igaakua n'ûntû bwa wîyia, woona Kîrîstû arî kîrî biû, Kîrundu akabwaa mwoyo n'ûntû ibwagîrithîîtue i Ngai.

¹¹Na woona Kîrundu wa ûra aariûkiirie Yiesû atûûraga kîrî biû, ûyu aariûkiirie Kîrîstû agaatûma wana mîîrî yenu îra îkuyaga îtûûra mwoyo tene na tene na njîra ya Kîrundu ûra atûûraga kîrî biû.

¹²Kwoogu aruayia na aarayia, tûbatîîrue twathagwa i Kîrundu mîtûûrîreeni yetû, ti twathagwa n'inya ya mûtugo wa kîîmuntû.

¹³Bûgatûûra bwathagwa n'inya ya mûtugo wa kîîmuntû ibûgaakua. Îndî bûgacinda mantû maathûûku ma kîîmwîrî kwa inya ya Kîrundu bûgaatûûra.

¹⁴Bara bonthe batongoragîîrua i Kîrundu wa Ngai n'aana baake.

¹⁵Kîrundu ûra twetwe atitûtuîkithîîtie nkombo cia ûguaya kaîrî. Kîrundu ûra twetwe atûtuîkithîîtie aana ba Ngai ûra twîtaga “Aba,” (na bu i ta kuuga “Baaba”).

¹⁶Na i Kîrundu wooyu aaragia na irundu bietû agatwîra wabu tûrî aana ba Ngai.

¹⁷Na woona tûrî aana baake agatwa rûgai rwa ithaarimo bira atwaigîrîte. Bionthe bira Ngai eete Kîrîstû bigaatuîka bietû na tiû. Îndî weegua wana tiû tûkaagîa mwago ta wake, nwa mwanka tûnyamaarue ta bûra Kîrîstû aanyamaariirue.

¹⁸Ndî na mma t'ûntû wana weegua itûkûnyamaara îîndî. N'ûntû kûnyamaara gûkû gûtiganaanîka na mwago ûra tûkaagwûrîrwa.

¹⁹Bionthe bira Ngai aûmbire ibieteereete bikîendaga kwona mûno rîra Ngai akoonania bara barî aana baake.

²⁰Bionthe bira biûmbe biagarûrirwe biatuîka bia ûtheri. Na ti na wendi bwa bio. I kûringana na wendi bwa Ngai. Îndî ingî ikwarî na wîrîgîîro

²¹atî, bira biûmbe bigaakûûrwa ûkombooni bûra bûûmba gûtûma bikua, i kaingo biîgua birî na kûthaûrwa kûra kûrî mwago, kûra bara barî aana ba Ngai ûkeegua barî na ku.

²²Itwiyî wana îmunthî biûmbe bionthe bitûîre bikayaga n'ûrûrû ta mwekûrû akîgîa na mwana.

²³Îndî ti bio bionka. Wana tiû eetîgîri na i tiû tûrî na Kîrundu, ta we arî kîonereria kîa mbere kîa Ngai kwingia wîrane bwake, itûkayagîra ndeni watweteereete mûthia. Mûthiani Ngai agaatûthûkia tûrî aana baake, rîra agaatûtuîkithia ba mîîrî îngî.

²⁴Itwonokiirue, na n'ûntû tûrî boonokie, tûrî na mma wîrîgîîrooni bûbû bwetû. Tûkoona gîntû kîra twîrîgîîrîîte, wîrîgîîro ûtiîgua bûrî na gîtûmi. Ga kûrî muntû eerîgagîîra gîntû arî na kîo?

²⁵Woona tûrî na wîrîgîîro bwa kîra tûtakûrî tûgûkîona, tûgîeteereete tûûmîîrîîtie.

²⁶Na i Kîrundu atûteethagia n'ûntû tûtirî inya na bwetû. Tûtiiyî kûromba bûra kwagîrîte. I Kîrundu atwerekanagîra kîrî Ngai agîkayaga mûkayîre ûtaûmbîka kuugîka na mîgambo.

²⁷Ngai ûra oonaga bûra bûrî nkorooni cietû naiyî bûra Kîrundu augaga, n'ûntû Kîrundu atûrombagîra kîrî Ngai kûringana na wendi bwa Ngai.

²⁸Itwiyî atî Ngai atûmaga mantû monthe makarîka,[1] kaingo bara bamwendeete na eetîîte kûringana na mûbango wake bateetheka.

²⁹Ngai aathuurire[2] bara bagaatuîka antû baake kinya mbere ya nthîgûrû yûmbwa, ababangîra bagaakara ta Mwana wake, kaingo Mwana wake atuîka kîmbere kîa aruagina na aaragina baingî.

³⁰Wababu kaîrî i bo beetîîtwe i Ngai. Na babu beete nwa bo baagîrithîîtue i Ngai. Na wababu baagîrithîîtue i bo beetwe mwago i Ngai.

³¹N'ata tûûmba kuuga îgûrû rîa mantû mama? N'ûû aûmba gûtûmakia Ngai arî amwe naati?

³²Ûkoona Ngai ataarega na Mwana wake aamûrutire arî kîgongwana gîetû twinthe, twa bira bingî bionthe atagîtwa ûtheri amwe na Kîrîstû.

³³N'ûû akaathitanga antû bara Ngai athuurîîte na i Ngai atwagîrithîîtie?

³⁴Kwoogu n'ûû îîndî aûmba gûtûgiitîra îgamba bûûthûûku? Gûtirî we, n'ûntû Kîrîstû naakuire na aariûka na îîndî akari nthî rûteere rwa ûrîo rwa Ngai agîtwerekanagîra.

³⁵I mbi yûmba gûtwathûrana na wendo bwa Kîrîstû? I thîîna? I kînyamaara? I kûnyamaarua? I yûûra? I kwaga nguo? N'ûgwati? Kana i gîkuû? Gûtirî kîo!

³⁶Wata bûra kwandîkîîtwe *Maandîkooni Maatheru, “Gûtirî ntugû tûtaûragagwa n'ûntû bwaku. Antû batwonaga ta ng'ondu cia kûthînja.”

³⁷Îndî mantûûni mamu monthe i tiû acindi na kûraaya gûkûrûkîîra kîrî Kîrîstû ûra aatwendire.

³⁸Ndî na mma gûtirî kîo kîûmba gûtwathûrana na wendo bwa Ngai bûra aatwoniirie ndeni ya Kîrîstû Yiesû Mwathani wetû. Ti gîkuû, ti mwoyo, t'araîka, na ti mainya ma irundu. Ti mantû mara marî ku îîndî kana ma îgiita rîra rîkaaya, ti kîûmbe nwa kîrîku kîa nthîgûrû ya îgûrû kana kîa nthîgûrû îno, na ti gîntû nwa kîrîkû kîngî kîrî bionthe bira biûmbe.